CHAPTER 10

MALSAWMPUIA 

CHAPTER 10 

“Nono i awm maw?” u Hminghlua chu ka en ha a, eng tak chu rawn tih tum ang maw? Keimah chauhin inah ka awm bawk si a, ka awm a ti nuam lo riau. A rûk chuan u Sawmpuia chu rawn haw turin ka text zuia, bâkah u Hminghlua ruangâm ka hmuh apiang hian ka lungphu a rawn rang dat dat zela.

Rinhlelhna tur hre hauh silo hian ka thla a muang thei tawh der silo, “Aw...eng...e ...ni ta lo kal rawh” ti bah deuh nakin kawng chu ka kiana, tûn ang hunah a rawn kal chu mak ka ti lo theilo.

“Tunlai chu i induh riau mai, ka biak che lah min chhâng duh bawk siloa. Min theihnghilh ta emaw ka timai asin, hetiang te chuan hmelma ah min ngai ta emaw ka timai dâwn a lawm” tiin a nui sâng a, za lo zetin ka nui ve heu ringawta. A mah hlat deuh takah chuan ṭhu in thingpui a duh leh duh lohte chu ka zâwt a.

A duh loh thu a min chhangin ka bulah chuan hawi kual thuak thuak pah chuan a rawn ṭhu a “I chhûngte an awm lo em ni?” a rawn ti leha, inchhûng vêl chu a en kual ruai bawk. Eng tak chu hria ang nimaw? A awm dân chu mak ka ti tak tak ani.

“Awm lo e, enge i rawn tih ve hrim hrima, tûn ang hunah i rawn kal hi amak ka ti deuh, hna kal i ngai lo em ni?” ka tihchuan a nui deuh haka. A awmdân hi ka rap thar riau, a mitmeng te hi a dik miah lo “Hna ka châwl rih a lawm, ka ngai deuh che a” ti a ka kut rawn vawn mai a tum chu ka lo la sawn vata.

Za lo zeta nuih pah hian min rawn ena “Pasal nei lai ka nih hi, hetiang lam chuan min fiam lo teh. Ṭhian kan nih kha, hetianga awm tur kan nilo” ka tih lai chuan min rawn kuah thuta, ka tâl ve tak nângin ka tâl chhuak thei der lo.

“U Hminghlu enge i hriata? Awm sawn teh, hetianga awm ka duh miahlo ania min zuam hauh suh aw” ka tihchuan a nui deuh hawka “Vawiinah hian chhuah che ka tum reng reng lo, ka ruahmanna i tichhia a, i pasal bulah hian lêt leh lo chu ni la hetianga ka chêt kher a ngai lo tur” a tihchuan mak ti zetin ka ena.

Chutiang thu a rawn sawi chuan min ti hamhaih ngei mai “Eng...engthil maw i ruahman a?” ka tihchuan a nui haka “Ka duh che ka tihkha, min duh ve tâk siloah chuan ka rem hriat ang in ka che ta mai a nih hi. Min dem thei lovang, kha chen ka nghâk che a, mahsela mipa dang min neihsana, ka thinrim zia kha i hre kher lovang mahsela hun ṭha zâwk a la awm theih beiseiin kha Rami kha ka thawhpuia, mahsela khanu phiangsen pawh khân min phatsana ka that ta mai a nih kha” tiin a nui deuh huah huaha.

Ka thawmhnaw chu phelh tumin a bei pah reng bawk, a thusawi chuan min rap takzet. Rami kha a ma thah hi maw? “Enge i sawi awmzia, u Rami kha nangma thah hi maw ni a?” biak pah chuan ka phone chu ka dap paha, eng emaw ka tih angai tih ka hria.

Chuti lo chu ka naute nên hian min ti na hreh hauh lovang, eng emaw ka tih ve angai a ni “Lawk u Hminghlu, i duh rau rau chuan min lo nghâk lawk la helaiah chuan a rem lo emai” tiin tâl duh tawh lo chuan ka en kara. Mak min tih hmêl taka min en chu ka en lêt ve renga, u Sawmpuia te an rawn thlen har ka ring tawh lova, finfiahna tello chuan a ni hi rei a tang dâwn lo tih ka hria, chuvang chuan ka in ngaihtuah fim hrâm hrâm hrâm angai a ni.

