CHAPTER 3

MALSAWMPUIA 

CHAPTER 3 

SAWMPUIA POV...

Ka âwma beia la phun niah niah hmeichhia chu en zawkin ka car lam chu ka panpuia, a mittui a la tla ngiai ngiai zui. Engvanga min duh tlat nge ka hrelo, ala naupanga a rilru lah a la control thiam hek lo, naupan ât thil ti a ka han pawmsak dâwn lahin a thu tak phian bawk si.

Helai thleng thlenga college a rawn kal hian a naupan ât vâng a nilo tih a tichiang viau bawk. A hmêl ṭha zet chu enin car seat ah chuan ka dah lût a, seat belt ka hrên tir lai chuan “U Sawmpui, min kalsan suh, min kalsan miah suh” a rawn ti nawn leh sapa, khatiang khân Rami kha a thik ka ring hauhlo, a lo thik hle a nih hmêl.

Amah chu en vang vangin driver seat ah chuan ka ṭhu lût zuia, ka nu leh pa ngei pawhin ka tihdan avângin min hau fo va, ka nau lah chuan a ṭhiannu a nihna angin a lo ṭan ve tum hrang bawk si. 

Ngaihzâwn tumna ka neiloa, a hma hun tihchhiat sak lah ka duh heklo. Ka tân chuan a nau mah mah tlat a ni, chubâkah a khawvêl pal a la tlêm a, nakinah keiai ṭha tih a nei leh tho vin ka ring. Tûna mi duha a inhriatna hi chu a la nêp dâwn lutuk tlat, ka rualpui ngei ngaihzâwn ka duha, hmeichhia han ngaihsak a duat hliau hliau ka thiam lo bawk nen ka aia kum sâwm chuanga nau han ngaizawng tur chuan a mawi pawh a mawi ka tilo.

Ka tlân laklawh lai chuan a rawn harh leh tih hriat takin a ke chu ka mal chungah a rawn hlanga, a seat belt chu a phelh nghal mawlh mawlh mai. “Enge tih i tum ṭhu ṭha teh” ka lo tih lai chuan a pheikhawk chu a rawn phelh zuia, min en vang vangin ka mal chungah a rawn lâwn a.

Accident pui ka hlau bawk nên car chu ka ti ding leh riha “Nono chhuk rawh, i rui a nihkha. Inah haw vat i ngai tih i hria em?” ka vin deuh titih chu ngai pawimawh hauh lo hian min en zui kara,a tê bawk nên a rit tham hauh lo.

Chutah a mittui bawk chu a rawn luang leha “Tinge min duh ve mai loh? Bialnu neih ka duhlo tiin min hnâra, khanu kha i nih pui leh tho si. Ka rilru i tina lutuk, ka hua che a, mahse ka duh bawk che si, ka haw theilo che. Min duh ve theilo tih hre rengin ka ûmzui ṭang ṭang che a, tinge hetianga min tih, i hmeichhe duhzâwng ka ni ve thei ngang lo em ni?” rilru na zet hian a ṭap zui al ala.

Tihmai dân tur pawh ka hrelo, a ṭap hmêl lah chu a duhawmin duat a châk awm phian lehnghâl. Ka nau ai a la nau leh chhâwng a, ka tihngaihna hrelo chuan ka âwmah ka pawm bet ta tawpa “Miin a duh lo che a nihkha kalsan rawh an tih pawhin ka duhloa, ka ûmzui ṭang ṭang che a; mahse nang chuan min tihnat chiah i thiam. Ka naupang i tiziaha, keini lo pawh ka rualpui inngaizawng an tam lutuk, min duh lo hrim hrim tiraw?” tiin a insût hraih hraiha.

Chutah rawn hawi chhuak thutin ka hmuiah chuan a rawn fâwp ta chat mai, ka hamhaih bawk nên ka meng deuh kâwka. Hetianga a chêt ngam ka ring lo hrim hrim, ka nghâwngah a kut rawlh lûtin a hmui chu a ti che zuia, rinai a zei hrep lehnghâl.

Ka insûm ve ṭang ṭang mai, ka nau mai a ni ti a ka infuih mawlh mawlh lai chuan a mitmeng phelh phang chuan min rawn ena. A hmêlah ringawt pawh a rui tâwk tih a hriat reng mai, a hmai a tai tek a, a hmui chu a huh hlap bawk. Car chhûng light ka tih en miau avângin a hmêl chiang takin ka hmu thei vek bawk.

