CHAPTER 9

MALSAWMPUIA 

CHAPTER 9 

“In ngaihtuah hah suh aw, in thiamloh a awm miahlo. Mi pawhin duh an thlang fo alawm, kan duhthlanna avânga intihlum duh chu an sual tihna a nimai, thiamlohna in nei lo ka u pawh a rawn haw ṭep ang” tiin Tepuii chuan min hnêm malh malha.

Ka nu leh pa te pawh an kal aniang ka hmu hauh lo, rilru nuam lo zet chuan ka thaw leh halh ṭhin. Hetiang thil hi a thleng ang tih ka ring pha lova, u Rami chêt duh dân chuan min ṭhawng hle bawk “U Sawmpuia hi a thih chhanah an puh dâwn sia, Police ho hian thu an zâwt fiah ngei ngei ang” ka ti sepa.

Tepuii pawh a bu nghat mai “Nizanah khân an zâwt tawh a lawm, mahsela a tâng dâwn lo a thiamloh a awm hleinem. Inṭhen avânga rilru na in that ania, a ma thiamloh zâwk a lawm. Mi pawh an ngaihzâwng ten an ṭhen a, an inthat ve kher lo, a rilru têt lutuk vâng a nih hi, u Sawmpuia khân chutiangin a ngaizawng em em pawh a niloa, amahin a zar buai hneh êm avâng zâwk kha ania” a ti leh dap dapa.

A sawi chu a dikna lai chen a awm a, mahsela khaw mite hian min dem ve tâwk an awm dâwn tih pawh hriat reng, ka awm a nuam thei tak tak lo bawk. 

Kawngka chu rawn in hawngin u Sawmpuia a rawn lang zuia, a hmêlah chuan a chau takzet tih ka hre thei, ka hnaih vata. Hlim hmêl a pu lova, rilru na leh inthiam lo hmêl ani ka hmuh ni, keihian mi pahnih inkar ka lo tichhe reng zâwk nge tihte ka ngaihtuah a, hetiang khawpa u Sawmpuia na hmêl hi ka la hmu ngailo.

“I ṭha em?” ka tihchuan a bu nghata, min chhâng lo vin room lamah a chho zuia, ka en zui reng ringawt. Ka nu leh pa rawn lût chuan “Rami thihna ah hian amah vâng a ni si a, hrehawm a ti a nihkha. A zia leh vat mai ang, dawh hrâm hrâm la, a rawn pângngai leh vat mai ang, Rami pawh hetiang thil a ti duh ang tih kan lo ring pha lova, nula fel tak niin kan lo ngai mawle, a pawi tak tak a ni” nu Ṭha-i chuan a rawn ti dap dapa.

Mahse mihring rilru na leh beidawng tawh vêk vêk chuan hlauh an neih loh zia ka hria a, u Rami thil tih pawh chu a rilru na lutuk leh u Sawmpuia a chân hrehawm a tih lutuk vâng tih ka hailo. Keimah ka in dema, lo pawm miah lo ila chuan hetiang hun hi kan thlen kher angai lo nimai tur.

Room-ah u Sawmpuia chu ka zui chho va, kawngkhar ka hawn rualin khuma a lu dawma a lo ṭhu kûn ngul chu ka hmu zuia, a awmdân chuan rilru a tina veng veng thei. A hmaah chuan va ṭhu thla in a kut chu ka chelh saka, a hmela hrehawm tihna nên min lo en lai chuan ka mittui a rawn tling pama.

Engkim hi keimah vâng vek a ni “Ka tihpalh u Sawmpui, in inkârah lo inrawlh lo ila chuan hetiang thil hi kan thleng lo tur, ka thiam loh vek a ni. Keimah vâng vek” tiin ka ṭap zui hlap hlapa, min chhâng miahlo te chuan rilru a tina zual.

In be miahlo chuan chaw ei turin kan chhuk thla a, chaw eikham rualin ka nu leh pa nên chuan an chhuak leh zuia, Tepuii pawhin hna kal lovin in lamah min awm puia, u Sawmpuia awmdân mawlh mai chuan min tina zual a ni, min hnêma ka thiamloh a nih loh thu min hrilh turin ka duh a sin le, mahse eng thu mah a lak aṭangin ka dawng silo.

