CHAPTER 5

MALSAWMPUIA 

CHAPTER 5 

KUM NGA HNUAH 

“Nu ka lo haw e” ka nau rawn lût mêk chu ka ena, ka zawn ber hmeichhia erawh ka la hmu ta chuang lo. Kum nga a liam leh tawha, ka tân chuan rei vet vet tak a ni, khâng kum nga chhûng khân vawikhat mah min be ngai lova, ka number a nei tawh lo nge min block ang tih mawlh ka ngaihtuah ṭhin.

“I lo thleng tluang maw? Khawiah nge Nono-i teh?” ka nu in a tihchuan ka thaw huaia, keichuan ka zâwt ngam hauhlo. Ka nau mah nise Nono-i ka tihdân avângin tûn thleng min la be ṭha duh bik lova, zâwt pawh ni ila min chhâng ṭha leh duh dâwn lo tih ka hria.

“A nute'n a rawn chhoh an la phal rih lova, Aizawl lamah a awm rih dawn a nih kha. Hetah hna kan dîl kha kan hmu nghal ve ve a, kan khuaah Doctor kan la in daih silova, tûnah chuan kan khua leh a chheh vêl te tân pawh khawpui pan kher ngai lo turin ka ute nên hian kan thawk ho thei ang chu, nu ka puitling tawh i ti em?” a tinghal zata.

Ka nu pawh a lo bu nghat nghata, ni e ka nau meuh pawh tûnah chuan hmeichhe puitling tak tak a ni tawha. Chutiang bawkin Nono-i pawh a puitling tak tak tawhin ka ring, ka hmu châka, chutih rual erawhin ka hnarna avâng erawh chuan a hmaa in lan ka hreh tawh em em thung.

A sawi ang tak takin min be tawh ngai lova, ka hmuh phâk lohah kum nga lai a awm bawka. A chanchin leh a aw ri pawh ka hre tawh ngai hek lo, a awm lo chiah chu keimah hi ka ruak nghal vek hian ka hria.

Ngawi reng chuan ka nau pawh be lo vin ka room lamah chuan ka lût ta daiha, kha officer pa nên khân an la in ngaizawng reng tih Ramin min hrilha. Chu chuan min tina êm êm thung, engvanga ka tâna a awm lai khân lo pawm mai lo nge ka nih? Ka ât vâng vek a ni.

NONO-I POV 

Ka room tukverh aṭang chuan ral hla taka tlâng panga ni tla tur chu ka thlir renga, tûnah chuan nula kum 26 mi ka ni ve ta reng mai. Nula puitling tak tak ka ni tawh tih ka inhriatna erawhin ka nuih a tiza ṭhin, hriat loh kâr hian hun hi a lo liam duak duak ni berin ka hria.

U Sawmpuia ka ngaihtuahna erawh a la tâwp lova, chutih rual erawhin a status leh a bialnu nên an hlim lai hmêl ka hmuh duh loh avângin a number engkim ka blocka, engvanga kum nga liam taah khân min fâwp nge a nih ang? 

Mahsela kha thil a vâng maia alaka beiseina neih ka tum tawh lo, u Hlimpuia nên khân ṭhian ang maiin kan awma. Ngaihzâwng enin ka en theilo a ni ber, amah chuan vawitam min duh thu a sawi tawha, kei erawhin ka u leh ṭhian ang bakin ka en thei tak tak lo.

Malsawmpuia hi ka mipa duh hmasak ber a ni a, ka tân chuan theihnghilh mai mai a har tlat a ni. Naktûk maiah an khuaah ka chho leh anga, kan inhmu leh ngei dawn tih ka hria, a thawhna damdawiin ngeiah ka thawk ve dâwn tlat a lawm.

Kum nga liam ta ah khân min nghah reng tur thu kha min hrilh a nih kha, kha thu kha engvanga sawi nge a nih ang? Min duh ngai loh tur thu min hrilh hnu lawkah khatiang khân a awm leh a, ka tân chuan han rin leh mai kha chu a har sa êm a ni.

