CHAPTER 6

MALSAWMPUIA 

CHAPTER- 6 

Chutia Tepuii bula ka lo ṭah lai chuan Tepuii phone rawn riin “Ka nute an nih hi” a tihchuan ka ṭap pawh chu ka insûm ta deuha, Tepuii chuan a chhâng thuai bawk. “Eng maw tinge? Aw ka hmu a lawm, ni chinah kan in tâwk a” Tepuii chuan mak ti deuh tak hian min rawn ena, ka ngaih an ti ṭha miahlo.

Phone a dah rual chuan zawhna mitmengin ka lo ena, thâwk la vâng vangin keichu min rawn melh leh a “Ka u in palai tirh a duh leh loh thu ka nu in min rawn hrilha, ka patea te pawh an haw leh tawh a niang, ka u chuan engdang mah a sawi duh loa, palai tir leh lo turin a ti tawpa, ka nu te pawhin a chhan an zâwt chhuak theilo, engvang nge le? Vawiin khân in inhmu tiraw?” a tihchuan keipawhin mak ka ti.

Engvanga u Sawmpuia chuan palai chu tir leh lo nge a nih ang? Nichina a thusawi kha a ti tak tak em niang? Ka thaw haka ka hmuh ngei a ngai, engvanga chutianga ṭhulh leh nge a nih “Ka hmuh ngei a ngai, lo va haw mai rawh aw, u Sawmpuia chu hmuh ka duh” tiin ka tho chhuak zuia, a office lamah a awm ngei ringin ka pan nghal hlawk hlawk bawk.

Nurse duty ve ten min lo biakna pawh ka chhâng ṭha mumal meuhlo, Rami ngei pawh ka hmu a a ni erawhin engmah a la hre lo a nih hmêl.

U Sawmpuia office ka thlen chuan kawngka pawh kik lo in ka lût tlang ka hmiaha, rin ang ngeiin chairah alo ṭhu âwn duaia, chunglam a melh vang vang bawk.

“Engvang nge?” ka tihrual chuan ka lam a rawn hawi ta ruai ruaia, min hmuh rual chuan a nui nghal suka, rawn ding chhuakin min rawn pan zuia, khawi dang mah hawi lovin ka lo en ve reng ringawta, engvanga zâm ta viau nge ka nih pawh ka hre lo.

Ka lung a phu dawt dawta, ka taksa a khûr dar dar mai bawk. Ka bula a rawn din rual chuan thâwk ka la zui ta haka “U Sawmpui engvang nge palai i tirh loh?” ka ti leh sapa, min chhâng ngei se ka duh. Keimah vâng nge ni anga thil dang vâng ni ang tih hi ka hriat châk êm vâng a ni.

“Nangmah vâng ti ta ila, min pawm thei dâwn em ni?” a rawn tihchuan rang taka hawi chhuakin ka en chho ha a, a mitmeng a thutak êm avâng chuan chhân mai dân tur ka hrelo.

“Keiin i tân hmeichhe dang ka hnâwl ang hian khapa kha i hnawl ve thei angem? Ka nghâk rei tawh viau che in ka hria, kan in rûl tâwk tawh viau lo em ni?” a rawn ti zui leha, chhân mai dân tur pawh ka hrelo. Ka zâm a, ka hlim bawk si, chu tih rual erawhin min tihder mai ang tih pawh ka hlau tel tho bawk.

“Min duh ve tak tak em? Min fiam kual i duh vâng mai mai a nilo maw?” tiin ka kûn chala, ka aw chu a ri che che chauh a ni. 

“Nono, fiam kual duh che ila ka fiamkualna che a rei tawh ang, ka duhthu pawh ka hrilh hek lovang che. Kum nga hma lama ka thusawi kha ala ngai reng, nghâk lo che ila chuan tûnah hian nupui ka nei tawh zâwk ang chu. Ka sawi tawh kha, i in peih hun ka nghâk ang tih” a tih tâkah chuan ka thaw huaia, ahma a amah ka lo huat ve em em na te kha an reh ta bawka, nuam ka ti.

Hnaih hretin ka kuah zuia, a âwma bei chung chuan ka nuih ver ver bawk. Tûnah chuan min hnar ṭang ṭang tu chu ka ta a ni ve dawn ta, ka rilru natna te kha an kiang duaka, a âwm pharh darhah chuan ka bei vang vang bawk.