Chutah ka biangah rawn dawmin ka nghâwngah chuan a fâwp zui dêk dêk a, ka tih vak chuan a rui bawk nên a ṭah leh ka hlau bawk si ka dawh ta tawpa, ka nghâwng lah chu a zuka a na phian lehnghâl.

“Ka bialpa chiah i nih hi, hmeichhe dang an awm theilo. Bialnu i neih vaih chuan min hmu tawh miah lovang, ka timai mai lo a nia aw, ka inthat anga ka hran khûm hrep ang che” a hmui chu ka hup ta vat, khatiang thu kha ka hriat duh loh ber a ni.

Doctor ka ni a, mahni inthah hmang te hi khawvêla ka mihring huat ber te an ni. Harsatna an tâwk a nih chuan in fuiha, hmalam pan tur an ni tih hre lo in dawih zep takin an nun an la a, keichuan hetiang mahni intihnat duh te hi ka huat ber an ni tlat.

“Khatiang thu sawi hauh suh, ṭhu ṭha la kan haw ang” tiin a seat lamah chuan ka dah phei leha. Min tibuai tawh êm biklo, an in kawtah chuan din puiin a rui bawk nen ka pawm chhuak ta tawpa. Inchhûng ka luh pui chuan a putea te chu an lo mu tawh tih hriat takin an reh ṭhiap mai.

A room lam ka hre sa bawka thâwm dim tak chuan luhpuiin a khumah chuan ka mut tira, a room aṭang chuan hmeichhe in vawng fel tak a ni tih ka hre nghal mai. 

Kal mai ka tum lai chuan ka kutah rawn manin ka in rin hma chuan amah bawh chuan ka tlu zui rawka, hnai zetah kan in ta ran mai. A mitmeng chu a zahawm ru riau lehnghâl, en rei duh lovin ka awmsawn dawna min kherh bet nghal vat.

“Nono min thlah teh” a lu thing nak nakin khumah chuan min lehthala, ka hauh vak dâwn leh a putea te rawn harhin a thawh hunah an hauh ka hlau bawk nên ka ti lutuk ngam silo, rawn kûn hniamin ka hmuiah chuan a fâwp ngawng ngawnga.

“U Sawmpui ka duh takzet che” ti leh sapin min fawh zawma, ka taksa chu a zût kual dan dana. Mipa ka ni bawk a, insûm a har ngei mai. Ka duh vâng ni em em lovin hnuailam chu a rawn che ṭual ṭual a, thaw hawkin insum thei tawhlo chuan lehthalin ka fawp nghal tawn tawn bawk.

A nilah a phûr zâwk emaw ni ka samah chuan ṭhamin ka tih ang ang chuan a awma, a nghâwngah chuan fawh sakin a hnute chu ka ṭhâm sak tawn tawn bawk, min dan a tum hauh lo. A rui bawk nên a mu zawi ngiaia, a ruih ngaihtuahin a mitmeng a fim kar reuh lehnghâl.

A kawrfual ka hlim chho a,  amal var haih pawh ka hmuh hmaihlo. Rum hakin amah bawk chu ka fâwp leha, a panty phelh ka tum rual chuan harh chhuak zawkin a lak aṭang chuan ka awmsawn dawrha, eng thil nge ka tih tâk mai.

Keihian hmeichhe zurui khawih ka tum a maw? Ka lu thing nawk nawkin ka in ngaihtuah fim vata, Nono-i ka en leh chu min lo la en kar mai, min duh avânga ka tâna engkim phal tu hi ka khawih chhe theilo. Tin ka nau a ni bawk, puan chu sin ṭhat tirin “Muhil rawh” tiin ka chhuahsan ta vata.

Ka kap lam la pawng ul chu beng daih tumin pâwn thlifîm chu ka hip vang vanga. Engvanga khatianga che mai nge ka nih? Kei hian ka duhlo a ni lo'm ni? Mahse engvanga hnar thei silo nge ka nih le?

Rilru buai zet chuan thaw chhuak hawkin a chunga thil ṭha lo ka tih teuh zia chu ka ngaihtuaha, engmah a hriat tawh loh hrâm ka beisei. Ka fâwp tih a hriat chuan beiseina a hma ai nasa in a nei dâwn tih ka hria..

NONO-I POV..