“I duh loh a i kalsan hnu thinlung hian hmalam pansan che harsa a la ti êm êm a, i hnungchhawn tawn hmeichhia hian nangmah bâk a duh thei chuang silo. Beisei phâk loh nisiin ka la beisei fan che a, i rilru hre kher lo mah ila tûnah erawh chuan i laka ka rilru te pawh ka thup bo ve thei tawh mahna. Ka neih loh tur ka ûmzui rei mah mah che a ni” ti a phun sapin ni tla tur sen phût mai chu ka en renga.

Theihnghilh tak tak ni ka nei ngai dâwn lo, ka hriatrengna aṭang hian engtin nge ka paih chhuah ang tih pawh ka hrelo. Kum nga dang ka bei leh chung pawhin ka duhna hi a reh thei silo, keimah pawh hi mâwl ka in ti a, ka thinlung pawh hi ka hua. Kum sâwm chhûng zet mipa pakhat avângin ka talbuai ta der chu a nih hi.

Thâwk la ham hamin ka phone chu ka ena, a thlalak pakhat la kawl reng ka neia. Chu chu ka hmuh hmasak bera ka lâk rûk sak a ni bawk, delete ka phal miau lo, ka hringnuna a rawn luh ṭan ni a ni a, awlsam taka delete ka duhlo.

A hmêlṭha zet leh ka vei em em ṭhin chu ka en vang vanga “Tunah chuan inthup dân te pawh ka thiam ve tawh a sin, min duh lo tu ûmzui ṭang ṭang sâwt loh zia te pawh ka hriat belha, i tello vin hmalam ka pan zêl thei tawh a nia aw u Sawmpui” tiin ka nui haka.

Tûnah chuan alakah eng thu mah ka sawi tawh dâwn lova, min duh a min biak a duh a nihchuan amahin chêt a la ve tawh tur ah ka ngai. Tepuiin engkim min hrilh tawha, a danglam a nih chuan amahin bul a ṭan ve tawh mai tur a ni.

“Nu Ṭha khawiah nge Tepuii?” an khua ka thlen rualin pitei te inah pawh châwl reilo vin Tepuii ka hmu châk bawk nên an in ka pan vata “Roomah a awm kha han chho rawh, i dam maw? Rawn chhuk leh vat ila, in chanchin te ka hre duh ania“ a ti zuia, keipawh in chung lamah chuan ka chho nghal vat bawk.

Tepuii room ka pan mêk lai chuan u Sawmpuia room zâwnah chuan ka ding data, he room-ah hian kum nga liam ta mai kha chuan hlim takin ka la nui hak haka, ka la chhaih zak zak a nih kha. Ka en vang vanga, chutah rawn inhawng thutin room chhûngah chuan min pawt lût dawrha.

Phâwk lutuka ka en laiin u Sawmpuia hmêl ka hmu nghal chat mai. “Eng thil nge i tih?” ti a chhuah leh ka tum chu phallo vin min kuah beta, a chêt dân chuan min ti hamhaih tak zet. “I va rawn lang har ve” a la ti zuia.

“Enge tih i tum? Min thlah teh, Tepuii hmuh ka duh ania” ka tihlai chuan min rawn fâwp thutin bangah chuan min nawr beta. Ka meng phâwk hru mai, tih ber tur pawh ka hrelo, chutah rawn duhthawh sauhin ka biang tawn tawnah chuan a vuana.

Ka lung chu a phu dawt dawt a, ka mipa duh em em in min fâwp tih ka hriatna chuan min ti hamhaih bâkah ka chhûngril aṭang chuan hlimna riau a rawn awm lehnghâl. Ka kut chu phar chhuakin a nghâwngah chuan ka kut pahnih suih chuan ka fâwp lêt nghal zat mai.

Chuveleh min pawm nawlhin a khumah ngei chuan min delh mu a, min fawh-na ata awm sawn zâwkin ka mitah tak chuan a en ran mai “Min in nghah rei tir hle mai” tisupin a hma aia duhthawh chuan min rawn fâwp leha, keipawhin ka lo chhâng leh nghala. 

Ka hnar phal lo, ka thawmhnaw phelh a tum lai chuan harh chhuak zawkin ka namsawna. “Hetiang ti suh, ka duh tawh lo che ka tih kha, min hnar ṭang ṭang tu tân awm reng ka tum bik lo. Tûnah chuan hmalam ka pan ve tawha, khawngaihin min ti buai tawh suh aw” tisapin kalsan mai ka tuma.