“Ka nghah rei zia che kha, min hnar reng lehnghala, ka ngaihtuah lêt hian ka thinrim leh riau ṭhin, ben hrep che ka châk. Ka duh che tih hre reng khân i induh lui ve vela” ti a ka phun nâng nâng lai chuan ka hmuiah a rawn fâwp zauha, ka ngawi nghâl hmak chu min rawn nuih var vara.

“Ka ât vângah ngai mai rawh aw, ka tihpalh liau liau a nih kha, hetiang hian vei i na ang tih ka lo hre lova, min kalsan dâwn khân ka duh zia che ka hre ve chauh a nih hi” a tihchuan ka nui leh haka, kan inhmuh tirh phei kha chuan biak pawh min be ṭha duhlova, Tepuii ka kawm luih tlat avângin min be ve hrâm a nih kha.

“Ka in duh leh tlat dâwn emaw ni, ka nghâk rei lutuk che a ka lâwm miahlo” ka ti leh chu ka zakah a rawn dêk vaka, ka au nghâl chûl mai. Nui hawk hawkin chairah chuan min ṭhut thlak puia, a mal chungah ṭhu in ka titi leh zat zata, min ṭawng khum ṭhin dân sawi chhuakin ka phun khum chu a ni a nui suk suk ringawta.

“Naktuk chu taka u Hlimpuian min rawn hmu dâwn a, lo awm ve la” ka tihchuan a rum deuh nghata, an in ngaih theih loh zia ka hre chhuak leh hnuhnawh. A hma pawhin a thik ve a nih kha, tûnah pawh a lo la ngai reng a nih hmêl.

“Khapa nêna an hmehbel fo che kha ka duh hauhlo ania, hmuh pawh ṭul ka tilo, i bialpa ka ni tawha mipa dang biak biak a ngai lo” a ti chu ka ner zui nâng a, nge a ni pawh palai atîr ṭep hial a nih kha

“A ni te chu ka ṭhian a lawm, nangpawh ṭhian i neih ve tho kha aw, bâkah palai te ila tir ṭêp lehnghâl. Ka titau ṭep a ni, ka rilru i tihnat hman zia kha” tiin a khabe ruh kual chu ka chûl sak dan dana, ka nui leh ver ver tawh. 

Tûnah chuan he mipa hmêlṭha leh chhelo em em hi ka ta a ni tawh tih hriat chu a nuam lutuk tlat, kum eng emaw zah chhûng mipa dang reng reng ngaihven theilova min siam tu chu tûnah chuan ka nghâk chhuak ve ta.

“Ka duh lo, hmeichhe ṭhian ka nei ve lo, inneih vat kan ngai a nih hi. Kan naupang tawh lo ve ve, in zui rei hi inneih reina a ni chuanglova, inzui rei lutuk avânga inṭhen ka hre ṭeuh, chuvâng chuan inzui rei kher a ngailo, kan innei vat ang, palai rawn tirh vat a ngai” a tihchuan mak ti lutukin ka en tawpa.

Khatiang thu a sawi ve ang tih pawh ka ring phalo a nia, engtin nge a sawi ve phawng phawng theih zâwk ni. Kei erawh ka zak ru tlat a nih chu, “Ih....ka chhuak tawh ange, naktukah kan in hmu dawn a nia” tiin chhuah nghal mai ka tum chu a phal tlat lo.

Min dangin sofa lamah chuan min pawm phei nawlha “Tah hian mu ang, khua a vâr ṭep, reilote tal mutthilh kan ngai, chhûnah kan la buai dâwn chauh a nia” a tihchuan ka hnial tawh biklo a, a lamah inherin a âwmah chuan ka hmai in ka nawra, a perfume rim chu tui ka ti.

Hip vang vangin lawm loh chuan ka nui leh ṭhin a, ka mumang ang rum rum te hian ka hria.

Dâk deuhin a hrawk bâwk a chil lem zâwnga che ralh ralha chu mawi ti zet hian ka khawih saka, “A mawi e” ti a phun sapin ka fawhsak zauhva, ka kâwngah rawn kuah pahin “Muhil rawh, chutilo chu thil dang ka tihpui ang che” a tih rual chuan rang zetin ka kut chu ka dahthla a, ka mit ka chhing nghâl hmak bawk.

Min ti zak lutuk, a va han ngeiawm tak. Miin mawi kan ti a ni ve maia, mahse engtin mah ti tawh lêm bik lo chuan mutthilh tumin ka mit ka chhing zui riai riaia.

