CHAPTER 8

MALSAWMPUIA

CHAPTER 8 

Damdawi inah chuan kan buai bawk nên dul puar luah chung chuan ka kal ve leh ta tho a, keimah ka la chak ṭha tho bawk nên a pawilo turah ka ngai a, ka inenkawl ṭha tho a ka pasal pawhin min hnial ngai lêm lo.

Chhûn chaw ei tur a ka pasal awmna lam ka pan lai chuan u Rami bawk ka hmu leha. Min la melh rum em em zui, kal pelh mai ka tum lai chuan a thu rawn sawi leh avâng chuan ka ding chata.

“Hlim taka i awm reng ring suh ang che, ka nun tichhia a ka dinhmun i luah man hi i la hmu khawp ang, ka en liam mai mai dawn lo che ania” a rawn ti zuia. Engvanga min haw reng nge maw anih le, a lakah ka inthiam bik hauh lova, mahsela mi pasal ka chhuhsak a niloa, u sawmpuia'n a duh a thlang mai a nia, chutah chuan keiin thuneihna ka neihloh ang bawkin a ni pawhin a nei loa.

Duh thu hmun kan neia, kan mi duha chuan a duh a thlang mai a ni zâwk reng sia. “En teh keiai a i u zâwkna ah chuan ka zah takzet che, mahsela ṭawngkam mawi lo tak hi min hman khum reng lo teh. U Sawmpuia hian a duhzâwng thlang turin thuneihna a neia, a nun a ni bawk keini lo tih danglam theih lah a ni hek lo, a duh a thlanga chu chu pawm thiam i tum tur ani zâwk lo'm ni? Mipa dang tam tak an awm laia, engvanga ka pasal kher hi rawn zar buai reng nge maw i nih le?” ti ve fakin ka en ran a.

A hmêlah chuan min huatna chiah ka hmu thei a, a awmdân chu min tihnat duh mai hmêl te pawh a pu. Thusawi a tum leh chiah tihah u Sawmpuia aw rawn chhuak avângin a tâwp leha, chutah na zet chuan min rawn su in a kalsawn zuia, keipawh chhuatah ka ṭhu thla deuh hnawk mai.

Ka au deuh ṭhat a, chutih rualin u Sawmpuia chu ka bulah a rawn thleng zui vata. Ka pum chu ka dawm chata, chunga na a nih loh avâng chuan ka thaw huai mai “Kan hmeli mai mai chuh! I ṭha em Duati?” u Sawmpuia chuan a rawn ti thuaia, keipawh ka lo bu nghat mai.

“A duh ve ngang che anih kha, chuti nilo se hetiang hian a awm nâng. A thinrimna kha a âwm ve tho alawm, keiai ilo ngaizawng hmasa bawk si a, a tân pawh a ngaihzâwng chhuhsaktu chan ka changa, a thiam awm a lawm” ka ti sapa, a rûk tak erawh chuan ka thinrim ve takzet, mahsela ka thinrimna ka tihlan chuan u Sawmpuia hian a chungah thil ṭha lo tak a tih duh ka rin avângin ka insûm hrâm hrâm a ni ber mai.

Dim te chuan min kai tho in min pawm zui nawlha “Hahdam takin ka office ah lo awm tawh ang che, tin, naktuk aṭangin i hna i châwl rih tur a ni bawk. Him leh dam taka nau i neih hma chuan khawiah mah i vâk chhuak tawh lo ang, ka tel dawn chauhin i vâk chhuak tawh ang” a ti mawlh mawlha, a thu chu an khauhin nam nul mai mai chi a nilo tih ka hria.

Hetiang hian min la ti ngai lova, min ngaihtuah vâng zâwk a ni tih ka hriat avâng erawh chuan ka haw lêm lo thung. Ka tâna ṭha tur hi amah bâk hian an ngaihtuah dâwn lo tih ka hria, ka pasal a ni a. Pasal a nihna anga a chêtzia a a lan tir hian min ti hlim ṭhin.

A office ah chuan inzui lûtin sofa ah chuan min mut tir zuia, a ni erawh hna ala ngah bawk nên rei pawh awm lovin a chhuak leh zui ta thuaia. A awm lo chiah chu a reh nghal duk mai, Tepuii lah a buai ve dâwn bawk si a, ka phone chu phawrhin recap chu ka en mai maia.