“Ka lu a na lutuk” ka in dawm kûn ngara, khumah chuan ka ṭhu tûm luau mai, ka luak lah chu a chhuak ut ut lehnghâl. Nizân thil thleng ka ngaihtuaha, beer ka in thleng bak ka hre mu mal thei tawh lo, tunge min thlah ang. Ka room ka thlen lai pawh ka hre der silo.

Ka intuai vak vaka Rinsanga kha nge min thlah ni ang? Engmah lah chu ka hre tawh der silo, thawk la ham hamin room aṭang chuan ka chhuaka. “Bawihi nizân kha i va rawn haw hma ve, in reilo em ni? I putea nên kan lo mu tawha, tunge rawn thlah che kha?” a tihchuan ka chhâng theilo.

Tunge ni ang tih ka hre miau siloa “Nia ka awm rei peih lova, pite thei thûr in tur hi a awm em? Nizânah khân tlêm beer ka ina, ka lu a na lutuk” min hau dâwn lo tih ka hriat avângin ka hrilh tlang tawpa, a rawn hawi nghal vat mai.

“Fridge ah a awm kha, in nawn tawh suh aw. A ṭha lo emai, i putea ten a hria a nge, vawikhat mah in tawh suh aw” a rawn tihchuan ka bu nghauh nghauh a, in nawn ka tum tawh lo. 

Fridge a nimbu tui awm sa chu ka in nghâl khawlh khawlha, nizân thil lah chu ka ngaihtuah char chara. Hriatchhuah ka nei thei mai silo, chutah ka haw dâwna u Sawmpuia ngei in min thlah tur thu a sawi chu ka ngaihtuah chhuak zawk mai.

A mahin a ni ngei ang min thlah ni, ka nui saka. Engmah ka sawi vak loh hrâm ka beisei, chaw kan ei zui mai avâng chuan engmah ka ngaihtuah zui ta lova.

“Nizan kha ka u in a thlah che tiraw?” college kan pan lai chuan Tepuii chuan a rawn ti a, a hmêlah chuan nuihza hmêl a la lang zui. Eng chu hria nimaw? “Tinge?” ka tihchuan a rawn nui haka.

“A rawn lêt kha maw a nghawngah love bite a rawn awma, a bialnu nên pawh an in hauh phah a lawm. Ehe! Nang pawh chu” tiin ka nghâwng chu a rawn en hnaia “Enge ni ta?” ti a ka lo en lai chuan a rawn nui vur vura.

“I nghâwngah pawh a awm, enge in tih? In mu dûn em ni?” a rawn tihchuan ka meng phâwk ngei mai “Enge chutiang engmah kan tilo, nilo kan chesual lovang” tiin ka lu chu ka dawma, chutia Tepuiin thil a rawn sawi tâkah chuan hriat chhuah ka nei, u Sawmpuia ka fâwp tih chu ka hrechhuak a.

Ka au nghâl vaka,“Ka fâwp ka hrechhuak, i u ka fawp” ka ti chu a rawn nui haka “Nangmah chiahin i fâwp theilo, i nghâwngah hei chhinchhiahna a awm kulh hi. Ka u rawn lêt leh hmêl kha a buai ka ti reng a ni, a bialnu lah kha a ṭap pur lehnghâl. Mahse nangmah a thlah che tih a hre hauh lova a vânneihthlâk” a tihchuan ka thaw ve huai mai.

“A nih chuan min duh ve tihna a niang a? Min duh ve a ni hrim hrim”tiin ka nui vur vura, min duh lo se chuan min fâwp ve hauh lovang. Eng emaw thleng chu a awm chiang a ni, ka hrechhuak theilo mai pawha,  college kan thlen chuan Rinsanga gate bulah a lo awm leh ran tawh.

Min hmuh rual chuan min rawn panin a nui sanga “Nizan kha thlah che ka tuma, mahse u Sawmpuia khân thlah che a tum tlata” a tihchuan ka nghâwng chu hliah sawk sawkin “Um min ngaihtuah aniang, bâkah ka chhûngte an lo la men chuan an hauh che a hlau a niang, a ni chu putea te nên an in hre ṭha a, keima tân pawh a ṭha zâwk a lawm” ka tihchuan a bu nghata.

“Vawiin chu lunch kan ei dûn leh thei angem?” a rawn ti lehnghâl zata. Ka bu nghat ringawt, u Sawmpuia hmuh hlân mawlh ka nghakhlel, min hnar ṭang ṭang mahse min duh lo hlawm tawp chu a ni bik hauh lo.