“A hma aṭang khân keipawhin ka duh che a lawm, ih hetah lo hian ti ila. U Sawmpuia chuan a fa ka pai vâng chiahin alawm min duh” tiin in la khawngaih thlâk thei ang ber chuan ka ena “U Rami thih pawh khân keimah min puha, chuvang ania ka haw san, u Rami kha a lo hmangaih renga, hetah pawh hian ka fa ka ngaihtuah lo thei silova, chuvanga lêt leh alawm ka nih” ka ti sap sapa.

Min en vang vangin a nui ta suka, min duhna in a mit a ti del hneh bawka, min rinhlelhna a nei lo hrim hrim. “Sawlaiah sawn ti zâwk ang hmiang” tiin room lam chu ka kawka, a lâwm hmêl ta vur vur viau mai. Ngawi reng chuan kan inzui pheia, a hmuh loh lai chuan ka phone recorder chu ka ona.

“U Rami kha i thah maw? Engvang maw?” tiin khumah chuan ka nêm mu a, a chungah chuan ṭhu in a duhawm thei ang ber chuan ka ena. Hlim tih hriat tak hian a mit chu a de sar sara, engkim ka hriatchhuah vek a ngai a ni.

“He hun hi ka nghâkhlel asin, min lo duh ve tih hi âwih a har hle mai” tiin ka mawngah chuan a rawn ṭhâm tawn tawna. Hrehawm ti viau mah ila hetianga ka tih loh chuan kei min neih duh hian min tina mai ang tih pawh ka hlau hlel lo.

“Ni e Rami kha in nupa inkâra inrawlh turin ka thlêm a, a tirah chuan a duh ngeia. Mahsela eng emaw ti lai aṭang khân a duh ta tlat lova, ka ruahmanna a tih chhiat hlauin ka that a, in pa an rinhlelh theih nân lehkha ka hnutchhiah bawka, mahse engmah a thleng leh ta lo a, mahsela ka duh ang ngeiin in nupa kar a buai ta ngeia, i chhuak te kha ka lâwm asin” tiin a nui deuh suka.

A sawi zawm leh mai dawn emaw ka tih lai chuan min rawn fâwp thuta, ka chhâng lêt lo nangin ka hnar lêm lo. A chhan chu hnar leh chiah ila chuan ka ruahmanna a chhe vek thei, han tlân chhe ringawt turin ka nau pai a lian tawh si a, ka tân tlân thui hman a ni dâwn lo tlat ani, keimah bâkah ka naute ka ngaihtuah ber angai rih miaua.

Phur lo zet chuan a mi fawh na leh khawihna chu ka dawha, “A nihchuan engtin nge i kohchhuah” tiin a mi fawh-na ata chu ka awmsawn deuha “Awlsam lutuk, ka vau mawle. A ni pawh a putea nên an khawsak dân tenawm zet video ka neia, chu chuan awlsam zetin ka ko chhuak a lawm, nang ka neih theih nân che a nih chuan engmah pawisak ka neilo” tiin min rawn fâwp leha.

Nui sakin ka chhâng leta “Keimahin chêt ka la ang” tiin a kawrkilh chu amal te te chuan ka phelh saka, a  phûr hmêl chu ka hmuh hmaihlo. Chutah a kâwnghrên chu la chhuakin a kut chu ka phuar sak mawlh mawlha, a tal chhuah mai loh nân a nghet thei ang ber chuan ka phuara.

A âwm vêl ka chûl sak chu nuam tih hmêl zet hian a thaw hawk a, a kap lam pawng ul ka hmuh chuan ka luak a chhuak ut ut thei mai. “Tikhan min lo nghâk lawk la, ka luak a chhuak deuha bathroomah ka va kal lawk ange aw” tiin ka chhuahsana, rang zet chuan kawngkhâr lam chu panin ka hawn rual chuan tu emaw ka su dawta, ka phu nasa ngei mai.

Mahsela ka pasal hmêl leh Police hmêl ka hmuh tâkah chuan ka thaw huai mai. A âwmah chuan ka bei ta thlawpa “Roomah sawn ka phuar bet, ih... min khawih luih a tuma, amah vek saw u Rami that tu pawh kha” tiin ka mittui chu a tling pama, ka pasal hmêl ka hmuh tâkah chuan ka rilru no a chhuak a ni ber mai.

A thlazâr hnuaiah chuan ka him dâwn tih ka hriat avâng te pawh a niang “Officer” a tih tâkah chuan Police ho chu u Hminghlua ka phuarna lamah chuan an kal zui ta vata, u Sawmpuia chuan min kuahin ka chalah chuan a hmuiin a rawn nawr vang vanga.

