CHAPTER 4

MALSAWMPUIA

CHAPTER 4

“Morning u Sawmpui” a zîng tho phang hmêl pawh a ṭha tho mai, thingpui in pah chuan ka lo nuih var vara, mahse min nuih lêt ve hauh lo. A ngawi rûn a, nu Ṭha-i thingpui lo pêk chu la in min hlat deuh takah hian a ṭhu daih lehnghâl, ka ner ru sak sak mai.

“Vawiin chu Rinsanga ei pui tawh lo ang aw, i nihpui peih chuang silo, a khawngaih thlâk, a hmêl hmuh pawh ka hreh vek tawh a nia. I duh lo ropui sia a nghah rei che nên” Tepuii thu rawn sawi chu ava hun lo tak, mi in lâk fel ve em em tawh laia.

“Eng maw bawihte, Nono-i chuan duhtu a nei tihna em ni?” nu Ṭha-i lah chuan a rawn tinghal vat renga, u Sawmpuia ka en chu ngawi reng hian a thingpui a bih ngur ngur mai.

“Nei chiang e, kan college a mipa hmêlṭha leh chhelo ber. Fing bera an thlan mawle, Nono-i hi a bem ṭhina, a ni lah hian a chhâng duh siloa ka khawngaih a nia aw. Nitin a rawn bia a, lunch eipuiah a sâwm ve ṭang ṭang a, henu lah hian tirh kual atân leh thil leisak tur bakin a duh der silo” a tichu ka sik ṭawk a.

“I ṭawng thei lutuk, tirh atân ka hmang reng reng lo, a mahin ka lo kal ang a ti zêl a nih kha, bâkah ka duh miau loh chuan a duh luih theih hleinem tiraw nu” tiin ka lo sawi nghal zat zata, nu Ṭha-i pawh a rawn bu nghat nghat mai.

“Nonoi chu a hmêlṭha a, a fel bawk nên luck tur a lâwm a nih, nang te chu i bialpa zâwk i sual ut ut zel a nia” a tichu Tepuii a lo ner nasa mai.

“Nonoi chu a fela, a rilru te hi a ṭha bawk nen tu mipa in nge hnar phal ang ni” a tih lai chuan “U Sawmpuia hian min la hnar ṭang ṭang ania aw, a sual zia hi. Ka fel tehlul nên” zak map lo chuan ka lo ti a, pakhatpa chu a ner nghal sawk mai.

Nu Ṭha-i leh Tepuii chu an nui nghal hawk hawka, pa Hriatpuia pawh chuti tho “I u Sawmpuia a sual tehlul nên i duh duha, duh tlak pawh a nih loh hi. A â bawk si, midang star san daih mai rawh” pa Hriatpuian a rawn ti chu ka lu ka thing nar nara.

“Teuhlo, bei la bei nawn rawh an tih kha, pa u Sawmpuia chuan min la duh dâwn chauh a lawm. I fapa bâk hi hmêlṭha tih ka neiloa, zaklo deuhin ka sawi a nih chu” ka tileh chu an nui nasa ngei mai. U Sawmpuia erawhin rum zetin min rawn en thunga.

“Ngawi mai mai rawh” a rawn tihluka “Ka sawi dik lo em ni? Min duh lo mahla keichuan ka duh che a, ka duh leh duh loh che ah thu i neilo, ka duh zêl ang che” tiin ka hmui chu ka tipawrh khera, midang chuan nuihzatah an la vek tawh tih a hriat.

“Lalnunpui” a rawn tih ṭhat rual chuan “Eihah pa a” mengrum tawh tak a ni. Nu Ṭha-i te pathum lah an lo nui char char tawh, u Sawmpuia chu tho daihin a room lamah a chho leh daiha.

“I u Sawmpuia hi chu i ti thinrim thiam ngawt mai, kei niin kan ti thinrim thei lo a nia, nang i awm chuan rei pawh nghah a ngai lo a thinrim reng mai a nih hi maw? A hrim hrimin i u Sawmpuia chu i nghâk sêng dâwn em ni? Bialnu neih hi a hlau teh a nia” nu Ṭha-in nui har hara a rawn tihchuan ka nui ve haka.