Tûnlai chu Chinese movie an recap hi hmuhnawm ka ti a, ka en nasa thei viau. Mahsela a ṭhen hi chu an film hi a in ang put zel maia, hmuhnawm ka tihdan erawh a ngai reng thung. A mipa lerh leh nupui sawisak hmang mahsela lo hmangaih ru reng si lam pang hi hmuhnawm ka tia.

Mahsela ka tawn tur erawh chuan ka duh hauhlo, keichuan mipa nupuite duat thei deuh leh rinawm deuh ka duha, u Sawmpuia nihna chiah a ni bawk. Kan inneih hnuah hian ka ngaihṭhat lohna tur zawngin a awm ngailoa, hmeichhia phei chu a hnaih lo tih tluk ani.

Damlo erawh chu a hna a nihna anga a enkawl a ngaih miau avângin keipawhin thik enah ka en lo.  A rawn lêt leh meuh chuan haw a hun ti tih tawha, tûnlai chu hna kan bâng hma ṭhin a, kan hahdam phah viau mai.

“I pum chu ala na em? Dik lo a awm lo maw?” a hlauthâwng tih ka hria. Mahsela ka tlu na lo hlauha, a pawi em em ka ringlo, ka lu thing nar narin ka ṭhat thu chuan ka chhânga. Min ngaihtuah ṭhin bawk si a, a ngaih ti ṭha lo zawnga awm ka duh bik lo, bâkah ka pum chu ka sawi ang tak takin ana a awm tawh hauhlo.

“Haw tawh ang ka chau riau mai” ka tih tâkah chuan engmah sawi buai neilo hian min kai in min chhuahpui zuia, khua chu a thim lek lek tawha. Thlasik a inṭan bawk nên khaw awm dân chu a vawt deuh vara, chutih rual erawh chuan boruak chu a nuam hle thunga.

Car-ah chuan min ṭhut luh tirin a kawr lum chu min sintîr zuia, keipawhin ka hnial lêm lo. A vâwt ka ti miaua, ka khûr deuh hlak hlaka, ka biangah chuan rawn fâwp zauhin a tlân chhuak zuia. “Haw veleh in ti lum nghal ang che, i dam loh ka duh hauh lo ania, i dam loh vaih chuan ka hrem belh chhah ang che” ala ti zuia.

A tih ngei pawh ka ring, a chhan chu hna hi chawl tura min tihna a rei tawha. Ka châwl duh lo kha ania, in tina vaih ila chuan min hauh belh chhah duh dâwn tih ka hre chiang lutuk tlat.  Min inti thlahrung zo vek, bâkah u Rami kha khatianga a rawn chet duh kha ka ring miahloa, ka lo inveng hman lo kha ka vanduai teuh zia ka hai bikloa, chawlh rih mai pawh ka pawi ti ta lo.

“Paa, ar bawp tui tâwk ka ei châk e. Min lei la, nu Tetei te in bulah khân a tui thei lutuk” ka tihchuan a nui suka, “Tunah chu chu i ei châk amaw?” a tihchuan ka bu nghauh nghauh mai, kan khua hi a zau ang ngaihtuahin kan lêng peih ve ṭhin bawka Tepuii nên hian hmelhriat kan ngah viaua, mahsela u Sawmpuia tih loh mipa erawh ka melh ngai lo tluk a ni.

“Ka ei châk lutuk hi ka thi thei mai dâwnin ka hria, min lei ang tiraw?” ka tihchuan a rawn nui deuh hawka, ka awmdân hi a naupang chhia a ti ṭhin ngawtin ka ring, mahsela ka insûm thei ṭhin lo. A bulah hi chuan pangchang taka awm hi nuam ka tia, min duat hi ka thlahlel a ni ber mai.

Chutia kan tlân zel lai chuan kan hmalam kawngpuiah hian rawlthar lo intibuai an awm tih hriat tak hian tlân tlang theih loh turin an lo insual nuaih nuaiha, kawngpui lai takah an awm bawk nên u Sawmpuia chuan car chu a ti ding dawta.

Thâwm lah chu a bengchheng em em lehnghâl, thinrim leh in thah pawh pawisa miah lova an au ri ka hriat chuan min ti hlauthâwng ngei mai. “Ka va ṭhelh ange” ti a u Sawmpuia kal mai tum chu ka chelh nghal vata.