“Hetiang mi a ni ang tih ka ring pha lo” ti a ka phun sep sep lai chuan u Hminghlua thinrim au ri chu kan hre zuia, Police ho chuan kawl nên an rawn hruai chhuak a, keichu rum zetin min rawn en bawk. “Malsawmpui in nu zâwk khân khumah mutpuiah min sâwm tih i hria em? Nupui tenawm tak i nei ani” tiin keichu rum zet hian min rawn ena.

Kei erawh hlauhthâwnna hlirin ka la khata, ka taksate chu a khûr dar dar reng mai. U Sawmpuia chuan a thusawi chu a âwih mai ang tih pawh ka hlau “Ring miah suh aw, finfiahna ka duh vâng chauh a ni. Officer u Rami chhûngte kha koh tel an ṭha ang, an hriattur thil ka nei ani” ka tihchuan an ni pawh an bu nghata.

U Sawmpuia pawh chuan min en ran bawk, a hmela zawhna lang chu ka hmuh hmaih lo “Stationah” ka ti ta ringawta, a ni pawh a bu ve nghat mai.

U Rami chhûngte hmaa u Rami leh u Hminghlua ruahmanna te, a putea nên an chungchâng bâkah a tualthah chhan a sawi zawng zawng ka record rûk ka play chu an thinrim hmêl hlawm hle a, khawih châk tih hriat zet hian u Hminghlua chu an en hlawma, a âwm ve reng. Tualthahna hial thleng chu a chhûngte tân chuan a na hle ngei ang.

Station aṭanga kan haw lai chuan u Sawmpuia chu ka en ha a “Engtin nge Police kha rawn hruai nachâng i hriata?” ka tihchuan a ngawi deuh vung vunga, mak ka ti tak tak. Rawn haw tur khân ka ti ringawt kha ania Police a rawn hruai ang tih kha ka beisei pha lo hrim hrim.

“Awlsam lutuk, Hminghluan i nite ina i haw tih a hriat aṭang khân ka ringhlel mawle. A chhan chu nangin i haw tih i hrilh loh thu i sawi tawh kha, kha kha keichuan ka ngaithla liam mai mai hleinem, khatia rawn haw tura min tih tâkah kha chuan ka ringhlel nghala, a chhan chu nang hian i mangan hunah lo chuan min ko haw dawn lo tih ka hriat avâng ani” a rawn ti leh dap dapa.

A sawi dik ve reng, tihbuai ka hreh avâng hian a hnathawh lai chuan ka ko haw duh ngailova, nu Ṭha-i a awm tho bawk nên amah ka in puih tir mai zel kha a nia.

“Ka ngaihtuah loh thil i lo ngaihtuah leh daih bik tawh a nimaw? Ka hlauhthâwn hman zia kha ilo thleng har lutuk te kha engtia han tih chi nge tih ka hriat tawh loh avângin ka dawi kual ta tawpa, khatiang rilru sual kha a put ka ring pha ngailo” ka tihchuan a bu nghat nghata.

“Mi hi rin chin tâwk kan thiam a ngai reng a sin, mipa ṭhian nei tawh lo la ka ti khawp mai. Tûn ang thil hi thleng nawn tawh lo sela ka duh bawk, ka hlauhthâwn hman zia kha i hre kher lovang” a tihchuan ka bu nghat nghata.

“Ka tihpalh, i duh ang ngeiin nangmah lo mipa ṭhian ka nei leh tawh ngai lovang. Ka ṭhian anga ka lo enin hetiang ngaihtuahna sual a lo nei tih hi âwih har ka la ti reng mai, engvanga hetiang taka inthlâk danglam thei nge maw anih le?” tiin ka ngaihtuah vang vanga.

A hma te kha chuan a felin keipawh in ka ngaina a, mahsela tûn hnua a mizia ka hmuh leh kha chu amah lo ang mai a ni. 

“Fimkhur a ngai reng a sin, mihring chu kan inthlâk danglam thei, kan sual theia kan fel leh thei bawk. Tumah hi ring bur lo la ka duh, tin nangmahin risk lo la tawh lo la ka duh bawk. Ka chân theihna tur che thil lo ti tawh hauh suh” a rawn ti dam leh dapa.