“Nu Ṭha keiai u daih ka duh hi zaklo min ti em? Mahse maw u Sawmpuia chu ka hmuh tirh aṭang khân min ti danglam veka, hetah pawh a mah avânga lo kal ka nia, ka zêp peihlo. In hre tho tho, mahse min duh lêt ve lo a nih reng chuan keipawhin ka ti buai tawh miah lo ang; ka inthiar fihlim tawh tak tak ang” ka tihchuan pa Hriatpuia zâwk chuan a aw a rawn thian kharha.

“Mai maia kan fapa a nihna avângin kan hauh buh lêm lo a nia, duh neih chu a thiang a lawm. Nula in ni tawha, in naupang tawh hauh lo, i u Sawmpuia pawh i duh thei a lawm, keini thunun phâk a ni love. Mihring nih phung ang rêngin duh i nei ve a nimaia, kan duh kan neih theih nân chuan nghah ngar ngar mai tur, keipawh hei keiai u daih ka neia, ka nghâk rei a sin, min tihtauh rei san em em lehnghâl, ka nghah peih man chu hei tûnah chuan ka nupui a nih tâk kûk hi” a ti kher erawh Tepuii nên kan nui nasa mai.

“Taitaii nên kan in ngaihzawn lai te chu maw a châng leh pasal dang min neih san a tum thul, Mumbai lam aṭangin ka thlawh haw vawk vawk phaha, ka inkhelh tûr tam tak ka ṭhulh phahna a nih ve hi maw” tiin a rawn nui huk huka.

“Nangmah a nih kha a, hmeichhe pakhat nên a tlanbo dûn a, kei min rawn ngaihsak miah lo tu chu. Ka ngaihtuah lêt ringawt pawh hian ka la thinrim, saw ṭhenawm lawka nuthlawi nita Ruthi nên sâwn a nia an zuk awm dun ker kawr ni. Tûn thleng ka huat phaha, ka la ngeih thei der lo, i mit te khân i lo melh ange, ka upa tawha. I lerh a nih vaih chuan” ti a nu Ṭha-i phun tui tur chu pa Hriatpuia chuan a hmuiah a va hupa, a kuah nghâl hlu hlu bawk.

A sawi ang rêngin hmeichhia chu kan tar chak an tih bâkah nu Ṭha-i chu a upa zawk a ni bawka a lang tar lam tawha, chutih rual erawhin a in enkawl ṭha bawka a la hrisêl viau thung. Pa Hriatpuia erawh a la naupan hmêl lutuk tlat, “Chutiang sawi suh ka tihkha, ka neih hma che in ka ngaihtuah lâwk vek tawha, hei chen kan thleng a nih hi, ka nupui hi ka mitah chuan i la mawi ber tho tho a nia. I nalh ngaiin i la nalha, i hmêlṭhatna pawh a la ngai tih hi i theihnghilh em ni? Harsa taka ka neih hi awlsam taka ṭhen mai mai ka tum hleinem che, bâkah fapa leh fanu nula leh tlangvâl ṭhuau mai kan neih tawh hi, lerh turin ka hriselna pawhin a tlin lo” a ti duah chu Tepuii nên kan lo in men kual khum ralh ralha.

Ni e, hei chen an innei tawha. Ka awm chhûng ringawt pawh hian an in hmangaihzia leh thlakhlelhzia hi ka hmuh hmaih biklo, u Sawmpuia nên hetianga nupa in hmangaih tak nih ve hi ka châka, ka suangtuah ber a ni, a ni lahin min haw bur bawk si.

Chutia ngawi renga kan lo ṭhut ṭhap lai chuan u Sawmpuia chu tshirt dum ha in jeans kekawr pâwl tak ngak mai ha hian a rawn chhuka, ka lo en reng. A pian nalh zet leh a hmêlṭha lutuk nên chuan a va in hmeh tak.

“Nu ka kal dawn a nia, damdawiinah zîng chaw chu ka ei nghal mai ang. Ka kal nghal mai ange” tiin nu Ṭha-i chu a rawn bia a, ani pawhin a lo aw ve mai. A kal liam tur chu ka thlir vang vanga, Tepuiin min dawn nghawk sawk tâkah chuan in siamṭha in ka inchul mâm thuak thuaka.

“Nu keipawh ka haw phei tawh ange, pitei rawngbawl te puih a ngai ang. Ka awm loh rei lutuk chuan min lo hau leh hlauh ange, an phun âng ka ngaithla peih miah lo a nia” tiin ka nui hak haka.

