CHAPTER 2

MALSAWMPUIA 

CHAPTER 2 

Ka college kal tur chu Tepuii sâwm ka ngai bawk nên phur zetin an in lam pan chuan ka tlân tar tara, tuala u Sawmpuia lo awm ka hmuh chuan ding vatin thâwm dim zet chuan ka pan hriau hriaua, a nilah tuala ṭhutna tur an siamah chuan ṭhu in a phone a ena, ka pan tih pawh a hrelo hrim hrim.

A hnunglam aṭang chuan veh dân dânin a phone chu ka en puia, hmeichhe pakhat nên an lo in text mawlh mawlh tih ka hmuh chuan ka ner nghal sak. A bialnu a ni ngei ang, lâwm lo zet chuan ka ner nâng a “A hmelṭhat loh tawp kha” ka ti thut chu a ni pawh a phu zawk mai.

A hmeichhe biak hmêl ka hmu tawp silo, rang zeta rawn hawiin mitmeng hriatthiam har fe hian min ena “Enge i hriat? Vawikhat mah mi phone en rûk chîng tawh suh ang che” a rawn ti chu ka ner saka.

“Ka en rulo, i awm ve reng kha. A hrim hrimah bialnu neih ka la duh lo i ti a ni lâwm ni? Ka message mah chhâng duh loin hmeichhe dang i be vela, i va han sual em em ve” tihlak hlakin ka melh ram rama.

A nilahin ngawi reng hian min thawh chhuahsanin inchhûng lam pan a tum tih hriat takin a kal zuia, a hnungah chuan ka zuang kai nghal nawlh mai. “Enge i hriat Lalnunpui” a rawn ti ta ṭhat a, min nghah thlâk mai a tum chu ka kut chu ka suih nghet sauh sauha.

“Min paw rawh, tihian awm ang. Ka duh che tumah ngaihzâwng nei suh, i neih vaih chuan ka ti buai tho tho ang che. Ka timai mai lo a nia aw, hmeichhe dang i biak pawh ka phallo, ka upa tawh bialpa ka nei ve thei reng, tinge hmeichhe dang i biak? Ka lawm miah lo a nia aw, ka bialpa hual i nih hi” tiin ka  sawi pah paha.

Min thin thlâk tumin a che vak vaka, keilah ka in vuan nghet tulh tulh bawk si. “Chhuk vat teh, ka duhzawng i nilo ka tih tawh kha, i la nau lutuk kum 10 dâwnin kan inthlau tih i hria em? Chhuk vat rawh Lalnunpui” a rawn ti leh ṭhat thata, engah nge maw chu pawh chu a sawi sek le?

“Ka duhlo min duh hma chu ka tibuai dawn che, i duh leh min thing char char rawh” ka tileh ringawta, a tawpah chuan min dahthla hnawkin ka lamah a rawn inherin a kut a lek deuh zuaih avâng chuan ka mit chhing tawpin ka ding tlâwn renga.

Engmah a rawn tih tâk lohah chuan ka mengchhuak vat, thinrim insûm tih hriat taka min en in “Ka tihpalh” a ti leh sapa, nu Ṭha-i te pawh an rawn chhuak chiah bawk “Enge nita bawiha? Enga tinge Nono-i i tin tâk ur ura, khatiangin ti tawh reng reng suh” tiin pa Hriata chuan a rawn ti a.

Chutia ka thlavang an rawn hauh avâng chuan ka mittui tling pamin ka insût ta hraiha, Tepuii chuan min rawn hnaih vat bawk. Ka ṭap ta mai chu u Sawmpuia pawh a hamhaih ve a niang inthiam loh hmêl tak hian min ena.

“A duh che tih i hre renga, khatianga tih tih tur a ni hleinem, an rilru a la naupanga nakinah a tibuai tawh lo mai ang che. Naupang an la nih hi, khatianga nang i tih pûng pûng reng ni, i rawn haw ve chauha a ngai ve che a nih kha” nu Ṭha-i pawh chuan a lo ti mawlh mawlha.

U Sawmpuia erawh ngawi rengin inchhûng lamah chuan a lût ta daiha, ka en zui reng. A hmêlṭha zet chu a thinrim lai pawhin a ṭhat zual pui deuh deuh lehnghâl, “I ṭahbelh lutuk bâng tawh rawh. Ka hrilh che kha, ka u hi a duh loh zawngah chuan a luhlul teh mai a nia” Tepuiin a rawn ti sar sar chu ka mittui chu hru sawk sawkin ka melh nghek a.