Class ah lûtin kan titi zuia, Rinsanga erawh an class lam a pan thung. Mipa ho chuan min lo be leh nak nak tawh mai, star tu ka nei ve nual tih ka hailo, chutih rual erawh in u Sawmpuia aia ka mit la tu mipa an la awm hauh lo, he khua pawh district a an hlân luhna a la reilo a, tlangvâl leh nula chhelo tak tak an awm nual mai.

Class lâk pawh ka phur bawka nuam ka ti ngei mai, a khât tâwkin ka nghâwnga love bite awm chu ka melh leh ṭhin. Lawm loh hian ka nui vur vur a ni ber mai, tukinah khân ka hmu miahlova, putea te pawhin an hmu lo a nih hmêl.

Ka sam a sei bawk nên a hliah a nih ka ring, ka vânnei phian mai. Hmu vaih se chuan zawhna an nei ngei dawna, thil ṭha lo tak ka ti ah an ngai ngei ang le. 

Ka khawih leh ṭhin, a lang chiang em em lehnghâl. Min duh ngailoh thu sawitu sûlhnu ka taksa a awm chu ka hlimpui a ni ber mai.

Ni lêng chuan ka nui ti ila a dik ang, hetianga min tihlim tu hi ka nunah ka la tawn âwm pawh ka hrelo, zânah Tepuiin a Night dâwn lo tih a sawi bawka, lehkha inzir tir paha va lên ka tum nghet bur mai. 

Inah haw in ka inbual fai phawta, lehkha ka zir leh mawlh mawlh tawh. Doctor emaw nurse emaw tal nih ka tum bawk nên lehkha zir kher kher chu tirh luih ka ngâi ngai lo, ka hma hun a tân a ni tih ka hriat avângin lehkha zir hi chu ka tih turah ka ngai, ka chhûngte min rin ang ngeiin ka nung tur a ni tih hi ka ngaihdan ani.

Zânah chuan chaw eikham rual in phur zetin Tepuii te in lam pan chuan ka kala, nizân lama kan awmdân vêl ngaihtuah chuan ka rilru ka sêng leh neuh neuh tawh. Kan infawp tihchu a hriat ngei maia, a bâk enge tih kan neih ang tihchu ka ngaihtuah neuh neuh mai.

U Sawmpuia lah ka zâwt chhuakin ka ring silo “Nu Ṭha ka lo lêng, Tepuii a awm em?” tiin ka au lût lâng lânga, an chhûngkua chuan tv an lo en ṭhap mai. “Lo kal rawh ka awm chiang e, u zanin chu Nono-i nên lehkha min zir tir la, nang Doctor ah thiam loh i nei lo ang tiraw. Science hi chu a har bawk sia” tiin a sawi zung zunga.

Ka lo nui sak thung, u Sawmpuia ka en chu min en duh hauhlo, tv lam chu a melh ngur ngur mai. A va han induh ṭhin tak em “Bawiha i naute chu han zir pui la, zanin chu i âwl zân a nih tho kha. Han kal rawh u, i room-ah zir pui mai rawh” nu Ṭha-i pawh chuan a lo ti vata.

Pa Hriatpuia erawh a lo ngawi reng thung, a tv en lai chu a en tui bawk aniang, a mak ka ti. Nu Ṭha-i ai daihin a nau a nia, chuti chung chuan hei chen an innei theia, pa Hriatpuia ang mipa hi ka duh chi tak. Tam tak an nupuite upat hnua nula naupang zâwk leh tituai nalh zâwk ngaihzâwn hrât an tam em em laiin pa Hriatpuia erawh nu Ṭha-i tân a rinawmin a ngaihsak bawk si, tûnah pawh a kuah leh ran tawh mai.

An nupa in hmangaihna hi a ropui thlâwt, hei vâng hi a niang an fate pawh an felin an rilru a ṭhat em em ni. 

U Sawmpuia pawh peihloh hmêl tak chuan a rawn tho ṭuah ṭuaha, Tepuii erawh ka bul a rawn thleng leh der tawh. Ngawi renga in chung lam pana kal u Sawmpuia chu kan zui chho va “Zanin chu i bulah ka riak dâwn aw, ka haw peih tawh lo” ti sa sa in Tepuii chu ka bia a, a lo bu nghat mai.