“Hetah chaw ei ve mai la, i ṭhiannu nên hian heta ṭangin in kal nghal mai dâwn a lawm” an tihchu hnial vatin room lamah ka chho a, ka lehkhabu chu la in nu Ṭha-i te chu ka mangṭha zuia. Pâwn ka chhuah rual chian ka thaw huai mai, thui vak lo ka kal hnuah kha nu hmân zâna u Sawmpuia tlin lawmna a rawn tel ve nu leh u Sawmpuia mi hmuh hlaua lo awm dûn chu ka hmu chiang viau mai.

Ka en renga, tumah vâk chhuak an la awm lo nângin an fimkhur hle tih a hriat. An la inkuah chial zui, thik zet chuan ka en reng a, bialnu chu a nei tak tak a nih hmêl. Rami an tih nu lah chu a hlim tih hriat takin u Sawmpuia chu a nuih ver vera, ka inhum ruh ṭawlh ṭawlh mai.

Thawk la ham hamin ka phei chhat chhata, ka hmuh lai kher a hmeichhe dang pan a ṭul miah lo a sin le. Ka thâwm an hriat tâk vâng nge rawn hawi chhuak vatin u Sawmpuian min rawn hmu chu a meng deuh kâwk mai, hmulo ang mai chuan awmin hmundang ka melh san daiha.

Ka rilru na erawh tih lan loh hrâm hrâm ka tum thung, tinge sawtiang mitmenga min en. En rei duh lovin ka kal pêl daiha, kumkhat pawh tling tawh lovin helaiah hian ka awm tawh dâwn a. Chumi hnuah chuan tibuai tawh lo leh hmu leh tawh ngai lo turin ka haw vang vang ang chu, ka hmangaih tawh bawk hek lo ang.

Kal pêlin hmalam chu ka melh ngar ngara,ka rilru a tina tlat, min duh lo tih hre reng mah ila ka hmuh laia hmeichhe dang a awm pui ṭhin hian min thik tir ve tho bawk sia, in lam pan chuan muangchangin ka pên chhet chheta.

A châng chuan bânsan tawh mai ka duh ṭhin, kum nga chhûng ka bawhzui tawha. Phone ah nên lam ka duhzia ka lan tir âwl lo, dik tak chuan duhtu leh bemtu pawh tam tak ka nei ve, mahse amah bakin ka rilru an luah thei mawlh silo. Min duhtu duh lêt pawh tum ila amah ka duh tlat tawh na hian min dang tlat si.

“Ilo haw tawh maw? I u Sawmpuia hi tibuai reng suh ka tih kha, hmeichhia zawk i nia a mawilo, miin an sawi sep sep tawh che a nia” piteiin a rawn tihchuan ka thaw haka “Pite amak mi chuan englai pawhin sawi tûr an hria alawm, mi pawi ka sawi emaw zahpuiawm leh mawilo lutukin ka awm pawh an niloa, i mak emai. An duh duh sawi sela, ka duh a nimaia, a sual viau em ni” lâwm lo zet chuan ka ena.

Pitei mah nise mi a hau fo bawk nen ka ngei lek lek zel, zahpuiawm khawp leh mawilo lutuka ka awm anihchuan min hau pawh nise ka haw lovang; mahse midangten chuti chuan an ti che a tireng hi ka ning ve ṭhin.

Tûnah ngat phei chuan u Sawmpuia avângin ka rilru a na em em a, ka mood off a tizual. “A dik chiah, nu i nang pawh hi nula an nia, hmeichhia an nih avângin duh an neilo bîk tur a ni hleinem. A sawiseltu fate pawh kan hriatchian khawp hi maw, in duhna mai maiah chuan hau ṭhin lo teh, kan naute neih chhun a nih tawh hi” putean a rawn tihchuan ka nuih nghâl var var mai.

“Pute i ṭha ber” tiin ka room lam chu ka pana, kumin chiah helaiah hian ka awm tawh dâwn a. Aizawl ka lêt ve leh bengalore lamah Doctor zirin ka awm tawh ang, ka nu leh pa bulah pawh ka sawi tawh miaua.