“Kal ang, min la duh âwm tho tho emai” tihmakin ka inher nghata, a ni pawhin min rawn zui ve mai bawk. Ka ṭah chhuak pawh a reh leh vek tawh, nu leh pa thlazâr hnuaiah pawh awm duh lo in hei chen ka ûm zuia, min duh hma chu min hau pawh nise ka tibuai tho tho ang.

Enge maw ni ka duh neih nâna ka beihlohin midang tân beih te chu ka peih teuhlo mai. “Min la duh dâwn khawp, in monu ka la ni dâwn alawm, engtikah emaw u min la tih a ngai ang” tiin Tepuii chu ka nuih var vara, a rawn nui ve leh hak mai.

“Innei pawh ni ula ka u chatuan lovang che, ka monu i nihchuan ka ti duhdah viau ang che” a tihchuan ka nui ve haka, a tih duh tak tak erawh ka ring chuang lo.

“Min lo tihpui char char rawh, ka duhzia i hriat ve vek kha. Tinge maw ka kum pawh chu a sawi sek le?” tiin ka phun pah nâng nâng a, ka kum avânga min hnar sek mai hi ka hrethiam theilo.

“Aw fapa upa ber te a ni ve a, a ngai a lawm. In en la, a ni lakah chuan i nau ve bawk êm a ni, keimah ai mahin ila nau a nia, a chi hian a chi loh ve bawk êm a ni. Pafa in ang dawn êm a din” tiin a nui hak haka, keipawh ka nuih a za ve tho, kan kum chu a inthlau ve êm bawk lah taka.

“Nono min lo nghâk teh u” mipa aw rawn chhuak avâng chuan hnunglam kan hawi vata, Rinsanga hmêl kan hmu nghal zat mai. Ka ner deuh saka, Tepuii lah chuan min chhaih nghal zuk zuk lehnghâl.

Min bemna a rei tawha, a hmel pawh a ṭha. College mister a ni bawka star tu pawh a ngah, mahse u Sawmpuia bâk ka duh theilo. Ka mitah phei chuan u Sawmpuia ai chuan chhe tak hi a ni ringawt, mahse chutianga han hnar vak leh biak vak erawh ka tum lo.

“Kha hei ka lo ken che a” tiin chocolate hi min pe a, ka la ve mai. Ei tur lam hi chu ka hnar phal thlâwt lo “Ehem! Kei ka awm ve tih i hrelo em ni? Min pe ve dawn lo nge?” Tepuii chuan a lo ti a, Rinsanga lah a hawi hai nasa, chu chuan ka nuih a tiza viau lehnghala. 

“Ah....aaaaaaa nia kha hei ei mai rawh” tiin lollipop chu a pe a, Tepuii ner nasa lutuk chu ka nuih lo theilo, a va han cute tak. “Hei chiah hi maw? A pawilo, duh ber te leh duh vak loh chu a in an theih loh a nih hi” tiin a la zui ve maia, Rinsanga hmêl chu ka khawngaih bawk nen “Kal ang u” ka ti ta vata.

Min rawn zui dûn ve mai, Rinsanga chu a ṭawng leh vak tawh lo. Tepuii nên kan awm lai hi chuan a ṭawng ṭha duhloa, keimah nêna kan awm erawh chuan min be hmasa tu ah a ṭang ngei ngei, u Sawmpuia duh viau lo ila chuan ka nih pui ngei ang. Mahse mipa pakhat ka thlang tawh tlata.

Thinlungin duh pahnih a neih tlat ang te hi ka duhlo, pakhat kan duh a nihchuan lungawi taka pawm mai tur. Midang dang va duh kha a ngaiin ka hrelo.

“I ti khawngaihthlak e be ve ṭhin la, i bulah a kal ve ṭhin a, nang i ngawi ngul zel bawk si” Tepuii chuan ka bengbulah a rawn ti sar sara, enge ka biak pawh chu a châk viau ni. A duha a lo kal a nimaia, beiseina pêk ka duh hlek lo, chutilo chu a hma ai nasa in min beisei zual dawn tih ka hria.