U Sawmpuia room-ah chuan in zui lûtin Tepuii erawh a lehkhabu a va la thunga, kan ngawi dûn ran mai. A nghâwng chu hrechhuak zawkin ka ena, a lo duk kalh tak tak, panhnaiin ka en vung vunga, a lo phu zuk lehnghâl.

“Nizanah” ka tih rual chuan ka hmui a rawn hupa “Ngawi mai mai rawh” a rawn ti nghal hluk mai, a mitmeng buai nak ka hmuh chuan ka nuih haka. Hepa hian eng emaw zêp ruk a nei chiang mai “Ka khumah nangmahin em ni min mut? Engmah ka hre tawh miahlo a nia” ka tihchuan a thaw haka.

“Aw, i chhûngte an mu vek tawha ka mut che a tâwk em? Engmah sawi tawh suh” tiin chair ah chuan a ṭhu thla a, a awmdân chu a thinrim vâng a nilo tih ka hre thei. Nidanga min hauh ang a ni hauhlo, eng emaw hlauhthâwn nei ang mai hian ani a awm ni.

“En teh hei hi a lo awm ringawta, mipa hian min khawih emaw ni ka tia, ka rui bawk sia engmah ka hre tawh bawk silo. Tunge hetiang hi siam ang le” tiin ka nghâwng chu ka hmuha, a rawn en nghal vut mai.

A mitmeng chu ka en renga, ka nghâwng chu rawn tuai zauhin “Tireh vat ang che, ka chhûngte i hmuh tir tur a nilo i hria em?” a rawn ti nghal zung zunga, a che buai ru riau chuan ama min siamsak ngei tih min rin ngheh tir tlat lehnghâl.

“Aw le, a nih min duh ve tihna em ni? Nizân ah khan thil dang kan tilo tiraw?” tiin ka en ha a, “Tilo, ka duh ve lo che. Ka thil in vâng mai mai a nih kha, engmah min zâwt tawh suh. Thil dang a awm lo” ka chhân leh hma chuan Tepuii a rawn luh avângin ka nghâwng chu ka sam chuan a rawn khuh sawk sawk a, a ma hmuh tih ka sawi duhlo.

Tepuiin a hmu tih a hriat chuan hei ai a talbuai dâwn chiang sa, hepa hi a zakzum ru hle tih ka hailo. A awmdân zawng zawng hian a ti chiang hle bawk, a lai kual awmdân vêl chu ka lâwm riau lehnghâl.

Lehkha chu inzirtir mawlh mawlhin a chawh chi ho chu kan zâwt a, science ah leh zêl chawh tur awm hi chu ka ning ṭhin. Math ka lâk peih loh chhan ani bawk, math hi chu ka ning thlâwt a ni, ka thluak hi an ti â vek zel. High school nih lai phei kha chuan awm lo tawp mahse pawi ka ti ṭhak lo.

Tepuii nên chuan thu awih zetin kan ngaithla kara, lehkha zir lai hi chuan lo bengchhen ve chhên kha kan ti ngai lêm lo. A ni pawh hlawhtlin a tum bawka a zir ngawrh ve viau mai, u Sawmpuia hmêl chu ka lo en leh vêng vêng ṭhin. Ka hmuh ngun pauh leh hmêlṭha ka ti tawlh ṭawlh mai.

A mit hmul buk deuh laih te, a hmui phîr ṭhaih leh a mitmeng fiah kek kâwk te, a hnar ngul sâng vah te chuan Mizo pawh a ti ang lo lek lek mai. Mizo pawh tûnah chuan hmêlṭha tak tak, hnamdang ang lek lek kan tam tawha, chûng zîngah chuan u Sawmpuia pawh hi a tel ngei ang le.

Ka lo en vêng vêng lai chuan Tepuii chuan min rawn nghawk zauha, ka harh chhuah meuh chuan u Sawmpuia nên chuan min lo en reng mai “Enge a?” ti a ka zawh rual chuan u Sawmpuia chu a thaw haka “I hrethiam em? A ti, enge i lo ngaihtuah? Ngaithla ṭha ve ta che” tiin a rawn phun hlak hlaka.

U Sawmpuia erawhin engtin mah min ti lêm lo, a sawi leh mawlh mawlha. “Ka mut a chhuak tawh, ka lo va mu ang. Nakinah lo mu ve mai rawh, u ka kal aw tikhan Nono-i nên khân lo zir mai rawh u, keichu ka thiam tawh” tiin a tho chhuak zuia.