Doctor ka nih theih tâk loh pawhin a pawi chuang lo, hnadang ka la zawng thei tho va. U Sawmpuia leh khanu Rami ringawt lah kha ka mitthla ah an chama, an in kuah mai mai tih hre mah ila ka thik lo thei silo,ka haw takzet.

Kum nga chhûng ka ûm zuia, naupang min tiin min hnar ngar ngara, hmeichhe dang a hnar leh thei tawp silo. Khanu pawh kha keiai a upatna a tam hauh lovang le, thinrim ṭûn chung chuan ka insiam mawlh mawlha.

Room aṭanga ka chhuah chuan chaw ei an lo siam leh thlap tawha, ka va pui ve vat. Awmpui nei mah ila pitei hian awm âwl mai mai phal hek lo le, chaw chu ei zung zungin ka chhuak zuia.

Engdang mah ngaihtuah lo chuan ka hmalam ngawt chu ka ena, ka rilru na lutuk chu ka thaw leh hak ṭhin. Thawk leh khatah bike hi chak zet hian a rawn tlân a, ka awmsawn hman tawh lo ka taksa chu ana nghal vawng vawnga.

Mihring phun mar mar leh au luai luaite chu hre mah ila mengchhuak turin chakna ka nei tawh lo, kei hi ka thi dâwn em ni?

“A ṭha leh vat mai ang, a kut erawh a vei lam bâk a hmang thei rih dawn lo” chu mipa ṭawng ri chu ka hailo, “Awi a pawi emai, tukinah ka lo hau vaka. Lo hau lo tur ka ni a sin, keima thiam loh vek a ni” piteiin a ti ri pawh.

Muangchang chuan ka mitmengin ka hawi kuala, pitei leh putea bâkah pa Hriatpuia te chu an lo awm vek mai. Ka harh tih an hriat rual chuan pitei leh Tepuii chuan min rawn hnaih vata “I ṭha em? Min ti mangang lutuk, tinge kawngpui lai takah te i kal?” pitei chuan a rawn ti mawlh mawlh a.

Ka nuih ringawt, u Sawmpuia ka en chu mitmeng hriatthiam har zet hian min ena, a hmêlah chuan engmah a lang lo. Chutah a bialnu nêna an awmdân ka ngaihtuah chhuah leh avâng chuan hmun dang ka hawi zui daiha, ka hua a ni. Ka haw takzet, tûnah chuan ka ti buai mai mai tawh bik lovang.

“Ka ṭha, bike kha a rawn tlân chak lutuka” ka tih lai chuan kawngkhâr chu rawn inhawng in mipa hmêlṭha deuh tak hi a rawn lût a, a hmêl aṭang chuan u Sawmpuia nên an in rual vêlin ka ring “I ṭha maw? Ka nau avângin hetiang thil a thleng hi a pawi hle mai” a rawn tihchuan a ngaihna hrelo tak hian midang chu ka ena.

“A sutu che kha a nau a nia, chuan i damdawiin awm man hi an tum vek dâwn a” pitei chuan ka bengbulah chuan a rawn ti ta sa sa a, “Oh! A thiam loh pawh a ni hleinem, keimah kha ka lo in ngaihtuah nasa lutuka kawng enna châng ka hriat loh vâng zâwk a nia, in thiam lohna a awm lo rêng rêng” tiin ka lo nuih var vara.

A rawn nui ve suk mai, u Sawmpuia ai chuan a hniam zâwk nângin a hmêl erawh ṭha ve tak chu ani. “I felin i hmêl pawh a ṭha a nih hi, i dam leh vat turah ngai ila, i number min pe thei angem? Lo lên zel te pawh ka duh dâwn a, ṭhian kan ni nghal mai ang chu tiraw?” a tihchuan ka bu ve nghata, ka number chu ka sawi ve mai bawk.

Misual tak a nih chu ka ring lo ve tawp, a mah a hmêl aṭang hrim hrim hian ka ngainat chi tak a ni. Midang awm ve te pawh chu a ngai pawimawh vak lo tih a hriat, ka bulah rawn ṭhu in “Ṭhian kan ni ta bawka, i hming hriat ve chu ka phu in ka hria, kei erawh Lalhlimpuia ka nia, i duh chuan u Hlimpui emaw, Hlimpui tawp pawh min ti thei ang” tiin a nui sâng renga.