“Rina ṭawng ve bawrh bawrh rawh, Nono-i hi chu amak a nia, mi biak lum lam hi a peih lova, a ṭhiannu min sawisak chiah hi a peih. Ngawi ngul zêl mai, in bula kal a hrehawm” tizuiin Rinsanga chu a ena, a ni pawh alo nui ringawt mai. Enge sawi tûr avan tehlul nên u Sawmpuia ka bem bakin ka ṭawng duh teuhlo mai.

College kan thlen dâwn chuan Rinsanga chu a ṭhiante'n an lo au lâng lâng a, an bula kal turin an hui nghal zauh zauh mai “Nono ka kal phawt ange, ih.. lunch kan ei tlâng thei angem?” a kal hma chuan a rawn tileha “Aw le kan ei dawn a nia, a nih le” tiin ka lo chhâng ṭha ve maia.

A nui sak chu ka hmu reng, a ṭhiante lam pan chuan hlim zet hian a pheia “A duh che sia ka khawngaih ṭhin; hmeichhe tam tak duhtu a nei ve renga, nang a ngaihsak lo tu ber a thlang che a nia” Tepuii bawk chuan Rinsanga en zui reng chung chuan a rawn ti leha.

“I u laka ka awmdân nên a inang chiah a nihchu, tikhan min hriatthiampui em? A hrim hrimin nangmahin i duh zâwk lo em ni? Rinsanga te chu i sawi ang khân a luck em a sin” ka ti chu min rawn chûm awk mai, mi lah hi a dim lo thei nasa mai sia.

“A sawi pawh sawi suh, a duh che tih i hriat reng kha, ngeiawm thei lutuk suh aw. Ka u chu i duh viau em ni?” a rawn tileh chu chiang zet hian ka ena, a hma khân ka hrilh chiang viau sia, henu tak hi chu engmah hi a hre rei theilo.

“Ka sawi tawh kha, i mipa duh deuh ang kha a nimai, chuvanga in khuaa rawn kal ka ni tih hre ta che. Chuti nilo se chuan Aizawl ah pawh college ṭha tak tak a tama, ka kal daih ang chu. I u vâng chauh a nih hi helai hi ka rawn thlen ni, ka hrilh chiang viau che. Duh satliah chu ni ila ka rawn kal kher lovang, ka hmuh hmasak ber aṭangin ka duh tawh” ka sawi nawn leh ta dap dapa.

Khawngaih hmêl tak hian min enin “Ka theihtâwp ka lo chhuah pui ang che. Mahse kan û ber a ni sia, a  duhloh zawngah chuan a hlauhawm tehmai a nia aw, a thinrim chuan ka be tam ngam hauhlo ania, a hlauhawm lutuk. Bâkah ka nu leh pa hian a duhzawng hi an pawmpui ṭhin sia, ka u chu a khirh reuh lutuk, mahse ka lo try char char ang” a tihchuan ka bu nghat nghata.

A khirh poh leh ka hnaih zual zel ang, engtikah emaw ka ta a la nih ka ring bawk. Min hnar reng chhan ka hre chianga, chuvang chuan min duh hun a neih theih nân ka che ngei ang.

“Um nang tal in ṭan min lakpui a ngai a lawm, hetah ka rawn kal ve ṭang ṭanga. Ka kalchhan a thlawn chuan ka tân a hlâwk dâwn lo emai, BA hi ka chhuah veleh amah pui turin nurse ka training ang, lo hre lâwk ila chuan BA kal kher lo hian ka training thei reng a sin, ka ât vâng vek a ni. Mahse kan khua a inang miau lova, ka inthiam leh deuh” tiin ka ṭawng zaih zaiha.

A hma kha chuan Doctor nih a tum tih kha ka hrelo hrim hrima, heta college ka kal hnuah chauh ka hre bawk nên ka ui ngei mai. An khua a Putea te bula Christmas ka hman aṭanga duh ṭan ka nia, ka hmuh tirh aṭangin ka la star char char.

Ka star rei ve thlâwt alawm, chuvâng ania'ng ka mizia hloh vek khawpa ka duh ni. Amah a nungchang leh chêtzia in min hneh tel bawk nên ka vei hi a ni tawp mai.