Ka kutah chuan a rawn vuan leh chat mai, ka in pet ruh ṭeuh tawh. Ka lakah a la danglama, a mi tawhna leh a bula ka awm ringawt pawhin ka lungphu a rangin ka taksa ah danglamna a la thlen tlat si.

“Min duh tawh lo tak tak em?” a rawn tihchuan ka bu nghauh nghauh a. “Khawngaihin min tibuai tawh suh, kum nga chhûng nang neih theih nân che ka beia, kum nga chhûng vêk theihnghilh nân che ka hmang bawk. Kan duh em em leh kan ta ni tura nasa taka kan beihna in min hnar ṭang ṭang nat zia i hrethiam ve tawh ang tiraw? Hlim takin awm rawh” tiin ka chhuahsan hmaka.

A rûk tak erawh chuan ka la duh ngawih ngawih a, mahsela ka duhna remchânga hmanga min bâwl kual pawh a tum a ni theia. Chutiang mai maia in bum tir ka tum lo, tûn thlengin Rami nên khân an la inzui tih ka hre renga, chutiang ni chung chuan engtin nge khatianga ka lakah a la chêt ngam ni.

Tepuii room ka lût chu a lo lam leh nasa tawh mai, a lo in sawi auh auha. He nu hi chu a thawveng ve thlâwt a lawm “I lâm thiam lo lutuk, lâm tawh reng reng suh. Khatiang te chuan engtin nge an duh theih ang che? I bialpa ka hmuh mai ang aw, i bialpa chhe bawk ve lil lel kha” ka ti kher chu a lam chu tâwp hmakin rum zet chuan min rawn ena.

“A chhe bawk lo, nang bialpa tur pawh hmu ve thei hlei lo khân khati khân min ti ziah suh aw“ a rawn tichu ka nui hak haka. “Ka hmuh zia chu i hriat kha maw? Officer ngat leh nghal, a chhelo i tihzia i sawi nasat theih êm kha, nakinah ka la sawipui ang che. I bialpa Dampuia ai hi chuan ka duhpui zâwk che a nia, ka unaunu anga ka en che avângin ka hrilh che a nih chu” tiin a khumah chuan ka ṭhu thla a.

Dik tak chuan Dampuia kha chu ka duhpui hlawl lo, a lerhin a chanchin midang kâ aṭanga ka hriat ṭhin hi ka ṭhiannu hi ka hrilh ngai hauhlo. A chhan pawh an lo inzui rei ve si a, han hrilh ila a lo ṭan ve dawna, kan in hauh phah hrep ang tih ka hlauh ṭhin avângin ka ngawihsan mai zel.

“Dampuia hi tinge min duh pui loh em em hlawm le? Ka ute eh ka nu takngial pawhin min hrilh ziah mai, zâwt cheu ila thuchiang in sawi leh duh tak tak silo” a tihchuan ka bula ṭhu tur chuan ka hui vata.

“Dik tak chuan i nat leh ka hlaua, mahsela ka zêp reng chuan nangma tân tho a ni bawk sia. Rinsanga te ho pawh khân min rawn hrilh fo mai, Dampuia hian hmeichhia a kawp hi a la bânsan hauh lo a nih hmêl. An picnic in an lêng chhuak fo an tia, i rilru tihnat ka duh loh avângin ka hrilh ngai lo che a nih kha, nu Ṭha-i te pawh hian an hre ru deuh pawh a nimahna. Chuvang chuan keichuan i nat leh tak tak hma hian kalsan la ka duh, mi lerh hi chuan an zia an sim thei tak tak lo” ka ti charh charh chu a ngawi renga.

Eng angin nge min rawn chhân dâwn ka hre hauh lo, thudik hrilh ngei ka duh avânga min hua a nih pawhin min haw mai rawh se. 

“Dik tak chuan keipawhin ka rinhlehna a rei tawh a sin, kan awm hran tâk hnu phei kha chuan kan in be khât lutuk. I bulah ka sawi hreh mai mai zâwk a, i sawi chu a dik ka ring, nilenga ka message chhâng lova a awm châng te a tam a nia. Khatiang chung khân engtin nge min duh ber âwm anga a awm thiam ni? Ka ten leh hnuhnawh, chance kha lo pêk loh tawp tur ania, min hrilh vat lohna ah erawh ka ngei che” a tihchuan ka nuih ringawta.