“Lalnunpuii ka nia, Nono min ti mai dawn a nia” tiin a kut chu ka vawn lêt saka. A hmêl aṭangin a sual dâwn lo tih ka hria, ka nêl nghâl sarh mai.

“Ka kal phawt ange aw ka hnaah ka kîr leh a ngai tawh si a, zânah ka lo kan leh ang che” tiin a mit chu min siai saka, ka nui lo theilo.

A chhuah hnu chuan ka chhûngte ho lah chuan min la fiam nghal zuia “A fel hle mai, mâkpa atân pawh a iai awm hauh lo a nia, Police officer a nih kha. An chhûngkua pawh an awm thei, a nau kha duh chuan Court ah kalin thiam an chang daih theia, mahse chutiang tilovin tikhan i damdawiin awm man an tum vek dâwn lehnghâl” piteiin a rawn ti chu nu Ṭha-i pawh chuan a rawn zawma.

“A hmêl lah kha a ṭha vang lehnghâl, ka lo la hmu ngai miah lova. Stationah hian kan kal ngai lo bawk nên inhriat loh hi a awl a ni” nu Ṭha-i pawh chuan an lo ti ve mawlh mawlha, u Sawmpuia ka melh zawka, a hmêl lan dân chu a lo thlâk leh vek tawha. A dur khup mai.

“En teh, i nat khân maw ka u pawh hi a hlauthâwng ve mawle. Mahse kha pa tûna rawn lût thar kha a chhelo reuh tawp, nizânah a rawn kal ah khân Police form nên a rawn ni thlapa, a chhelo ka ti ania aw” Tepuii chuan ka bengbulah a rawn ti sar sara,ka nuih ringawt.

“I bialpa bulah ka sawi palh ange aw” ka ti chu a ner nasa mai, Dampuia kha a duh ve viaua. A kalsan phal mai mai erawh ka ring hauh lo thung.“I rawn harh tawh bawka, hna kal kan ngai nên kan haw san rih ang cheu aw, i ṭhiannu erawh a duh leh la awm sela, hei i nat deuh emaw chuan i u Sawmpuia hetah a awm reng dâwna, ko zel mai rawh u aw” pa Hriatpuian a rawn tihchuan ka lo bu nghat nghata.

“U Sawmpuia pawh a la awm ve ta renga, mahse ka haw tlat. Bialnu a nei tawha, ka haw hlur mai, chutih rual erawhin ka hlat tak tak theiin ka ring lo.

“Chaw kan va ei lawk ange aw, nangmah a lo awm i hreh em” piteiin a tihchuan ka lu ka thing nar nara, “Va ei rawh u, ka lo awmpui ang” u Sawmpuian a rawn tih khauh avâng chuan mak tiin ka en ho a, pitei te lah an lawm tih hriat takin an nui var vara.

An chhuak zui diak chu u Sawmpuia nên chuan kan ngawi dûn rauh rauha, tûnah mai chuan biak dân tur ka hre bik lo. Bâkah ka ngei laklawh ka tih kha, ka duh tih a hre renga ka hmuh leh hriat ngeia hmeichhe dang a nih pui hi ka lâwm thei miahlo.

“I bân chu a na viau em?” a rawn tihchuan ka bân an cher khawng chu ka melh zawka “Na lo e” ka ti ringawt chu a rum reuh nghata. “Fimkhur tawh ang che, i nunna i chân teuh zia kha i hria em? Vawikhat mah kalna en lovin awm tawh suh” a rawn ti chu ka melh zawka.

“Ka thih te chuan i hlim zâwk ang chu, a duh che avânga zar buai phêt tu che an awm tawh lo anga, i nin” ka sawi zo hman lo rang lutuka ka hmui rawn hupin rum zet hian min ena.

“Khatiang thu kha sawi tawh hauh suh, thihna hi uanpui chi a nilo tih i hria em?” a rawn tihluka, a kut chu ka paih sawna “Khanu kha tunge? I bialnu chu tiraw? Min hnara keiai kuma upa lutuk lo i nih pui leha, min duh lo a nihchuan chiang deuhin sawi la ka ti buai leh tawh lovang che. Kum nga chhûng ka ûmzui che a, nang hian min tihnat leh ṭawngkam na tak taka min biak hi nuam i ti tih ka hria alawm, chiang deuhin min hrilh rawh” tihmakin ka ena.