Va kal turin ka duh hauhlo, an nunrawn hmêl hlawm si a an lo tina duh ve mai ang tih ka hlau a ni ber mai. “Kallo mai rawh, tlân tlang dân ngaihtuah zâwk rawh. An sual hmêl si a, kal miah suh aw” tiin ka pawt deuh ṭunga, an tam si a a ṭhelh theih ka ring hauh lo, ṭhianho intibuai tih an hriat reng lehnghal.

Hlauthâwng zeta ka en lai chuan min nuih sukin “Ka naute an nih saw, ka thu chu an zawm em em ang. Hlauthâwng lo la, ka hrechiang a lawm, an inti thiamlo palh a nih dâwn saw” tiin ka kut chu a dahsawna, hlauhthâwnna mitmeng nên ka lo en lai chuan hahdam tura min ti leh in a chhuak zuia.

An lam pana a phei lai te chuan thinphu dep dep chungin ka en renga, an lo khawih ve mawlh ka hlau. Tûnlai rawlthar ṭhenkhat pawisak neilo tam tawh zia ka hai bik lova, ka pasal chu an lo tina mai ang tih ka hlau a ni ber mai.

Mahsela ka hlauhthâwn ang em em thleng lo in u Sawmpuia a thlen phei hnu lawkah an kal darh diaka, chulai vela awm ve ho pawh chuan an hau bawrh bawrh bawk. U Sawmpuia chuan an zinga pakhat chu a be mawlh mawlha, eng thu nge an sawi erawh ka hre thei lo nângin a mi biak chuan a lu a bu leh nghat ṭhin a, u Sawmpuia chu a zah viau tih pawh ka hria.

A rawn lêt leh rual chuan ka lo kuah deuh rawk rawka, ka lungphu pawh a la pângngai theilo. Khatiang thil kha ka hmu ngai lo bawk nên rapthlâk ka tiin ka hlauthâwng em em ringawt, ka hnungah chuan rawn bêng thek theiin engkim a ṭhat vek tawh thu chu a sawi sup supa, mahsela ka la pângngai thei meuhlo.

Ka naupai nên engkimah ka hlauthâwng hma a, amah chu a nat ve ka hlau a ni ber mai. “Khatiang thilah in rawlh ve tawh miah suh, ka ngaihtuah lo theilo che. Lo khawih ve palh ta che sela, engtin emaw awm ta la kei hi min ngaihtuah ve la, i fa ka paia, ka hrin a hun ṭep tih i hriat kha, ka nau neih hunah nangmah bâk ka bula awm tura duh ka nei dâwn lo, chuvang chuan dam taka i awm reng a ṭul” ka tihchuan a bu deuh nghata.

“Ka hria e, a thleng nawn tawh lo ang. Min ngaihtuah lo la, i pasal hi keimah ka inveng thei ania, khawiah mah ka kalsan dâwn lo che, i nau neih hunah pawh i kiangah ka awm ngei ang tih ka tiam a che. Khawiah mah ka kalsawn dâwn hleinem” a tihchuan ka bu nghata, engmah ka sawi tawh lêm lo.

“Le i ei châk kha an lo inkhar hma in kan ei phawt dâwn ania kan thleng ṭêp e, hlauthâwng suh ka tihkha” tiin ka chalah chuan a rawn fâwp zauha, keipawh ka nui leh ta ver vera. Nau ka pai hnu hian ka ei châk hi a tam zualin eilo in ka awm theiloa, ka ei loh chuan ka thi mai dawn te hian ka hre ṭhin a, u Sawmpuia pawh hian min hrethiam thei viau mai.

Kan châwl haw ta nge nge a, arbawp lian zet zet chu theitui nên chuan ka hmeha. Ka ei tam ngei mai, ka pasal chuan min khap hauh lo in ka duh zat zat ei tur chuan min ti zuia, keipawhin ka hnial lêm lo ka puar awk thleng chuan ka eia, ka ei zawh meuh chuan ka thaw hle hle mai. 

“I duhtâwk em ni?” a tihchuan ka bu nghata, ar bawp chu panga zet ka eia. A ni erawhin pakhat bâk a eilo, hetiang lam hi a ngaina lo hrim hrima, a ei tam chu ka ring lo sa kha a nia. Mahsela kei erawh in ka ei puar awk mai, theitui chu tlâk leh papin amah chuan a man chu a pe zuia.