Tlâi lama an rawn haw lai chuan khumah ka mu a, chaw ei tura min rawn koh pawh chuan ka ei châk loh thu a hrilhin ka mu renga, ei châkna ka neilo miaua ka ei thei thlâwt lo a ni ber mai. 

U Sawmpuia rawn lût chuan min en vang vanga, ka bulah rawn  ṭhu in ka pang chu a rawn deka “I khua a sik bawk silo, tinge chaw i rawn ei loha? In enkawl ṭhat i ngai a sin” a rawn ti supa, ka chhâng lêm lo. Mu meng kar chung chuan ka melh ngai chu ka melh renga.

“Nono, ka chungah i thinrim em ni?” a rawn tih leh pawh chuan ka la chhâng chuanglo, min be duhlo-a a awm kha ka thinrim ve êm ani. Keimah ka inthiamloh sa mah nak alaia min be duhlo kha chu ka inthiamlo zuala, a awmdân khân min tina bawk.

“Rilru hah lai lehzêl chuan hetiang hian lo awm ve lo teh” a rawn ti deuh sup chu ka melh vata, a lungawi hmêl vak loh. Chu chuan min ti thinrim ve takzet “Ka rilru a hah loh bîk i ring em ni? Mahni inthiamlohna hlira ka khah laiin min be duh lovin i awm a, ka rilru tur hi min dâwn pui ve em? Tinge khatianga min biak loh phah nân a hmang leh tur si u Rami kha ilo neih zawk mai loh?” ka ti chu lungawilo leh thinrim tih hriat tak hian min ena.

“Eng ngaihtuahna teh hrep nge maw ilo put le? I rilru kha siam ṭha rawh, ngaihtuahna ṭha lo pui pui kha neih a hun lo” a rawn ti leh chu ka nui deuh haka. Chutiang chuan min ngaia, amah hi chu ngaihtuahna ṭha lo nei tura min siamtu a ni tih hi a hrelo nge a hrelo der zâwk?

“Ka neih mai lohin, in biak duhloh te. I na hmêl te khân an ti chiang viau in ka hria, kei hi engvanga min nei nge pawh i nih tih pawh ka hre tawh hrep lo” ka ti leh chu a kut a phar deuh viau hmana, ka mit ka lo chhing sawk bawk. Mahsela engmah ti lo vin min chhuahsan leha, ka mittui chu a far nghal fep fepa.

Thawh pawh tho chhuak loin room-ah chuan ka inkalh khuma, ka chhûngte ho chu an ngaih a ṭha lo nge min rawn ngaihven ta rêng a “Ka ṭha ka chau deuha, min ngaihtuah suh u” tiin pângngai tak chuan ka chhâng a, kawng ka kalhna pawh chu ka hawng ta bawk.

“A hahthlâk emai, in nupa tal hi chu lo in hau lo teh u. Bawiha pawh zilh a ngai a nih hi, mi thihna avânga mahni lo inthiam loh tur a ni lo, nupa inkar tihchhiatna atân phei chuan a ṭul lêm lo, hetiang ngawt tur hi a nilo” nu Ṭha-i chuan a ti deuh bawrh bawrha, ka chhâng lêm lo.

Hun a aliama khum khatah kan mu dûn tak nângin kan in be ngailoa, nu Ṭha-i te pawhin an hau tih ka hria, mahsela a nun a nia keichuan sawisêl ka tum lêm lo, u Rami kha a lo hmangaih viau a nih te pawh ka ringa, hetiang ringawta min han awm khum chu keipawhin tawrh har ka ti.

Chaw lah ka ei ṭha theiloa, ka mut lah a tui thei hek lo. Chu chuan ka naupaiah nghawng a nei ta renga, Doctor Aruati phei chuan min kam khat  hial renga “Nau i neih a hun ṭep tawha, hetiang chuan i nau neih hunah pawh i ngaihtuah awm a nia, thisen i nei tlêm bawk si. In enkawl ṭha rawh, hetiang chuan naute mai bâkah nangpawh dinhmun hlauhawmah i awm thei a nia” a ti hial a nih kha.

U Sawmpuia chungah ka lungawi chiah lo bawk nên ka nau neih hma chu niteite inah awm phei ka duh thu ka hrilh hlawma, nu Ṭha-i leh pa Hriatpuia chuan an rem tilo viau na in ka hlimna an ngaihtuah ve bawk nên min phalsak ta hrâm a, u Sawmpuia awmdanah pawh a phal chiah lo tih ka hria.