A ngawi reng chu ka lâwm miah lo “Min hrilh ta che, i duhzâwng ka ni ngang lo em ni? Tûn bâk engmah i lak aṭangin ka beisei tawh lovang” tiin ka en kara, min chhâng ngei sela ka duh, chumi a zirin tihbuai tawh loh ka tum tlat bawk.

“Aw ka bialnu a nuh kha, i ti dik e ka duh thei lo che a ni, ka tân chuan ka nau i ni a. I ni reng bawk ang” a tihchuan ka nui ta haka, “A ṭha e, tûn aṭang chuan ka ûmzui tawh lovang che a, ka duhthu che pawh vawikhat mah ka sawi leh tawh lovang. I zalên tawh e, keimah aṭang chuan buaina i nei tawh lovang” tiin hmun dang chu ka en san ta daiha.

Ka thutiam ang hian awm ka tum tak tak bawk, vawikhat mah ka tibuai tawh lovang. Min duh lo tu chu engah nge ka ûmzui reng bik ang, kum nga hi a tâwk viau a ni.

SAWMPUI POV...

Nono-i ka tih dân chu muthmunah ka ngaihtuah renga, engvanga ka awm nuam thei miah lo nge a nih? Ka rilru lah chu ka hnar hnu kha chuan a luah reng lehnghâl, a sawi ang tak takin min umzuiin min chhaih ngai tawh miah lova, ka lak aṭangin a hla vang vang tawh.

Ina a rawn kal pawhin min be tawh ngai heklo, keimah zâwk hi ka awm a nuam tawh hauh lo bawk. Kha officer pa khân zantin a rîmin an lêng dûn ṭhin tihte chenin ka hria a, keimahah danglam a awm chiang a ni.

Ka lak aṭanga a inthiar fihlim chiah hian chu thil chu ka hrechiang hle bawk. Ka thaw leh hak ṭhin, keiaia naupang fe avângin ka rilru a buai ta map mai, a hmêlṭha bawka duhtu a nei ṭha thei hle tih ka hria.

Thawk lak hawk pah chuan ka in ngaihtuah vang vanga, keihian ka duh ve tawh em ni? Chu zawhna chu vawitam ka in zâwt tawh, kha officer pa nêna an in phur chhuak ka hmuh ringawt pawh khân ka thik tih keimah ngei pawhin ka zêp theilo a nih kha.

Ka nu leh pa lahin engmah hre ve heklo, Rami bulah palai tirh ngawt mai an ngaihtuah tawh lehnghâl, kei erawhin nupui neih ka la tum lo hrim hrim. Rami pawh Nonoi hnar nâna ka hman mai mai kha a nia, mahse tûnah ka hnar tum berin min hlat tâkah chuam ka awm thiam leh chuang silo.

Ka in leh ka in leh tâkah chuan reiloteah ka muhil ve ta hrama, zîngah peih lo zeta tho chhuakin ka intifaia.

Inhnuaia ka chhuh chuan ka nau chu a lo ṭawng leh zat zat tawh mai “Nonoi pawh Doctor zir a tuma, keipawh ka duh ve. Kan pahniha tih dun zel kan duh,  result a rawn chhuak ṭep tawha, reilote bâk kan awm tawh dâwn loa, nu phal rawh u aw” a tihchuan ka ṭhen suka.

Ṭhian inkâwm fuh tak chu an ni, engkim an ti dûn hi a ni hawt mai. An bulah chuan va ṭhu pheiin thingpui chu ka bana. “U, Nono-i a haw tawh dâwn tih i hria em? I sual hi ka ti, helai thleng thleng a rawn ûmzui che a, hetianga i awm khum reng hi keimah pawhin ka haw ṭep che” a tihchuan ka nu zâwk chuan a lo khap vata.

“Kan duh zawng zawng kan nei lêt thei kher lo, Nono-i pawh a la naupanga i û tân hian a nau zia te hre ve la, puitling lo lutuk ngaihzâwn chu a buaithlâk a nia. Nono-i a sual tihna lam a nilo, duh loh zâwng kan neih chuan duh luih theih loh tih hi hre reng rawh, nangpawh i duh tak tak loh tur lakah beiseina pe miah suh ang che” ka nu chuan a rawn ti a.