“Morning” ka harh leh chuan ka bulah lo mu tawh lovin a chairah chuan a lo ṭhu leh rûn tawha, a Doctor form hi a inhmeh bik hliah hliah hian ka hria, ka mit nuai chat chatin ka ham zui bai bai chu min rawn nuih suka, ka lam a rawn pan nghal bawk.

“Enge i rawn tih dâwn?” ti a ka ṭhu chhuak chu ka dârah rawn dawmin “Vawiin tlaiah kan inah chaw rawn ei la, ka nu leh pa bulah kan chungchâng hi hrilh ka duh, kei chuan thil nghah kual hi ka theiloa, ka duh tak tak chu neih vat ka duh ṭhin, inneih kan duhthu kan sawi dawn a nia, nge min neih i duh nge duhlo?” a rawn ti leh tawpa.

Hepa hi a va hmanhmawh em em ve mawle “I hmanhmawh e, tûn kan ni ve dawn chauha, in hriat chian te pawh kan ngai ve a lawm, inṭhen lehnghâl te'n kan awm ange ka duh miahlo ania, ka nuthlawi peihlo” ka ti chu a rawn nui hawka, fiamthu ka thawh miah loh laia a rawn nui chu ka ngei lutuk tlat.

“Kum 10 chuang kan inhre tawn tawh, a bâk kan mamawh belh lo, tin nuthlawi tir che ka tum hauhlo. Min hmangaih em em reng la a ṭha a nimai, in zui rei hi inneihna a ni kher lo, ka sawi tawh kha ka kum a naupang tawh lo, ka nu leh pa pawhin tu hmêl an hmuh châk thu leh nupui nei vat turin min nawr reng tawha, ka ning tawh. Inhriatchian leh zual kan ngailo, kan mizia kan in hre chiang mah mah zâwk, min neih i duh lo em ni?” a rawn tihzawm a.

Hepa hi chu aw, a Frank mah mah a nih hi. “Duh, min duh thu i sawi ve chauha, inneih i duh nghal a nia, i mak” ka ti thlawta, hetianga a awm hi ka ring pha lo hrim hrim.

“Ka sawi tawh kha, keichuan ka hrechiang tawh viau che, min la hrechiang tâwk lo a nih leh, kan innei anga min hre chiang telh telh mai ang. I thik tur leh hmeichhe dang laka ngaihṭha lo tur chuan ka siam ngai hauh lovang che” a tihchuan ka ring hlel lo, bialnu a nei tlêm a, keihi a pahnihna chiah ka la nia, min phatsan duh chu ka ring lo.

“Aw le, mahse” ka tileh chu ka hmui a rawn hupa “Mahse tih kha awm tawh suh se, kan inneih vat a ngai. Hmelma rawn lan tam hma leh i thikthu a chhiat tak tak hma hian innei vat ila a ṭha zâwk” a ti chu ka hnial peih ta lo.

Ka phone rawn riin u Hlimpuia hming ka hmuh rual chuan ka la thuaia, pâwnlama min nghah thu a sawi chuan ka chhuah tur thu sawiin phone chu ka dah zuia “U Hlimpuia ania ka rawn haw hnuah kan la inhmu leh lova, ka va hmu lawk ange i rawn kal ve lo ang maw?” ti a kal nghal mai ka tum chu ka kutah rawn chelhin amah chuan pâwnlam min panpui zuia.

Ka kutah a kai rûn bawk nên nurse ho chuan min en duh viaua, kan Doctor pui te chenin maw le, chutah u Rami rawn lût tur kan la tâwk zuia, nuamlo duh tak a ni.

U Sawmpuia erawh chuan engah mah ngailo ang mai hian keimah ngawt min bia in kan kal pêl zuia, a rûk tak chuan mi ngaihzawng chhuh sak ang maiin ka in ngaia, ka rilru a nuam lo ru viau mai.

Damdawiin kawt kan thlen rualin u Hlimpuia chu kan hmu zuia, min rawn hmuh rual chuan a nui nghal vur vur bawk. U Sawmpuia erawh u Hlimpuia kan hmuh rualin ka kâwngah in tineitu tak hian min rawn kuaha, a awmdân chuan ka nuih a ti za ru viau mai.

U Hlimpuia pawhin a hrethiam a niang mit min rawn sân uka, ka lo nuih ringawt bawk.