“A dik chiah, ka u hi chu ka u mah nise keipawhin hmêlṭha ka ti. Mahse a induhtawk ve lutuka, keipawh hian ka ngei a nia, dik tak chuan nang ilo lan hma aṭang tawh star tu hi a ngah ania aw...amah avânga min be ṭha tu leh min duat tu hi an tam ṭhin a sin. U Davida pawh a ni tho, ka pa leh ka nu an chhun kawpa, an hmêlṭha vek. Keimah hi ka hmelchhe ber a, ka vanduai a nih hi, mite chu a naupang ber a hmêlṭha ber an ni ngaia, kei ve chu ka hmelchhe ber” a tichu ka nui hak mai.

Keichuan hmelchhia ka ti hauh lo, an unau reng rêng hi chu an hmei a pa in an hmêlṭha em em vek in ka hria. Mahse u Davida ai chuan u Sawmpuia a lêtin a la ṭha fe zâwk, u Davida pawh vawithum chu ka hmu tawh. A ni erawh sports lamah pa Hriatpuia ang maiin a tuia, tûnah pawh Mumbai fc tân a khêl mek tih ka hria, an chhûngkua hian ka ngaisang mahni tâwkah hna an nei vek lehnghâl.

Tepuii chiah hi a bâng tawh, u Pekpeki pawh ram dangah tho hnathawkin a awm tih ka hria. Hetah lah football trainingna ṭha leh lûn em em an neia, an awm thei viau pawh hi a âwm lo love. U Sawmpuia pawh helaia damdawiinah a thawk mêk tih ka hria, u Pekpeki leh u Sawmpuia hi phîr an nia, an unau hi kum in chhir in an piang deuh vek an tilehnghal.

Tepuiii pawh a lehkhathiam theihloh avânga keinen pawh in rual mai mai kan ni. Chuti nilo se keiai kumhnih in a upa a BA a chhuak var var tawh ang, an unaua a naupang ber a nih bâkah an duat bawk nên chuvâng te pawh chu a niang a pangchang em em lehnghâl.

“I hmeichhe hleinem, hmelchhia in ti ve ziah suh. I ṭhat lutuk avâng zâwk a nihkha, saw i di riallova a rawn kal” tiin kan hmalam chu ka melh zawka. 

A ner nghal sawk leh a tlân chhiat tum chu a inruala, ka man bet nghal vat mai. A ex a nia a la haw reng te pawh aniang “Enge rawn tih a tum ni? Ka kham tawh lutuk, min rawn be ziah lehnghâl” tihlak hlakin a ex lam chu a ena.

“Te kan in be thei angem? Nono i ṭha maw?” a tihchuan ka bu nghata, Tepuii erawh a ner nasa ngang mai, a la haw viau te pawh ani mahna. Dama hian a kawp avânga inṭhen a nia, a âwm ve tho mai; min kawp tu han biak ṭhat vak thu awm suh.

“Tihian sawi mai rawh, heta i sawi peih loh leh inhmuh kan ngai lo tihna a nimai, khawiah mah ka kal peihlo” tiin a kut a kuangkuah hmaka. Tepuii hian a duh ṭhin zia ka hria a, hetia engah mah ngailo anga a lang thei hi ka fak letling zâwk.

“A nih chuan khawngaihin min ngaidam thei angem? Khatiang thil kha ka ti leh tawh ngai lovang, Te bul ṭan leh ang. Ka kawp leh tawh miah lovang che, ka hmangaih che ka tihkha ka ti tak tak a nia” a rawn ti sapa, a aw ah pawh Tepuii chu ngaidam turin a duh hle tih ka hre thei.

“Min hmangaih tak tak maw? En teh Laldampui, kan hmangaih tak tak te kan phatsan ngai lo, min chân i hlauh vâng mai mai a nih kha. Engmah rawn sawi tawh suh, ka ngaidam ngun lutuk che, sim hun i nei thei lo a nih kha, min hmangaih tak tak chu nila hmeichhe dang kha i kawp lovang, min rawn tibuai tawh suh” rilruna zet chuan a ti ta piap piap mai. 