Kei erawh ka ngawi reng thung, a haw tawh dâwn a maw? A rawn kîr tawh dâwn lo tih ka hre chiang viau mai, ngawi reng chuan insiamin ka chhuak zuia, a number ka biak ṭhat duh loh avânga ka save duh loh chu hmet chhuakin ka call zuia.

A rawn la duh mai lo lehnghâl, ka call nawn leh tâkah chuan a rawn la ta hrâma. “Aw enge” a rawn ti chu ka ner deuh sak mai.

“In hmu lawk ang?” ka ti chu a rawn chek hlaka “Ka hmanlo insiam ka ngai, kan chhuak ṭep tawh” a rawn ti chu ka thaw haka “A reilo ang, reilote a nimai hetah in inbul quarter ruakah khân ka lo awm ang” tiin phone chu ka dah zuia.

A rawn kal angem ka hrelo, mahsela ka nghâk phawt ang chu. Rei vak lo ah chuan a rawn lang ta hrâm e, hawi kual ruaiin min zawng tih ka hria. A inchei vek tawha, a hmêlṭha zual hle bawk, ka aw thian kharhin min rawn hmu zui ta chata.

A rawn phei rual chuan tuma min hmuh loh nân in chhûng lamah chuan ka luh puia, “Enge sawi i duh? Ka hmanhmawh a nia kan chhuak ṭep tawh” tiin a kuangkuah ât a, a hma a min ngaihvena min duh zia chêtzia nên lama lan tir ṭhin kha a ni tawh lo tih a chiang viau bawk.

Engmah sawi lo chuan kuai dakin a hmuiah chuan ka fâwp ta hmiaha. A hamhaih nge tal na châng pawh a hrelo, a meng deuh ak chu ka hmuh hmaihlo.

Chutah harh chhuak thut ang mai chuan min rawn nam data “Enge i hriat? Nang hian min bâwl kual tum miah suh, engvanga min fâwp nge i nih? Ka sawi tawh kha, i lakah ka rilru a tâwp tawh. Ka beisei tawh lovang che ka tih kha” ti a inher a tum chu ka man beta,

A hnunglam aṭanga kuahin “Ka lo nghâk ang che” ka ti chu a rawn inher zawka “Aih ka duh tawh lo che, min nghâk suh. Tûnah chuan duhtu mipa, ka tâna ṭha em em a awm tawh, a ni chuan min duat hle bawk. In inrual chiaha mahse a ni chuan ka naupanna avângin min hnar ve ngailo” a ti chu ka lung a che dawt mai.

“Mangṭha le” tiin a kalsawn zui nal nala, a hnung lam aṭang chuan ka en reng ringawt. Ka tâna a awm ṭhin laiin ka in duhtawkna avângin ka hnara, tûnah ka hlatah a awm tâkah chuan ka tân a pawimawh zia ka hre chhuak ta chauh si.

“I rawn lêt leh ngei ang, chuan ka nghâk bawk ang che. Tu mipa tân mah ka phallo che” ti sup chuan muangchangin damdawiin lam pan chuan ka kal zuia.

Tûnah chuan ka hmu mai mai tawh rih dawn lo  Paatih ka hria, a chhan pawh ka nau thusawi aṭang khân ramdangah a kal dâwn ngei a ni tih ka hria. Tûnah chuan ka nin em em ṭhin chu ka vei ta tlat si a, a ni lahin min hlat tawh hle bawk si.

Damdawiin ah chuan phur lo fe hian ka lût a, Rami min rawn pan pawh chu engah ka ngai tawh lêm lo. Nurse niin a thawk ve a, chuvanga an inah pawh lêng ve ṭhin ka ni bawk, nula hmêlṭha leh fel kei ngei pawhin ka nupui ni tura ka duh ṭhin mizia a neih avâng hian ka hnar em em lo, mahsela tûnah zawng ka hmeichhe duhzâwng mizia ka lo sawi ṭhin let thawk, hmeichhe danglam leh ka mize duhzâwng ni ngai miahlo lakah ka danglam ta mai chu anih hi.

Nileng chuan damlo ka enkawl leh tâkah chuan Nono-i ka ngaihtuahna aṭang pawhin tlêm in ka ngaihtuahna an la pêng ve deuh bawka, a zia phian mai.