“Kha inneih in tum hnai nge?” a rawn tihchuan chhân tumin ka kâ ka âng zuau tihah “Nei dâwn e, zaninah ka nu leh pa bia in kan innei nghal ang, ṭhianah hman i rem ang chu maw?” u Sawmpuia chuan a rawn ti nghal khauha, awi hepa hi! Min ti â takngial dâwn.

U Hlimpuia pawh a nui hawk hawka, “I nghâk rei thei meuhlo a nimaw? Lungngai suh ka ṭang em em ang, i nau kha min biak tir phal leh phalloh a nimai” a ti zuia, awi he mi te hi an va zaklo. Kan awm loh chhûngin an lo in be ṭhin a nih ka ring bur, Tepuii a duh maw? Ka ngaihtuaha, a fuh dâwn riau hian ka hria.

Ṭhianah ka hmang dâwn tih ka chianga, u Sawmpuian u Hlimpuia a hman bawk chuan a fuh viau ngei ang, keipawh hi! Inneih chu ka lo phûr zawk tihna a ni thei mai angem? Ni e, inṭhen leh ka hlaua chumi a thlen loh nân miin min sawisel dâwn mahsela keipawhin inneih ngei chu ka duh.

U Hlimpuia a kal hnu chuan keini pawh damdawiinah kan lut zuia, hna nei kan ni bawk nên nileng chuan kan inhmu lo a tih theih, Tepuii nên erawh kan inhmu a, engkim ka hrilh chuan alo phûr em em mai lehnghâla, buaithlâk ṭhin teh e.

“Ka monu i ni dâwn bawka, ka sual viau ang” a ti leh ṭan tawh, a sawi ve ziah zêl. Mahsela ka chungah tumah an sual dâwnlo tih ka hria, an vaiin min duat êm êm veka, mona tur atân chuan duhthusam a ni.

Tlâiah chuan sawi ang tak takin u Sawmpuia chuan Tepuii nên min phur haw a, Tepuii lahin a u nên chuan min tilui reng bawk, keini pahnih erawh kan ṭawng tam lo dûn viau thunga.

In kan thlenga nu Ṭha-i pawhin min lo be leh nghal bawrh bawrh tawha, ka zak thar riau lehnghâl. 

“Nu kha ka u leh Nono-i kha eng emaw te te a awm a nia aw” a la ti zui, a va han ngeiawm ṭhin tak.

Pa Hriatpuia pawh rawn haw in chaw kan kil zuia “Ka pa, Nono-i nu leh pa bulah palai tirh ka duh” u Sawmpuia chuan a ti ta ngei e, kei erawh ka lung a phu nghal dup dupa, pa Hriatpuia leh nu Ṭha-i chuan kan pahnih lam chu an rawn hawi nghal zata, Tepuii erawh a lo nui leh pût pût tawh.

Ka zak lutuk chu ka kûn ngar mai “Eh bawiha, Nono-i nên in in ngaizawng tih pawh kan la hre siloa” pa Hriatpuian a rawn tihchuan âwm ka ti, vawiinah kan in ngaizawng ve chiaha, inneih kan sawi nghal a nia.

“In hriat reng tawh zâwk kha, kum 5 ve ve kan in nghâk tawn tawha, inhriatchian leh zual kan mamawhlo, nangpawhin hmeichhia chu kan duh a kan hmangaih tak tak a nihchuan neih zung zung tur i tih kha” a tihchuan pa Hriatpuia pawh a nui suk suk mai.

“Nang ni pafa tak hi chu aw, nizân lawkah palai i hnara, tûnah a dangah tirh leh i tuma, mi pawhin mak an ti ang che” nu Ṭha-i chuan a lo ti thunga, kei leh Tepuii erawhin engmah sawi lovin chaw chu kan ei mial mial thung..

“A ho lutuk ka nu, kan naupang tawh lo. Rami kha chu nangmahni min nawr vâng zâwk a nih kha, in thu hnial ka duh lova, ka lo pawm mai kha a nia. Mahse tûnah chuan ka hmeichhe nghah dik tak rilru ka hre tawha, nghah rei ka tumlo, i rem tilo a nih pawhin ka ru tho ang, ka pa pawhin a rûk ve tho che kha tiraw?” a tih leh chuan nu Ṭha-i chu a lo ṭeu hlara, pa Hriatpuia erawh a lo nui kur kur thung.