Room aṭanga a chhuah rual chuan a reh nghâl tlawk tlawk mai, u Sawmpuia pawhin engmah a sawi leh tawh rihlo, kan ngawi dûn ren râwn a “Hriatthiam loh ila nei em?” a tihchuan ka harh chhuak zawka, a phek dang chu keuin ka kâwk zauh zauha.

Rin ang ngeiin a ni lehkha zir sâng tawh leh Doctor meuh chuan a lo thiam takzet e. Ka ngaithla kara, ka hriatthiam theih dân tur a sawi lah chu a thiam phian lehnghâl, zirtirtu ni ta se a zirlaite an thiam thei viauin ka ring.

A sawi mawlh mawlh lai chuan a nghâwng bawk chu ka lo khawih saka, a thil sawi lai chu a tâwp chat mai. Min rawn enin ka kut chu a hum beta “Enge tih i tum? Ka sawi tawh kha, nizân avâng khân beiseina nei hauh suh” a tihchuan ka thaw haka.

“Beiseina chu ka nei sa reng tawh zâwk a lawm, nizân avâng chauhin maw? Nizân thil thleng engmah ka hrelo ka tih tawh kha, beidawn san che ka tumlo. Ka duh mai mai lo che, theih phei se chuan i nupui nih nghal ka duh, ei rawngbawl pawh ka thiam vek tawh” tiin ka kut chuan love sign siamin alamah ka chhêm pheia, a lo chhêm sawn hmak a nih chu!

A va han sual thiam chiang tak em, nui vur vurin amah chu ka hnaiha “Nizanah khân ka khumah thil eng emaw chu i ti tiraw?” ka thusawi avâng chuan a ip chawih mai, hepa hi a va mak tak. Enga tinge a laih ṭut ṭut ni? 

“Eh! A lâi vêl, i va han nuihzatthlâk tak, khatiang mai mai a vângin i lai a maw? Awi u Sawmpui, i pa chiah lo em ni?” ka ti chu a lâwm lo tih hriat takin min melh rûn rûn mai “Ka pa leh pa loh fiah turin min nawr suh, va mu rawh i zir peih tawh lo a nih kha” a tihchuan ka nui haka..

“I bulah ka riak duh ti ta ila engtin nge min tih ang? Ka duh riau mai che, i bulah ka mu ang aw?” tiin ka nuih ver vera, a in her nghal vut mai “Phei vat mai rawh, vawikhat mah hetah rawn kal tawh suh” a tinghal hluka, ka ngai haw duh lêm lo. Enge maw a induh viau ni..

“Ka lo kal zêl ang, hmu lo che in ka awm rei thei hleinem ka duh êm êm pa” ti a nui hak hakin kawngka lam chu ka pana “A nih leh muttui aw ka bialpa hual hmêlṭha” tiin ka chhuahsan zuia.

Ka nui phei vur vur mai, alai hmêl kha ka mitthla aṭangin a bo mai mai dawn lo tih ka hria, a duhawm em em mai lehnghâl. 

Tepuii room ka thlen chuan a lo mu fel der tawha, ka lehkhabu chu dahin ka mu ve nghâl thak mai. Min rawn kuah pah hian “Ka u nên chuan enge in chanchin?” tiin an rawn meng chhuaka, a hmêlah pawh kan awmdân mawlh a hre châk tih ka hria.

“Nizan thil thleng kha ka hre tawh miahlova, chutih rual erawhin hria ang maia ka fiam khân a lâi vel mawle, u Sawmpuia hi rinai in hetiang lamah hian a lâi hma em ni?” ka tihchuan a rawn nui chhuak haka.

“Bialnu a nei ngai hleinem, a laih nak lohah. Ka nuten an fiam pawh hian a lâi ziah a lawm, ka u hi chu rorum viau e tilo hian in ngaihzâwnna lamah hi chuan a la naupang chhia ka timai. Lehkha a zir ngar ngar avâng khân ngaihzâwng lam hi a ngaihsak ngai miah lova, a âwm ve tho mai” tiin a phun niah niaha.