Keipawh chu ka bu nghat nghat mai “Mihring hi kan duhâmna leh hmasialna hian min va hruaisual thei nasa tak em. A tîrah te kha chuan khatiang a ni ngai lo a sin le, a tâng rei viau dâwn lehnghâl, tualthah duh hial khawpa keimah avânga a awm kha kei hi ka lo ṭha lo viau em ni le?” ka ti leh sapa.

Hrehawm ka ti ani, midang vâng emaw ka tihkha keimah avâng zâwkin a lo ni a. Keimah avângin nunna hlu tak lâk a ni bawka, hetiang chuan pângngai takin ka awm leh thei angem tih pawh ka hre thiam ta lo, ka ṭhian emaw ka tihchuan a rûka min lo duhin keimah avângin tual a thata, tûn hnuah chuan ka pasal bâk mipa hi nêl tam chi an niin ka hre ta lo.

Ka beisei loh thil thleng hian keimah thlengin min nghawnga, hmangaihna hian mihring a lo tihchhiat theih zia ka hre chiang ta bawk. Infiamna tual emaw kan tih lai hian ṭhenkhat tân erawh an nunna hnâr alo ni a, ṭhenkhat tân vêk an thih phahna a lo ni leh si. 

“Neih tur atâna duhthusam alâwm i nih, kei ang bawkin i mawina in a ai kaiha, mahsela chu a duhna che chu a ṭha lam zâwnga hmang lova a chhe lam zâwnga hman a thlang a nihkha, kan hmangaih te chu thil ṭha ṭha kan duhsak ṭhin” a rawn ti a.

U Sawmpuia chu ka en vang vanga “Tun aṭang chuan nangmah bâk mipa ka hnaih leh tawh lovang, a ṭhat loh zia ka hre chiang ta bawk e. Min ngaidam rawh aw, nangmah vângah ka lo ngaia, mahsela a bulpui ber ka lo ni zâwk si a. Hrehawm ka ti, keimah avânga thil thleng hi theihnghilh a har tawh dâwn a nih hi” ka ti sepa.

Ding datin alamah chuan min pawt hnaiin min kuah zuia, ka chhipah chuan a khabe nghat in a thaw chhuak zui ham ham bawk. A âwma ka bei chiah hian ka thlamuang leh ṭhin, ka pasal ângchhung tluka ka tâna himna tur thil dang ka hre bik lo.

“Chutiangin ngai mah ta che, nangmah avângin engkim a lang chhuak zawk a nih hi. Ka nu te pawh zaninah an rawn haw dâwn a, rawn zân haw an tum a nih hmêl, chanchin ka hrilh khân an ngaihtuah deuh che aniang” a tihchuan ka ṭhen saka.

An zinchhuak a, rei pawh châm theilo in keimah avânga an rawn haw leh dâwn tih ka hriat chuan ka inthiam lo zual “An pahniha hun hman duhna hun an neih khât tehlul nên ka tihchhiatsak ta vek a nih hi, a hrehawm ka ti” tiin amah chu ka en chho a.

Ka biangah chuan rawn chulin min nuih var vara “Monu huaisen leh fing zet an nei che hi an lâwm zâwk a sin, thil a thim zawngin thlir tawh lo la. Hlim taka awm i tum zâwk teh ang, kan naute a rawn piang ṭep tawha. A nu ber i indawm kûn reng chuan a chi loh viau ang” a tihchuan ka nui ve ta haka.

In kan luh rualin Tepuii chuan min ngaihtuah zet hian min kuahin chanchin min lo zâwt mawlh mawlha, thil thleng chuan a ṭhawng ve hle te pawh aniang mak a tih thu a sawi ve renga.

Chhan dân tur ka hre biklo, u Sawmpuia chuan room lamah hahchawl turin min hruai chho a, keipawhin ka hnial bik lo. Vawiin thil thleng leh kan station awm rei nên ka ke hi a kham na ut ut reng a, tawrh a hrehawm lam mah a ni.

A tûk zîng ka tho chu ka nu leh pa chuan min lo kuah vatin min ngaihtuahzia te chu an sawi ve mawlh mawlh a. Ka pasal chhûngte min hmangaihna hian ka nu leh pa tak tak hmu pha lo mah ila nu leh pa tak tak bula awm ang maiah ka in ngai ṭhin.

U Hminghlua chanchin te Police a ni chunga a thil tih chuan kan khua chu a khah hneh tawh viau aniang an sawi sup sup renga, u Rami chhûngte pawh ka chungah an lâwm bawk aniang rawn lengin an lâwm zia thu chu min hrilh mawlh mawlh renga.