“Eng pawh nise ka ṭhen hlen tawh ang, chance ka pe tam tâwk tawh a lawm le. Tûnah phei chuan a tello pawhin ka awm thei êm, hna ka nei ve tawha, mipa pakhat lerh lutuk avânga in dawm kûn mai tur ka ni hleinem, a duh duh chuan awm rawh se“ a tih tâkah chuan keipawh ka thaw huai mai.

“Dik chiah chiang fek fawkin i hrilh tawha, a zâwm duh lo a. Hun ṭha dang pêk a phu tawh lo, a huang tau mai mai, a hmeichhe awm pui pic phei chu i hmuh ka hlau bawk nên ka delete nghal zela. Tûnah chuan keimah pawh ka hahdam, ka hrilh che chuan i duh ve hlarh hlarh bawk sia i ṭah leh rilruna a i awm ka hlau a, chutiang i nih chuan kan thil zirlaiah rilru i pe leh thei âwm tawp silo, tûnah chuan doctor i ni tawha. Pasal tur chu i hmu zo dâwn nasa a ni” ka ti chu kan nui dûn hak haka.

“Ka u nên in inhmu em?” a rawn ti khauh chu ka en zawka “Hmu e” ka ti liam puata, kan awm dân erawh kha chu sawi ka tum lêm lo. “Tunlai chu a zia hi a dang lutuk, ka nu leh pa pawh hian an sawi fo mai, i chanchin te hi min zâwt leh nawlh ṭhin. A duh ve tawh che nge ka ti hial tawh ania aw, amah hi a dang ka timai ka sawi thiam lo” a ti chu ka nuih haka.

“Ka sawi tawh kha, kan awm lova a awm thiam lo mai mai te pawh aniang. Kha chen neih tumin ka beia, ka beidawn chian zia chu min hriatpui kha, tlâwm nawn leh ka tum tawh lo. Hlat tura min ti na na na han hnaih leh kha ka châk tawh lo a ni ber mai, a duh a thlang tawh a lawm. Chutih rual erawh chuan ka theihnghilh thei silo lai hi a ni pawi ta ber” tiin boruak tihzan tum tak chuan ka nui zui hak haka.

“Kei chu a duh ve tak tak tawh che angah ka ngai a sin, ka u hi a danglam tih ka hre chiang lutuk” a tihchuan ka nuih ringawta

“Engmah a sawi chian duh loh hi, beiseina nei tawh lo law law ang. Bâkah a bialnu a la kalsan lova, keia tâna beiseina lo va neih leha, tihbuai leh pawh ka tum tawhlo. Kum nga liam taah khân min duh loh thu a sawi chiang tawha, tihbuai mai mai ka tum tawh lo. Ka haw phawt ange, zaninah ka Night nghal dâwn sia, va hahchawlh phawt ka duh ” tiin ka tho chhuak zuia.

A ni pawhin min dang tawh biklo, inhnuai lamah la chhuk thla a, nu Ṭha-i chu mangṭha in ka in luah lam chu ka pan zuia. Pitei te bulah ka awm duh tawh loh thu ka sawi avângin ka nu leh pa pawhin min tilui duh ta lo, kan chhûngte mah nise inthlahrunna chin a awm ve lo theilo a, helaia ka awm a pianga an ni ina ka awm reng kha chuan ka ei hek ve zel bawk nên hetia hna te ka neih tâkah chuan puitlin lam ka pan ve tawh a ngai tih pawh ka hre chiang viau mai

An mahni hlatah erawh in ka luah hauh loa, an duh dânin an hmuh phâkah an ṭhiante inhnuai ka luah dâwn a ni ber mai. Ka thlen rual chuan ka thawmhnawte chu rem khâwm zung zungin rawng ka bâwl paha, in chhûng tihfai erawh naktûk lam atân ka dah thung.

Hun ka nei tawh miau silova ka chêt chak a ngai tih ka hria, chaw eikham chuan ka bag tê ah chuan ka mamawh tur ho thun khâwmin damdawiin lam chu ka pan zuia, a hmun ka thlen chuan u Sawmpuia pawh a lo awm leh tawha.