Mahsela ka lungawi bik lova, nau ka neih hunah pawh ka haw peih kher angem ka hrelo, hetiang reng tur phei chuan haw tawhloh mai pawh ka pawi tilo, hei chen kan innei ve tawha. Hmeichhe pakhat chu pawh a bialnu hlui thihna avânga hetiang taka a danglam a nihchuan ka tân pawh mitthi tawh thik chu ho viau ang in lang mahsela mihring ka nihna ah leh hmeichhia ka lo nihna ah ka thik lo theilo.

Min be duh lo kher hian ka thin a tirim bawk, ka ni te inah chuan ka awm phei ta ngeia. Thil awmzia engkim ka hrilh vek bawk nên an ni pawhin min lo hrethiam ve mai bawka, inṭhen ka duh anih pawhin ka tân chuan ka fa châwm chu a harsa dâwn lo, hna ka neia nu leh pa bâkah chhûngte tam tak ka la nei bawka, baihvai chuan kan awm hauh lovang le.

Thawk la ham hamin ka room ah chuan ka awma, u Sawmpuia rawn lên châng pawhin ka chhuak ngai lova, a lakah ka lungawi lohna hi a mai mai lo tih hria sela ka duh, ka duh ai min nam-nul mah maha, a bialnu hlui avânga a inthlak danglam pawh hian min tina bawka ka rilru a tidam a, min tihlim leh thei te a nih loh chuan a bulah chuan ka kîr tawh lovang.

Ka duh êm avângin ngaihtuah chiang hauh lovin ka lo neia, chu chuan tûnah chuan ka nun chu hrehawm ngawih ngawihin a siama, mumal neilo in ka awm phah chu a nih si hi. 

Ka chaw ei chu tuilo viau ṭhin mahsela ka naute tân ka intih chak hrâm hrâm a ngai tiin ka ei lui ṭhin a, a hma ai chuan ka hmêl pawh hmuh a nuam leh ta a niang nitei te nupa pawh an lâwm ve viau mai. Engkimah dawh thei takin min en a, thinrimin min hau ngai lova, u Sawmpuia chungchâng pawh min sawipui ngai heklo.

Mahsela an rilru erawh chuan inhruaia inngeih taka awmdun turin min duh tih ka hria, tûn dinhmunah erawh chu thil chu ka ti thei thlâwt lo, a mi ṭawngkhum dân ka hre vek a, hre reng chunga han ngaihdam mai kha harsa ka ti a ni ber mai. Ka pasal a ni a, a nupui ka ni bawk. Nupa kan nihna angin engkimah kan inngaihsak tawn tur niin ka ngaia, keini erawh a ni ve lo.

Hmeichhe dang avângin tûnah pawh kan buai leh mêk chu a nia, chu pawh a bialnu hlui amah avang ngeia in tihlum kha. A lo intihlum a nih pawhin a duh thlanna a ni a, engvanga keima chungah daih thinrim nge a nih ka hre bik lo.

Keimah pawh ka inthiam loh ve zia a hmu in a hre veka, a tân theihtâwp chhuah ka tum laia khatiang a min awm khum khân min tina a ni ber mai .

Ka pum chu ka chûl leh heuh heuh ṭhin, nakinah chuan a rawn piang ve tawh anga, ka tân hlimna tam tak a rawn thlen ngei ka beisei. A pa nên kan awmdun emaw dun lo emaw ka tân chuan ka thil pêk hlu ber a ni dawna, chuvanga nghâk hlel em em pawh ka ni, a pa in a duh lo a nih pawhin keichuan hmangaihna nên ka enkawl ngei bawk ang.

“Nono” pâwna ṭhu a tlaini tla tur ka lo thlir lai chuan u Sawmpuia chu a rawn lang hlawla, tûnlai chu ka hmu khat khawp mai, a hna lamah a insawr bingte pawh a niang, kei erawh ka nau neih hma chu ka châwl ta rih tak tak a, kal chakna pawh ka nei lêm lo, u Rami thihna avâng hian mi tam takin min dem ve bawk nên ka tâna khawlai kal kha a la zahthlâk ve tih chauh a ni.