Muangchanga in zui chhuakin ei châk ka la nei em tih vêl chu min zâwt a, ka lu ka thing nar nar mai. Tûnah rihchuan ka la puar lutuk tlat, ka ei hnem bawk nên zanriah ka ei thei angem tih pawh ka ngaihtuah tawh zâwk.

Thâwk la ham hamin ka pum chu ka chûl zauha “Ka puar vek mai, hetiang chuan zanriah pawh ka ei theih ka ringlo, mahsela zân reia ka ei tur kha min lei leh la, thei lam pawh ka ei châk” ka tihchuan ka biangah a rawn piai zauha.

“Piberin i tihte chuan kan lei zêl mai aniang chu, kan naute hi a rawn pian vat ka duh chuan piber thu hi ka âwih angai a lawm. Naute hi nei vat vat la ka duh” a tihchuan ka nuih deuh haka, “A rawn piang ṭep tawh a lawm, thla a liam leh meuh chuan a rawn chhuak châk zek zek tawhin ka ring, a pa hian a duat dâwn sia ka lo huphurh lâwk, a nu zâwk hi min theihnghilh daih ang tihte pawh ka hlau a lawm” ka tihchuan a nui ve suk suka.

In kan thlen hnu lawkah Tepuii chu a room aṭanga rawn chhuakin min hau nghal bawrh bawrha “In nupa a in awm leh min hre chang lo ziah mai, min hawsan ziah lehnghâl ka lâwm tawh vaklo, nangpawh hi i ṭhianṭha ber ka nia. Pasal neih tak avânga min hlamchhiah lutuk hi ka lâwm hauh lo ania aw” a rawn tihchuan ka chhân dân tur hrelo chuan u Sawmpuia chu ka en ringawta.

“Ka nau, scooty- i ken tho kha, i ṭhiannu hian nau a nei ṭep tawh tih i hriat kha, i monu a ni tel tih hria la. Duat viau zâwk ta che, ni i nih duh chuan duat hle la a nimai, ka u lahin fa a la nei mai dawn silova, i u Davida lahin tlangvâl nuam a la ti a, kan fa chiah hi duat tur i neih chhun anih hi” a tihchuan Tepuii pawh a ngawi rauh rauha.

“Min ngaih thah hrim hrim, ka lâwm theilo. Chutia a nau neih a hun tawh tih i hriat ve reng si chuan tinge damdawiin ah ila kal tir ziaha, a chak tawh silo. Buaina te tawh theih a nih hi, nakinah in inchhîr hma hian hna te hi châwl rih rawh se, a duhleh nau a neih zawh lamah a thawh theih reng a lawm” Tepuii bawk chuan a rawn ti leha.

Kan nu leh pa te erawh chuan min lo nuih var var reng thunga, “A châwl dawn reng a lawm. Amah hian kal duh lui reng lo sela chuan ka chawlh tir daih tawh ang, i ṭhiannu hian a thu a duh lutuka tih luih theih a nih loh hi maw? Pa vawiin lam teh enge i an?” tiin pa Hriatpuia lam chu a en ta daiha.

Chutia an inkawm khâwm tâkah chuan Tepuii nên in chung lamah kan inzui chho a, ka pum a lian ve tawh bawk nên dik tak chuan stepa kal pawh a har ve ta lam mah chu a ni e. Muangchang chuan kan chho duna, chhûn lama thil thleng chu ka hrilh pah mawlh mawlha, a chek deuh hlak hlak mai. 

“He nu zahna hrelo lutuk lah hi a, midang bulah lah chuan ka u lo tibuai ang che in a sawi ziah lehnghala. Ka u i zar buai hneh lutuk avânga inṭhen an nih thute a lo sawi lehnghâl, zahna hi a hre thlâwt lo, engtin nge damdawiinah te hian a la thawh reng ngam ni? Ka hua a nia, a ṭawng thei mah mah dâwn tlat” a ti chu ka pawm viau mai.

Mahsela sawi pui vak erawh ka tum lo “I u nên arbawp kan ei ṭeuh a, ka puar lutuk kan mu hah châwl lawk teh ang. Ka pum hi a nuam lo deuh riaua, chawlh hahdam ka mamawh in ka hria, chaw pawh ka ei peih ka ring lo” ka ti nghal zata.