A hmêlah chuan a ṭah a chhuak hle tih ka hria, Dampuia lah chuti bawk. An pahnih hmêlah chuan hlimna hmuh tur a awm lo “Te khawngaih takin khatiang thil ka ti leh tawh lo tak tak ang, vawikhat chiah chance min pe leh rawh, ka hmangaih che a ni tih fiahna hun min pe leh rawh. Khatiangin ka awm leh tawh ngai lovang” a tinawn leha.

Tepuii pawh a ngaihtuahna a buai tih ka hria “In be rawh u, class ah ka lo nghâk ang che. Ṭha deuhin sawi dûn rawh u, Dama nangpawh kawp leh mai mai tur chuan khawngaihna kha rawn dil reng reng suh ang che” tihmakin class lam chu ka pansana.

Tepuii pawh hian a la duh reng tih ka hailo, an in zui rei ve êm a. Chutianga awlsam taka a theihnghilh bik ka ringlo, chuta kârah college khatah an awm dûn bawk sia. Nitin inhmu chu an in theihnghilh mai bik hauh lovang le.

Keimahte chuan ṭhu in ka hawi veuh veuha, ka lehkhabu pawh ka en peihlo. En leh rilru hahna mai mai, zir tûr hlir hi a inziak bawk si rilru a ti ipik mai mai. U Sawmpuia chu ka ngaihtuah leh neuh neuha, tûnah chuan a duh ang ngeiin Doctor tak tak a ni tawh dâwn a, ka lawmpui takzet.

Tunkar inrinni zânah lawm an ti kha a nia, min sâwm ve bawk nên thleng vat vat se ka ti ngei mai. Ka dawhkân chu ka kut ṭang chuan ka tuk kerh kerha, ka thaw leh hak ṭhin. Min duh lo tu tihbuai reng hi keimah pawh hian nuam ka tilo, mahse ka duh êm si a ka rilru ka thunun thei bawk silo hi keima tân natna a ni si.

Dik tak chuan midang hmaa hlim tak anga lante, thawveng ang taka ka lanna avâng hian rilru hahna ka neilo tûrah an ngai ṭhin. Mahse chutiang ka ni hauh silo, rilru hahna pawh ka nei ve thoa, keima tâwkah rilru nat ngawih ngawih châng pawh ka ngah.

U Sawmpuia avânga ka rilru nat chang pawh a tam, min hnâwl apiang hian keimahah natna a awm ve renga, mahse ka hmuh tir ngailo. Inah ka haw a keimahin ka tuar mai ṭhin, a hriat ah chuan hlim hmêl takin ka nuia, chhûng lamah erawh chuan ka na em em thung.

Amahah beiseina nei tlat lo ila chuan heti renga ka ûmzui peih ka ring lo. Ka rilru hian a châng chuan tibuai tawh lova theihnghilh tum turin min hrilh ṭhin a, mahse ka beiseina leh ka thinlung hian a phal mawlh silo.

Amahah beiseina thar ka nei zêl pawh hi â ka inti a, min duh lova min hnar ṭang ṭang tu ûmzui hi a tlâwm thlak pawh ka ti ve tho; mahsela ka hmangaih miau si a, ka â vek tawh nimaiin ka hria.

Tepuii rawn lût chu ka lo en renga, a hmêlah chuan engmah a lang chhuak lêm lo “Enge chanchin?” ka bula a rawn ṭhut thlâk rual chuan ka lo zâwt nghal zata, a rawn ner nghal nâng mai.

“Min ngên nasa lutuka, bâkah ka duhzia i hriat kha” a tihchuan an in ngaidam tih ka hre mai. Ka thaw huai mai,an induh tawn miau chuan vawikhat chance pêk leh kha chu a phu ka ti tlat, Tepuii hian pe duh lo in Dama hian midang neihsan se a rilru na tur chu Tepuii bawk ani.

“A ṭhat chu, mahsela nangmah inveng fîmkhur la. Amah pawh chiang takin i hrilh dawn nia, tûna a bawhchhe leh a nihchuan ngaihdamna a awm tawh tur anilo, ka ṭhianṭha ber i nia i duhthlanna chu ka pawmpui zêl ang che” tiin ka nuih var vara, a ni pawh a rawn nui ve sak mai.