“Ngeiawm lutuk, Lalhriatpui nangpawh lo nui ziah suh, i fate i fuih khawlo zo. Ka ning, Nono inneih chu i duh tak tak em ni?” a rawn ti zuia, kei pawhin ngawih reng a hun lo tih ka hriat avâng chuan “Ka duh a lawm nu Ṭha, u Sawmpuia ka duh zia chu a hma pawhin in hriat tawh kha” lai deuh tak chuan ka ti a, pakhat pa erawhin ka kutah a rawn vuana, hahdam turin min duh tih ka hria.

“A ṭha e, i patea te kan be dâwn ania” an tih takah chuan ka thaw huai mai.

An sawi ang tak takin a tûk zânah Aizawl lamah chhukin palai an tir ta ngeia, ka nu leh pa pawh ka lo hrilh sa tawh bawk nên min lo pawmpui ve mai, u Sawmpuia te milian chhûngkua an ni bawk nên keini lam pawh kan in puahchah nasa a, Aizawl lamah chhuk lohin pitei te bulah ka awm a, ka nu leh pa an rawn chho bawk.

Ka thuam chhawm tur thlengin an rawn ngaihtuah sa veka, kan innei tur lahin mi titi a luaha, damdawiinah pawh min sawisep sep zel, engah mah ka ngai duh lêm lo thung.

U Sawmpuia chuan vawikhat mah ka ngaihṭhat lohna tur thil a ti tawh ngai lova, englai pawhin ka kiangah a awm ti ila ka sawi sual hauh lovang, kan hun tawn chu kal puat puat angin lang mahsela ka tân erawh chuan ka hlimna ber a ni thung.

Mi hmaa kut in kai riala kal te, lên duna infiam dun te chu nuam ka ti a. Ka hmangaih hluah hluah bawk, amah lo tu mipa mah ka melh thei lo a, kan inneih dâwn thleng hian amah ai bâka ṭha tih mipa ka la nei hauhlo. A engkim hian ka lung an dum a ni ber mai, kha chen ka nghah ka ta ni tura ka duh êm êm in min hmangaih lêt ve tawha.

Tûnah nupa ah hial insiam tumin kan bei dun mêk chu a ni si a “Vawiin chu lêng dûn ang hmiang, ka nu leh pa inhmuh rukna ṭhianah ka hruai ang che” a tihchuan ka bu nghauh nghauha, ka hre ve châk takzet. Nu Ṭha-i leh pa Hriatpuia inhmangaih zia ka hria a, chutia an lo awmdunna ṭhin hmuh ve mai mai pawh ka châk.

Buaina pawh an tâwk nasa ve hle in ka ringa, hetiang dinhmun an thlen theihna chhan hi an in hmangaihna avâng a nih ka ring bawk. U Sawmpuia chuan a bike in min phur chhuaka, u Davida te pawh kan inneih ni ah chuan an rawn haw ve ngei ka beisei. 

Palai an rawn tirh te hnênah ka chhungte'n inneih nghal tawp lova nghâk deuh tur a an duh thu an sawi avângin kan inneihna pawh ala hnai lutuk lova, mahsela keimah ber hian ka nghakhlel thung, ka nu leh pa in min ngaihtuah avâng zâwk tih hre mah ila buaina kan tawha kan inṭhen leh daih ka hlau a ni ber mai.

Khaw pâwn lamah u Sawmpuia chuan min hruaia, kawrfual zâng khai zet a pan lam ka hak avâng chuan thli in a chhem zawng chuan inven uluk angai ngei mai.

Chutah hmun fianrial zet tlâng thengthaw nuam tâwkah hian min din puiin far thing a ding sanga, a hnuai chu a fai hana. Far hnah ṭil tih chauh lo chu hmuh tur an awm lo, hawi kualin ka nui zui var vara.

“A mawi hle mai, helai hmun hi tihna em ni?” ka tihchuan a bu nghata, tlâng hmawr lamah chuan min phei puiin lungpui lian zet lo in phah duaiah chuan min ṭhut thlâk puia, kan ei tur ken te erawh kan sirah kan dah rih thung.

Kan piah tlâng dung leh kan hnuaia ruam lang thla dup mai te chu kan thlir duna, a dâr ka nghêng chial bawk. “Ka naupang i ti sia, tûnah hian ka la naupang i ti tho em?” ka tihchuan min rawn enin a nui suka, ka biangah chuan rawn chulin ka kut chu la kangin a fâwp zui zauha.