Kei erawhin engmah sawi tûr ka hrelo, keimah avâng pawh a niin ka hrelo, ka rinhlelhna a lo dik kha kan vanneih puia, u Sawmpuia rinhlelh ve na nên kan ring dik a nimaia, chutianga keini in tihvak kan neih âwm pawh ka hrelo.

Zânah chuan in lêng neuh neuh kan nei leha, ka chunga thil thleng kha an lo hre ve ani ngei ang a khât tâwkin inlêng kan nei renga. Ka nu leh pa pawhin min rawn be tawha, nu Ṭha-i te'njn ngaihtuah lo turin an lo tikha a nia, an ni pawh rawn zin an tuma, ka nau neih hma ngeia rawn zin hman an tum thu an sawi chuan min ti hlim ve takzet.

Ka thla hual an tih avângin chhungkua chaw kan ei khawma, kan tam viau. Chhûng an ngah bawka kan ri luih luih mai, kei erawh u Sawmpuia chuan room-ah ka chak loh deuh avângin min awmpuia, ka nau neih a hnai tawh nên ka pum pawh a na ve zeuh zeuh tawha, kan inveng ru reng a ni mah tawh zâwk.

“Ka nute pawh naktukah an lo thleng tawh dâwn a, inhnuai lamah kan awm ve siloa a nuam lo e” ka ti deuh niah niaha, chhûngte zawng zawng an awm bik laia a awm lo nihchu a nuam viau lo tlat a tih ni.

“Chutiang ngaihtuah suh chaw ei laiin kan lan kha a tâwk, i taksa a chak ṭha tâwk lo tih i hriat kha, i tâna ṭha lo tur chu tilui lo la ka duh” a tihchuan ka bu ta nghata, tûnlai ka mu ṭha lo nên a sawi ang tak tak hian ka taksa chu a chak tâwk lo a, kan chhûngte pawh hian a hma ai min duat zual bawka, ka damloh pawhin ka hrehawm ngai lêm lo.

Ni a liama ka nau vei chu damdawiinah lûtin ka nu leh nu Ṭha-i chuan min awmpuia, Tepuii leh u Sawmpuia pawh an rawn kal zawm ve reng bawk. Ka vei rei bawk nên ka chau tawh bawk si chu u Sawmpuia mangang chuan zai chhuah mai te a rawta.

Mahsela kan chhungte chuan an rem ti lo thung, ana ka ti lutuk chu ka ṭhen chawk chawk mai. Nau nei tawh te'n anat zia an lo sawi ṭhin kha ka tawng ve ta a, rin phâk bakin a na bawk.

A tâwp a tâwpah chuan fanu duhawm tak ka nei ta, kg 4 leh gram 200 zet a ni a, lawm a hlawh nghal viau mai. Kan chhûngte hlim lutuk lah chuan pawm an inchuh nghal ti tiha, u Sawmpuia erawhin kan fanu pawh en hmasa lo in keimah chu min pan hmasa a, thlan tui nên chau zet chuan ka nuih lui saka.

“I ṭha em? I na lo tiraw?” hlauthâwng deuh taka a rawn tihchuan ka ṭhat thu leh min ngaihtuah lo tur chuan ka hrilh zuia, ka vei rei ngaihtuahin ka inhliam nasa lo hlauh a a vânneihthlak ngei mai.

“Ka hmangaih che” tiin min nuih zui var vara, keipawh chuan ka lo sawi lêt ve sap bawk.

Damdawiin aṭanga kan chhuah hnu ah phei chuan min âwl hneh hlawmin bawihtei phei chu a hnute hnêk chhûng chiah ka chang ti ila ka sawi sual lo ang. Ka nu leh pa in a hmingah Lalmalsawmi tih an sa a, mawi ka ti viau mai.

Zânah chuan bawihtei hnute ka pêk zawh ah ka pasal hnathawk lam chu ka pana. “I la ngah em?” ti a ka va in post sexy vêl chu min nuih deuh suk mai. Chutah a lehkha chu khup thawkin min rawn pawm kâng zui nawlha, nui har har chuan ka lo kuah lêt vat bawk.

“In danna i ei rih mai aniang chu” tiin khum lam chu phur zet chuan min panpui nawl nawla.

Ka hlim a ni, tûnah chuan kum tam ka lo nghah mipa nên chhûngkua dinin a nupui ka ni ta si a, beidawngduhloi chuan a beidawn duhlohna rah chu a nghâk chhuak ta e.

A TÂWP TA