Zanin a Night ve dâwn nge mawni, a bialnu Rami nên bawk an lo awm leh tawha. Mi hmuh loh tur erawhin an fimkhur ve viau tih a hriat mai, engah mah ngailo ang chuan kal pêl in ka office lam chu ka pan nghala.

Rami chuan a kuah tih ka hmuh hmaih lo, kha ti chung khân min fâwp vêl a nia. A zak lo hi ka ti ngawih ngawih, engtin nge ka la duh theih cheu ni? Bialnu nei chunga min beisei ngam hrim hrim pawh kha in hmuhsitna ah ka ngailo theilo.

Tûn aṭang chuan min tawk tawh hauh lovang le, ka office ka thlen rual chuan pawimawh tur ang ang lehkha an lo dahkhawm hnur chu ka ena. Hna a tam nghal dâwn hle mai, keihi mit lam Doctor ni in hetah hian ka thawk dawn a. Ka phûr viau bawk, a hma aṭanga ka lo tum tawh a ni a, chutia ka ni thei tur chuan min ti hlim a ni.

Malsawmpuia erawh tihbuai ka tum tawh lo tak taka, mi bialpa lo va chhuhsak ang te kha ka duh hauh lo. Bialpa ka vân bik hauh lova, chutih rual erawhin han nei tur erawh chuan rilru ka la siam chhin lo. Hetia kawppui neilova zalên taka awm hi nuam ka ti te pawh aniang.

Ka office aṭang chuan chhuakin damdawiin chu ka fang kual mai maia. Nuam ka ti viau bawk, damlo te chu kan kual vêlin a ṭhen lahin min lo be nghal bawrh bawrha, hmelhriat sa ka nei ve nual bawk nên chûng ho nên chuan kan inkâwm a ni ber mai.

Malsawmpuia erawh ka hmu leh tawh lo. A ni chu lung lam Doctor daih a nia, ani phei chuan enkawl tur a ngah viauin ka ring. Kei erawh tûnah rih chuan ka âwl khawp mai, chhûn lamah erawh appointment neisa ho hming aṭangin rawn in en tir duh tur an tam viau tih ka hria.

Chawlh hun pawh ka nei dâwn lo a nih hmêl, tûnah erawh in entir duh an awm lo nge tumah min han pan tur awm ang pawh an awm hauh lo thung. 

Ka office ah chuan lêt lehin chair ah chuan ka ṭhu thla a, in entir tur natna an ziah sa chu ka en thuak thuak bawk. Mit hi chu kan taksa pêng zîngah pawh a pawimawh lai ber zînga a mi a ni bawka, ngaihthah chi a ni lo rêng a ni.

Chutia ka awm mai mai lai chuan u Sawmpuia chu a rawn lût thuta, enge rawn tih leh a tum ni? Ka lam pan chuan muangchangin a rawn pheia, a Doctor form chu a inhmeh leh pek hle mai.

“Enge i rawn tih dâwn?” tiin ka en ha a, ka lamah rawn hnai zêlin “Nupui ka nei dâwn” a tihchuan ka lung a che dawt mai. Chu thu kher kher chu ka lo beisei miahlo, chhân dân tur pawh hrelo in ka en renga.

“Zaninah ka nu leh pa in palai an tir dâwn” a tih leh lek phei chuan engmah sawilo mah ila chhûnglam aṭang chuan ka na leh ut ut tawh. 

“Chumi min hrilh tur chuan em ni i rawn kal” ti ringawt in engah mah ngailo ang mai chuan ka awma, ka phone chu phawrhin Tepuii chu ka text nghal zat mai. 

“Min dang dâwn lo em ni?” rawn ti supin ka bulah chuan a rawn ṭhu thla a, “Engvangin nge ka dan ang che? I duha i tir tihna a nimaia, i duh rêng vanga i thil tihah enge ka inrawlh ang. Chhuak rawh, keimahin ka awm duh” tiin ka phone chu ka en san leh daiha.

Tepuii pawhin a rawn kal tur thu chu a rawn sawia, ka thaw huai mai. U Sawmpuia la awm reng chu ka melha “Min chhuahsan rawh, chuan i nupui neihna turah ka lawmpui a che” tiin u Hlimpuia chu ka call zuia, tûnah chuan ka bulah ka ṭhiante pahnih hi awm se ka duh ber an ni.