A ni pawhin min lo thlâwp khawp mai, roomah chuan luhsanin kan nupa khumah chuan ka mu thla a, room chhûnga kan nupa thlalâk in tar ran chu ka ena. Hmuh nuam ka ti ṭhin, u Sawmpuia hlim hmêl hian min ti hlim tel ve bawka, min nei hi a inchhîr angem tih ka ngaihtuah fo ṭhin a, mahsela ka bulah hrehawm ti hmêl a lan tir ngai loh avâng hian a ti bik lo ni chuan ka hria.

“Engah nge hrehawm a tih ngawt ang, a hmangaih ve tho che alawm” tiin keimah leh keimah chu ka in bia a, ka pum chu ka chûl hauh hauh bawk. A rawn che leh talh talha, ka hlim ṭhin, ka fa ngei ka pum chhûngah ka thisen ringin a nung ve ta chu a nia, mumang lam ang tih châng ka la ngah.

U Sawmpuia ka duh ṭan hunlai te, min hnar fo lai leh rilru na taka ka awm ṭhin lai khân hetiang dinhmunah hian kan awm ka ring pha ngailo. Inneih phei chu sawiloh min duh lêt kha ka ring ngai lo hrim hrima, mahsela ka duh hneh êm avâng khân ka tibuai reng zâwk kha a nia.

“Naute nang hi kan hlimna belhchhahtu rawn ni ngei rawh aw, i pa tân hian a hmangaih ber rawn ni la. I nu tân hian malsâwmna rawn thlen ang che, i nu rilru i hre ve veka, he inchhungah hian hlim leh zualna rawn thlen ngei ang che aw. Nangmahah ka beiseina zawng zawng ka nghat ania, hrisêl takin rawn piang ngei ang che” tiin ka phun sapa.

Ka chûl hliau hliau reng bawk, rawn piang chiah sela kan chhûngte hi hlim dân tur ka ngaihtuah thiam pha lo zâwk. Tûn aṭangin an ngaihven nghal êm êm a, engtin emaw hlek ka awm pawhin an phi deuh chung ṭhin a, he inchhunga ka lawi lût hi hrehawm tihna ka nei ngai hauh lova, tûn thleng hian lawmna tur hlirin min la hmuak a, ka nunah hian ka lungawi tâwk em em bawk.

“Ka nupui chuan enge i ngaihtuah veng venga, keimah lo ngaihtuah ka phal hauh lo ania” u Sawmpuia aw ka hriat rual chuan kawngka lam chu ka melh vata, ka nuih nghâl ver ver bawk. 

Ka bulah chuan rawn kal hnaiin ka chalah chuan a rawn fâwp zauha “Enge khati taka ilo ngaihtuah nasat thil chu ni a?” a rawn tihchuan ka nuih deuh pât pât a, amah bâk ngaihtuah ka nei ngailo tih hi chu hre ve tawh tur chu a ni a sin mawle.

“Nangmah, chuan kan naute nên a rawn pian hun tur ka suangtuah mai maia, rawn piang vat sela ka ti. In nghakhlel tawh bawk si a, hrin vat min ti chak alawm, i inbual dawn em?” ka tihchuan “A vawt tawh emai ka peih rihlo, kan inthlâk lawk ange” tiin a thawmhnaw bâwm lam chu a pana, ka lo nui hak mai.

Thlasik ah chu pawh zânah lehnghâl inbual chu a peih awm vak loh rêng a ni. A inthlâk chu ka en renga, a châng chuan kan pahnih nun hi thawnthu ang maiin ka hre ṭhin a, tawpna hlimawm ka beisei lova, mahsela ka beisei phâk loh chu tawpna hlimawm chuan min lo hmuak reng zâwk si a.

Ka bula a rawn mut rual chuan ka lo khan leh chata, a pangtilum tello hi chuan mutthilh harsa ka ti tawha. Damdawi in lama a duty zân te hian ka ngai veng veng zela, mut tlân reng tâkah chuan ngaiah ka neiha, pasalte tello a mut hi harsa ka ti ni berin ka hre tawh.

Min kuah betin ka dulah chuan a kut a rawn daha, heipawh a zantin tihdan a ni. Hei chen kan innei ve ta a, tûn thleng hian sawisêlna tur ka la hrelo, min enkawl dânah te, a nungchang leh a mizia ah te hian han sawisêl tur ka hrelo a ni ber mai.