Ka rindan tâwk vêl a ni, a awmdân ka ngaihtuah lêt khân mipa zei tak chu anilo, mahsela in fawh erawh  chu an thiam leh viau si, mipa ho hi chu helamah hi chuan zirtir an ngai vak lo a nih dâwn hi, Tepuii ka en chu a lo muhil leh der tawh mai.

Kan riak dûn fova, mutthilh harsat hian a awm ve ngailo, kei erawh ka muhil thei mai ṭhin lo. Mut chhuak em em si hian min mawlh tu a awm ka timai, ka muhil mai thei ngailo. Ka tui a hâl bawk nên tui in turin ka chhuak leh riha.

Inhnuai ka pan lai chuan thâwm ka hre bawk nên ka ṭi deuh du mai, rilruah thlahrang ka ngaihthlâk a mi mi chaw ṭhing ei rûk hmang tihchu ka la ngaihtuah zuia. Thinphu dep depa ka awm lai chuan chokaah chuan mipa ruangâm ka hmu zuia, ka thaw huai mai, u Sawmpuia lek chu lo niin.

Muangchang chuan ka pan pheia “Enge i rawn tih dâwn?” a tihchuan chhâng lêm lo chuan ka hnaiha “Hei tui ka in dâwn? I thawh avângin ka rawn tho hauh lo a nia, i tho chhuak tih pawh ka hrelo hrim hrim ” tiin ka nui haka.

“Taka i nghâwng kha keima siam tiraw?” pan hnai sauh sauhin a nghâwng chu ka tawk leh zauha, a lo phu zuk lehnghâl. Nui ver verin ka kuaha “In ngai zâwng ve tawh mai ang, ka nghâk rei tawh lutuk che. Kum 5 chhûng ka nghâk tawh che a nia, tûnah phei chuan ka star tirh ang che nilo in kum ka tling tawh, min duh ve tawh rawh” tiin dingdihlip in a nghâwngah chuan ka fawhsaka.

A thaw haka, min namsawn a tum chu a taksaah ka zuang kai nghal nawlh mai. Chiang zet chuan a hmalam aṭangin ka ena “Nizan a mi kha i bialnu a nilo tiraw? Min hrilh rawh u Sawmpui, i bialnu a nih loh thu sawi hrâm rawh” beiseina nên chuan ka ena, engmah a sawi duh bawk silo.

A mah chu kuahin a dârah chuan ka lu ka nghata “Han mu rawh, ka dahthlak hma che hian chhuk bawk la” tiin min namsawna, ka tilui tawh êm bik lo. Nu Ṭha-i te an lo harh palh chuan kan buai mai mai, chutiang tawh ka duh bik lo.

“Mutui aw ka duh pa, ka duh lutuk che” tiin room lam chu ka pan chho hnak hnaka, ka ta ni tawh se ka ti takzet, mahsela a thlen hun tur ka hre der silo.

Room chhûnga ka luh rualin ṭhutthlengah chuan ka ṭhu thla hnaka, hetia ka duh ber neih theih nâna hmeichhe zaktheilo ber anga awm hi hrehawm ka ti ve tho, mahsela kan duh neih theih nân chuan beidawn a thiang lo tih hi ka lo hre ve tawh bawk nên ka theilo a ni ber mai.

He ka beidawn duhlohna hian engtikah emaw chuan min la hlawhtlin tir ve mai thei a sin tih hi ka beisei tlata, ka beidawng thiang lo tih hi ka infuihna tam ber a ni bawk.

Engvanga ka duh tih hre renga min hnar ṭang ṭang reng nge a nih ka hreloa, min duh lo viau nge ni dâwn ni. Mahse ka ta ni turin ka duh miau si a, ka beiseina meichher hi ka ti mit theilo a ni. 

Midang ta ni turin ka phal bik der silo, ka naupanna a sawi kha ka pawma, mahse he naupang thinlûng pawh hian duh a nei thei ve miau si a.

Rilru hah zet chuan ka thaw leh hak ṭhin, alakah min hnarna avânga ka na hmêl ti lang ngailo mah ila keimaha ka awm chiah hian hnâwl nih natna khân min rawn chenchilh ṭhin a, chu chuan mittui ko chhuakin a hriat miahloha ṭah châng lah ka ngah

“Malsawmpui i sual hle mai, nangmah duhtu hetia hrehawm taka siam reng hi nuam i ti em ni?” tiin ka phun sep sepa, khumah chuan let kual let kual in a tâwpah chuan ka muhil thei ta hrâma.