U Sawmpuia pawh u Hlimpuia hming ka lam rual chuan rum nghutin a chhuak zuia, “Enge nita Nono?” mut chhuak aw zeta u Hlimpuia rawn ṭawng chu nuih hak in “Engmah nilo e, ka rawn haw ve tawh a mi hmuah pawh i tum miah nange? I induh ta riau mai” ka ti chu a rawn nui ve haka.

“Ka buai deuh a lâwm mawle, naktukah ka rawn hmu dâwn che a nia. I ṭha maw?” a rawn ti dam leh dapa, hepa hi chu biak a nuam mawle. A mah a fel bawk si, officer te chu an nihna avâng ringawt pawh hian mi thinchhe tak turah ka ngai ṭhin kha a nia, mahse u Hlimpuia erawh a nelawm em em reng bawk si.

“Um ka ṭha e, a nih chuan a i buai chuan ka dah mai ang aw” tiin a chhânna pawh nghâk tawh lêm lo chuan phone chu ka dah zui ta daiha.

Rei pawh nghah ngai tawh lovin Tepuii pawh a rawn thleng ta thuaia “Enge ni? Min rawn koh teh nawlh, inah hahchawlh duh nên” a rawn ti nâng nâng chu ka nuih saka.

“I u palai tirh tur hi i hria ang tiraw? Engvanga ka lakah zêp nge i nih?” ka tihchuan a nui lai tâwp chatin min rawn ena, a hmêlah inthiamlohna a rawn lang bawk. 

“Tihpalh,i rilru a nat leh ka hlauh vâng a ni, i duhzia ka hria a. Ka nu leh pa lahin nupui nei turin an duh bawk si, ka u hian a hnial anih loh chuan palai tur chu an rawn kal tawh ngei a lawm” a tihchuan ka thaw haka.

“Engtin nge ka tih ang? Ka nghâk reng a sin, vawiinah pawh min rawn hmu a, ka lakah eng rilru chiah nge a put ka hre silo, ka rilru a hah. A na bawk, engtin nge nupui a neih chuan ka awm tâk ang? Hei chen ka nghah chu ka ta a ni lo kumkhua dâwn ta a nih hi” tiin ka mittui chu ka hru zauh zauha.

Tepuii tih ngaihna hrelo chuan min en tawp ringawt “Tinge helaiah kher kher thawh te kha ka lo dil? Engkim ah ka chhiatpui dâwn ni hian ka hre tawh” tiin ka ṭah nuih leh haka, ka mittui chu a luang zung zung bawk. Malsawmpuia hi midang ta ni tur chuan ka la phal chuang lo.

Ka ṭhiannu lah chuan min en tawpa, mi a hnem thiamloh zia ka hre tawha min hnem tur pawhin ka phut lêm lo, ka mittui luang zung zung chung chuan hmalam chu ka melh ngawt ngawta.

“Nono ṭap tawh lo teh, ka u chu ka lo bia ang aw. A tir lo mai thei a sin, ka lo be dawn em ni?” a tihchuan ka lu ka thing nawk nawka “Engmah a danglam phah lo ang, min duh ve hleinem keimah intih tlawm ka duhlo. Ka hmangaihna a hnawl a, a hmangaih a vuan duh anihchuan kal rawh se. Keichuan sawi thei ka neilo, a hlimna a lawm ka duh ber” tiin ka ṭap leh zawih zawiha.

Hmalam ka pan san tawh emaw ka ti a, ka rilru a ti na pha tawh dâwn lo emaw ka ti a, mahsela a lo la tina pha renga. A hma ai zawngin ka thinlung chu a na zual bawk, thawk harsa ti zet chuan ka thaw leh hawk ṭhina.

Tepuii pawh chuan min en ngawih ngawih ringawt, min khawngaih hmêl ka hmuh chuan ka ṭah a tichhuak zual, enga tinge ka ta ni lo tur hi ka ta nih tir ka lo chak em em? A tir aṭang khân hnaih lo ila hetiang hi kan thleng lo tur, ka ât rah chu ka seng a nih hi.