“Thei chu fridge ah ka nu in a dah kha aw, i ei châk chuan i ei zel dâwn ania. Mahse ei tam lutuk lo la, damlohna a tama i na ve hlauh a nge” a tihchuan ka bu nghat nghata, a âwm a hmai nawr chuan ka thaw chhuak ham ham bawk.

Ka hahdam nghâl huai huai thei mai, pasalte âng chhûng ai baka hahdam hi a lo tamlo a nih hi.

“Muhil tawh rawh, muttam i mamawh tih i hriat kha i mengrei lutuk dâwn tlat” a tihchuan ka hnial biklo, kuah ṭha sauh sauhin a âwmah chuan ka hmai chuan ka nawra.

Ka muhil chauh emaw tihlaiin ka taksa vawt deuh sung sung avâng chuan ka harh chhuak deuh kâwk a, u Sawmpuia chu ka bulah alo awm hauh lova, eng thil nge tih a tum ka zawha min rawn chhânna chuan min ti nghing ve dawt mai.

Engthil nge a sawi kha? U Rami a thi a rawn ti a nihkha, ka hriatsual chu a ni hauh lo. “Ka va kal lawk ange, ka reilo ang. Min lo nghâk lo la lo muhil leh tawh rawh" a tihchuan ka bu ringawta, ka thu hriat khân min ṭhawng a ni ber mai.

Chutah inngaihtuah harhin ka aw ka thian kharha “Engtia thi nge, tun ang hunah lehnghal” ka ti deuh zung zunga, a chanchin ka hriat dân chuan min ṭhawng lo theilo.

“A intihlum a nih hmêl ka kal vat angai rawn lêt har loh chu ka lo tum ang ” a rawn ti leha. A aw ah chuan rilru natna ni chiah silo eng emaw riau hi ka hmu thei.

A âwm ve tho mai kha chen an lo inzui ve tawh bawk nên an inkârah thil a la awm lo tawp chu a nih ka ring lo, chubâkah thihna ani bawk nen ka thik duh lo. A inthiam lo tih ka hria a, kallo tura lo tih tlat kha ka duh lo chubâkah a mawi lah a mawi heklo, nupui sual tak anga min hriat kha ka duhlo hrim hrim.

“Ava zia lo ve,aw le va kal rawh. Engvanga intihlum nge maw a nih le? Va kal phawt la, a rem leh naktukah kan kal dûn dâwn ania” ka tihchuan a bu nghata, a zia zawi zet chu ka hmuh hmaihlo.

Hrehawm a ti viau ang tih pawh ka hria, kha chen an lo inngaihzawnna nên tûnah mahni intihlum a lo ni leh zêl bawk nên keimah pawh ka awm a nuam bik chiah lo, keimahni avâng em ni ang tihte thleng chuan ka ngaihtuah hman vek.

U Sawmpuia chhuah hnuah chuan keimahin ka in ngaihtuah neuh neuha, a thi tih chu âwih harsa ka la ti reng mai. Vawiinah pawh khân khatiang kha a la ni a, engvanga ama nunna la duh ta mai nge a nih ang tihchu ani ka mak tih ber chu ni.

U Sawmpuia hmela inthiamlohna leh natna kha ka hmuh hmaih lo a, thihna mahnisela hmeichhe dang avânga ka pasal na hmêl khân ka awm erawh a tinuam mawlh silo, kei hian mi nun ka lo tichhe tak tak em ni ang? Ka nunrawng ka in ti a, mahsela kha chen ka lo hmangaih tawh han hnar kha ka thei bik silo.

Muhil thei tawh lo chuan ka in let ka in leta, a tâwp ah chuan zinglamah ka muhil ve thei hrama. Tepuiin min rawn kaih thawh rual chuan chanchin chu kan sawi dun mawlh mawlha “Ka u avânga in âwk hlum niin an sawia, amah lo hmeichhe dang a neih avânga a rilru nat zia lehkha ah a ziak e an tia” a tihchuan ka meng phar âwk a.

Ka rinhlelh chu a lo dik chiah tih ka hre thei, engtin nge u Sawmpuia'n angaih ang? Nizân a awmdân dik lo te kha hei vâng hi a lo ni thei angem? Tûnah lah a rawn la haw bawk siloa, tih theih a tlêm takzet a, keimah pawhin hrehawm ka ti, ka pasal leh keimah avângin hmeichhe pakhat chuan a nunna hlu tak a la chu a ni si a, enge thleng leh zêl dâwn le?