“Kan inṭhen rual khân a mi kawpna nu nên pawh khân an inṭhen ve nghâla, khatia ka manchhuah avâng khân a inthiam lo in kei min chân kha a na lutuk tih min hrilha, ka ring ve tho. Zantin deuh thaw kan in bulah rawn kalin in biak a duhthu a sawi ṭhina, keimah kha ka chhuak duh ngai lova, mahse a beidawng duh ngai miahlo” a tihchuan ka ring.

Engvanga mipa ho pawh hian an hmeichhe duh ber nei tho si a hmeichhe dang hi be reng nge maw an nih le. Mi chân an duhlova, mi kawp an hreh bawk silo, mi hi an bum reng theiin kan hmangaih avângin kan ngaidam reng thei lo tih hi hre chiang se chuan hetiang hian an awm reng lovang, hmeichhia chu kan dawhtheih êm avâng leh kan hmangaih avâng hian kan nem leh ṭhin a, hei hi mipa â chuan in tih theih nân hmangin min ngaidam leh tho ang tiin an tisual luia, hmeichhe dawhtheihna in a tlin loh khawpa an chêt an hriatchhuah meuh chuan an lo tlai leh ṭhin si.

U Sawmpuia pawh hi a ni tho, ka duhzia leh hmangaih zia a hria, mahse ka lamah a mit a lên duh lova. Min hmuh kân ṭang ṭang ṭhin chu a nih hi, engvanga heti khawpa induha mi tibuai nge a nih le? Ka chungah hian a nunrawng mah mah tihchang lah ka ngah.

“I u hna tlin lawm zân chu kan lem ve ang chu” ka ti chu a rawn hawi phâwk hra a “Ka duh teuhlo mai, Dampuia a awm ve dâwn lehnghâl, bâkah ka nu leh pa in an phallo” a tihchuan ka nuih hak mai.

“A pawilo keimahin ka in mai ang, taka Rinsanga rawn hruai ila a pawi angem? A tel ve châk bawk sia” ka tihchuan a nui har hara.

“Ka u in a sâwm vek a lawm, Rinsanga pa hi ka pa ṭhianpa a nia” a tihchuan mak ka ti ngei mai. “Tak tak em ni?” ka tihchuan a bu nghat nghata.

“Tlangval lai aṭanga inkâwm tawh an nia, ka nu leh pa inneih theih nân pawh an bei nasa a sin. Ka nu leh pa pawh hian an ngaipawimawha, thil tih nikhuaah an tel ngei ngei” a tihchuan ka bu nghat nghata.

Ka lo hre ve miahlo, bâkah mi chhungkaw chin ka ngaihven ngailo bawk nên ka hrelo pawh chu a âwm tho mai.

“Um a nihchuan a ṭhat nasat chu, mi i duhpui sia i u runluih nân hrim hrim hmang ila a ṭha ang” ka tihchuan a nui haka “A thik meuh ang maw? A duh lo ropui che sia, ka u hi chu e keimah pawh hian a châng chuan ka ngei ṭhin” tiin teacher a rawn luh tâkah chuan kan ngawi zui ta daiha.

Class chu la ṭan leh mawp mawp in ka mut a chhuak leh tawh ngei mai. Nurse emaw teacher tal nih ka tum ve bawk si, he khuaah hian thawh ngei ngei ka duh bawk. Chutiang tur chuan ka bei ang, tûn lo kumhnih bâk ka ngai tawh lova, ka zawh veleh nurse ram dang-ah ka training ang, a ṭul tak leh Doctor pawh ka try mai ang chu.

Lunch ei a hun chuan Rinsanga chu a sawi ang ngeiin a rawn kala, keini ai an senior a. Kan class ah pawh star tu a ngah zia chu a rawn luh ruala hmeichhe ho âwm dân chuan a tilang chiang viauin ka hria.

“Nono i hman tawh em?” a tihchuan ka nui haka, a zah hmêl thei si, min biak a piang hian a inthlahrung ni berin ka hria.

“Min hlau em ni? Ka hman tawh e kal ang u” tiin ka ding chhuak zuia, a phur hmêl chu ka hmuh hmaih lo. Hmeichhe ho lah chuan min en haw haw lehnghâl, Rinsanga lah chuan keimah bak min en lo, Tepuii nên chuan an in be leh zauh zauh ṭhin.