Chutah min rawn en pah chuan “Tunah chuan ka nupui leh ka hmeichhia bik liau liau hmuhin ka hmu tawh che. Hmân ang khân ka mitah chuan naute i la ni renga, mahsela ka nau ang nilo in ka bialnu leh ka duat châk em em ka naute ang liau liauin ka hmu tawh che” a tihchuan ka nuih ver vera, hei aia thu lâwmawm hi a awm tawh lêm dawn em ni? 

Amah nên damchhung ka suangtuaha, fa te nei ila hlim taka kan awm dûn tluka châk leh duh ka neilo. A âwmah chuan beiin ka ṭah nuih deuh haka “Nupui kha min neih san vaih la chuan ka tuar viauin ka ring, ka ṭhat chhuah leh kher pawh ka ring lo. Ka hmuh tirh aṭang che khân ka mit ila nghal chata, ka zak ve ṭhin lutuk, mahse ka duh êm che a ka lo â ve bawk nên i rilru tur pawh ngaihtuah ngai miahlo in ka bem ṭhin che a, min ning viau lo maw?” tiin ka en chho ha a.

A khabe phîr ṭhaih te chu a inhmeh zual ngei mai. “A tirah kha chuan i tifiam mai mai turah ka ngaia, mahsela rinai i rawn thu tak ta si a, ka rin ai daihin i rawn urhsun bawk, a tirah kha chuan ka ning ngei che a lawm. Mahse i han awm lo chiah kha chu engkim kha a reh nimaiin ka hria, ka tâna i hlut zia ka hre chiang ta bawka, i rawn kîr leh hun ka lo nghâk ta char char a nih hi” tiin ka hmuiah chuan a rawn fâwpa.

Ka hnar phallo duhthawh zet chuan lo fâwp letin ka hnute tê lam pang chu a rawn hûm chata, chu chuan engtin emaw tak hian min siam ka timai, lung chungah chuan min delh mu in ka hmui a fawhna erawh a thlah chuang lo, keipawhin a nghâwngah kuahin ka fâwp lêt ve tan tân renga.

Kan pahnih khawvêl chauh lo chu thildang reng kan ngaihtuah lo a ni ber, ka kawrfual chu hlimin ka mal chu a ṭhâm salha. Mahsela a bâk kan pêl hauhlo, kohhran dân thianghlim ngeia innei tur kan nih avângin Pathian kan zah ve ve tih a hriat, a puitlin zia ka hriat belh leh bawk.

A duh chuan a nupui tur ka ni tho a, min khawih lui thei ngei mai. Mahsela a thutiam tawhna Pathian a zaha, ama hmaah thianghlim taka kan inneih theih nân a inthunun tih ka hria, ka ngaisang bawk.

A kap puar ul aṭang erawh chuan a pângngai bik loh zia ka hre thei. Thâwk la ham hamin ka hnungzang chu a chûl hliau hliaua,ka chalah chuan a hmuia rawn nawr vang vangin a mit a chhing chiala.

Keiin a hmêl kum tam ka lo star tawh em em chu chiang takin ka en thung, ani aia hmêlṭha tur hi an awm thei bik dâwn em ni? A engkim hi a fuh vêl vek ni berin ka hria a, ka tâ a ni mai hi ka la âwih theilo rum.rum mai

“Min duh ve tih hi âwih harsa ka la ti cheu nia u Sawmpui, khatiang teh tlawnga min hnawl hnuah phei kha chuan hetianga kan awm hi ka ring pha tawh lo” tiin ka phun sapa, a hre pha tih ka hria. Mahsela mit erawh a la rawn meng chuang lo.

“Ka tâna ruat ini te pawh animahna, ka nupuite i nih tawh dâwn kha hlim deuhin awm rawh. Khawiah mah ka kalsan tawh dâwn lo che, nakin lawkah chuan fa min hrin sakin kan la enkawl dûn ang chu. Tûnah chuan suangtuahna chauh kha lo kalpui rihla, nakinah chung i suangtuahna zawng zawng chu ka la tihpui vek ang che” a tihchuan ka hlim ngei mai.

Engtik lai mahin danglam ngailo sela, ka ta hi ni reng thei sela tih hi ka duhthusam awmchhun chu a ni, mahsela hrilh kher erawh ka tum lo. Ka ring tâwka, min tina ngai dâwn lo tih pawh ka hria, engtikah emaw chuan a sawi ang ngei hian chhûngkua dinin amah ang maia hmelṭha fa kan neih ngei ka beisei.