Canteen kan thlen chuan dawhkân pakhatah chuan ṭhu thâpin Rinsanga leh Tepuii chuan kan ei tur an va la zuia, kei erawh ka ṭhu mai mai thung. An rawn lêt leh lam chu lo enin Rinsanga chu chiang takin ka ena.

Engvanga kei kher min duh tlat nge a nih ang, keiaia hmêlṭha tak tak pawh an tam hle si a, a duh duh thlang thei khawpa hmêlṭha a ni ve tlat. 

Ka bul an rawn thlen rual chuan Rinsanga chuan ka ei tur a lak chu min rawn pe a, lâwm thu hrilh pah chuan ka ei nghal hlak hlak mai.

“Inrin zân chu min rawn sâwm dâwn a nia aw, ka lo nghâk ang che” ka thusawi a hriat ruala a hmêla hlimna lang chu ka hmuh hmaih lo, ka phulo a sin le. Kei lahin alakah rilru ka pe thei hauh silo, ka khawngaih letling zâwk, keiin u Sawmpuia ka duha, a niin min duhlova, chutiang chiah chu Rinsanga laka ka awm dân chiah a ni.

“Aw le” phur zeta tiin a nui saka, a hmêlṭha hle lehnghâl. “I hmêl hi chu a ṭha mawle, bialnu ṭha tak i phu” ka tihchuan min rawn melh zawka, Tepuii lah a lo nui hak lehnghâl. “Kaa...ih ka duh che tih i hriat kha” a tihchuan ka nui ringawta, chhân dân tur pawh ka hrelo.

“Ka puar e” tiin ka phone chu ka en san daiha, chhân dân tur hre tawh miau heklo.

An ni pawh rei ei lovin an kham zui thuaia, “Kan kal mai dawn em ni?” min hnial lêm loh avâng chuan ding chhuakin kan inzui leh ta dam dama.

Ni a liama u Sawmpuia tlin lawmni chu rawn thlengin keipawh kawrfual vâr arh deuh laih ka ngal rek thleng lai chu ha in sneaker var bawk ka buna, ka in peih der mai. “Bawihte i hman em? Hei i ṭhianpa a lo thleng a nia” pitei in a rawn tihchuan ka chhuak zui vata.

Room aṭanga ka chhuah rual chuan Rinsanga hmêl ka hmu zui zata, tshirt dum ha in a chungah leather jacket a ha a, cargo kekawr nên chuan a inhmeh phian lehnghâl. Hmêlṭha hi chuan engpawh an inhmeh pui a nih hi, an pian a nalh tel ngat phei chuan an inhmeh zual.

Mit khap miah lo hian min lo en char chara, min tilai lek lek lehnghâl. “Kal ila” ti a a bula ka va din rual chuan ka nalh thu chu a lo sawi sapa, ka nui sak mai.

Inzui chhuakin pâwnah chuan a bike KTM ngei mai chu a lo ding ran mai, “Zanin chu i mawizual tak tak” a rawn tileh chu alamah inherin ka ena “Ka lawm e, nangpawh i chhelo in i nalh lutuk” tiin ka nuih var vara, a nui ve sak mai.

A helmet chu khumin bike ah chuan a ṭhu zuia, a tihnun rual chuan a hnungah chuan ka lâwn ve nghal zat mai. Tlân chhuakin u Sawmpuia te in chu hla a nilo bawk a kan thleng zui ta thuaia, pâwnah lir a lo tam phian tawh lehnghâl.

Hmelhriat an ngah bawka lawmpuitu pawh an ngah reng ang chu. Rinsanga nên chuan inchhûng lamah chuan kan inzui luta, mi an lo awm nual tawh mai. Inchhûng chu a zau viau nângin an khat titih, u Sawmpuia pawh hmeichhe pakhat nên nui dun a an lo awm ka hmu nghal.

Ka thik nghal ngei mai, a bialnu em ni? Tihchu keimah leh keimah chu ka in zâwt nawn tluk tluka, kan college a mi te pawh an lo awm ve nuala, Rinsanga nên kan lût dûn chu min lo la au zuia, u Sawmpuia te pawhin kan lam an rawn hawi rang hle.

Min hmuh chuan danglam ang pawhin a awm lêm lo, chu mai nilo in mipa dang nêna kan inzui chu engah mah a ngaih hmel loh bawk. A rilruah chuan ka awm lo âwm ve hle mai, Tepuii leh Dama kan lam pana rawn phei chu ka hmu nghal zat.

“In lo thleng thei maw? Kha in va inhmeh dûn ve, in nalh in inchhelo” an lo ti duaha, kan nui tlâng dar dar mai. An ni pahnih pawh an nalh dûn viau, hmun khat laia tuma awm lohna deuhah chuan pheiin kan awm khawma.

“A bialnu em ni?” Tepuii beng bulah chuan ka va phun sar sara, “Ka hre bik lo a niang, a rawn kal tirh aṭangin ka u bulah a awm char char” a tihchuan ka thaw haka, a bialnu a nihchu ka ring nghal bur.

Chûngte chuan min ti thinrimin ka thik lutuk chu ka insûm theilo ṭep a ni. Rinsanga min rawn biakna avâng chuan hmundang ka en san ta daiha.

“In tur i duh ve em?” a tihchuan ka duh thu a chhângin a tho chhuak zuia “A ngaihsak che mawle, nihpui ve tawh mai rawh. A fel êm hi, keichu ni ila ka hnar reng phal teuhlo, college a chhelo leh hmêlṭha ber lehnghâl” Tepuiin alo tihchuan Dama chuan a melh rum ṭha ngei mai.

“Tikhan min lo en suh, Nonoi ni ila ka tihna a lawm. Keite chuan nangmah bâk hmêlṭha tih ka neilo, ka ṭhiannu hi a mâwl lutuka ka hau mai mai  anihkha” a la tizuia, insawifiahna tur lah hi a haihchham dêr bawk silo.

Rinsanga rawn lêt leh chuan theitui min rawn pe in ka bulah chuan a rawn ṭhu zuia, pa Hriatpuia ding chhuakin u Sawmpuia hna hmu leh lawmpui tura kal khâwm ho chunga a lawm zia te sawiin hlim taka awm tur chuan a ti zuia, midang chuan lam an ṭan sap sap mai.

U Sawmpuia leh kha hmeichhia pawh kha an lam ve bawk, ka en a ka thik lutuk chu ka alh pup pup lo chauh a ni. 

“Lam ve ila” Rinsangan a rawn tihchuan hnial lovin ka kut chu ka pe a, Tepuii te pahnih pawh an lo lam daih tawh chu niin. Rinsanga nên chuan u Sawmpuia te hnaih takah chuan lam dunin ka kawngah a chelh rana, amah a sâng bawka a nghâwng ka chhîpin a chen ṭawk a ni.

A nghâwngah chuan kuahin ka mit ka chhing daiha, u Sawmpuia te hmêl ka hmuh peih loh vâng a ni pakhat, kei min hnar ṭang ṭang chhan chu a chiang maiin ka hria.

Rei lam tawh lovin intur ka duh avâng chuan intur dahna lam chu ka pana, beer ka hmuh chuan ka phur ngei mai. La nghal vatin ka in nghâl khawlh khawlha, a tui loh mai zia chuh. Ka luak a chhuak nghal ut ut bawk, ka lu hai muai muai nên chuan ka pai deuh ṭuang ṭuang mai.

“I ṭha em Nono” Rinsanga ka hmuh rual chuan ka nuih saka, ka tlu tur chu min rawn dawmin “Ka thlah ang che, tinge khatiang i in?” tiin pâwnlam min panpui zuia.

Keilah ka rui chu ka nui har har tawh mai “Nono” bike-a min hlân a tum chu duhlo in ka ṭang tlata, “Ka rilru ana” ti ṭiau a ka en lai chuan min fawh tumin a rawn kûn hniama, mahse mi pakhat hian a rawn dang vat mai.

“U Sawmpuia maw?” Rinsanga ti ri ah chuan ka taksa rawn vuan tu chu u Sawmpuia tih ka hre nghal, mitmeng vai riai chuan ka ena “Misualpa” ka tinghal sap bawk.

“Keimahin ka lo va thlah ange, a putea ten an hau palh ang che” a tihchuan Rinsanga pawhin a lo âwih ve mai nge min kalsan zuia, “Malsawmpui min hnara, ka rilru iti na tih i hria em? I sual hle mai, ka na ka na lutuk” ti a phun sep sepin a âwmah chuan ka bei zui kaka, ka taksa kâng nawlh chu ka hre zuia .