Ka lêng chhuak lo chung pawhin kan chanchin than nasat zia ka hria a, ngaiah ka neih tawh a ni mah zâwk. U Sawmpuia chu ka en vang vanga, mu tlêm tih hriat tak hian a mithnuai a val kalha,nidangah chuan min hmuh dâwn hi chuan a fai sar zel kha a nia.

“Enge ilo tih dâwn?” ka ti sepa, a hmêl ka hmuh hian ka rilru a na tlat zel. Ka chhuah hnu aṭangin kan inhmu lo tluk a ni a, Tepuii leh nu Ṭha-i erawh chuan min rawn kan fo ṭhin a, ka ei theih zâwng ni a an hriat chu min rawn ken ziaha, tûnah pawh fridge leh kan chhuar vêlah ei tur a awm deuh hnur mai.

A ni pawh rawn kal ve fo mahsela ka chhuah duh ngai loh miau avângin kan inhmu khât viau rêng a, ka kut chu a rawn vuana. Ka dul ah a rawn bei rual chuan ka mittui a far fap mai, ka rilru a tina vawng vawng bawk.

“Ka ngai tawh che a, kan naute pawh hi ka ngai tawh. Lo haw tawh rawh u, ka tihpalh a nihkha, keimah avânga Rami thi kha ka inthiam theilo a, hrehawm ka ti bawk. I lakah pawh ka inthiamloa, keimah avânga hmeichhe dang an thih ang khân nang pawh hi keimah avângin i thi ang tih pawh ka hlau a” a tihchuan ka en vang vanga.

Engtia han chhân mai tur nge pawh ka hrelo, chutiang avâng chuan maw min biak duh miahloha “U Rami inthah avâng chuan kei ka inthah ve i ring amaw? Min biak loh khân min ti hrehawm zâwk a sin, ka rilru i tina bawk chuan min hmangaih ve lo ni ah ka ngai” ka tihchuan a lu a thing nawk nawka, ka thusawi chu a dikloh zia tihlan a tum ni berin ka hria.

“Nilo chutiang in ka ngai lo che, keimah zâwk hi buaina chu ka ni. Ka rilru le loh lutuk avângin a thih phahah ka ngaia, nei leh duh siloa ka lo fiam kual niin ka ngai bawk. Kei hi a thihna thlentu ka ni a, min hrelo se tûnah pawh a la dam ngei ang, mahsela hei erawh hria la ka duh, ani kha ka hmangaih ngai hauh lova, nangmah hnar nân che khân ka kawp mai a nia, nang erawh ka nupui i ni a, ka hmangaih i ni bawk. In danglamna i hria ang tiraw?” a ti leh supa.

A hmêlah chuan a thusawi chu a ti tak tak tih ka hria, ama thah ang hialin a ngai tih ka hria. A ngaihtuahna lam aṭang chuan a dik ve tho, kei ngei pawh ka inthiam bik lo, mahsela kan tihsual a nilo ve ve, kan in hmangaiha. Mihring kan nihna angin duhthlan theihna kan nei ve bawk a, a duh a thlang a nimaia, tihsual a neilo.

Midangte pawhin an duh an thlanga, chuti nilo se chuan duh ber nei theilo tite hi kan awm lovang. 

A biangah chuan ka dawm saka “I tihsual a nilo, i duh i thlang mai alawm. Mi pakhat in a kalsan avânga ngaihtuahna sual a nei kha a vanduai pui zâwk a nihkha, chak taka hmachhawn a huam ve loh avângin a ti ah ngai rawh, i thiamloh a awm lo. Nang chuan i duh i thlang mai a lawm, a ni duhthlanna avânga nangmah in thiamlo tur i nilo, i kut ngeia i thah a nilova, midangte thusawi avâng mai chuan nangma nihna kha hloh ve suh aw, mi tin hian duh thlanna kan nei vek a, tumah famkim kan awm lo tih i hriat kha” tiin ka en vang vanga.

A chungah thinrim viau tur ka nih laiin a hrehawm ti hmêl hian min ti hlim bik lova, keimah ka tâwt ve ṭun tho. Keimah ni avânga inthat tih tur in ngaihtuah chian phei chuan u Sawmpuia nen kan inneihna a rei tawha, keimahni vâng chu ni dâwn se chuan tinge a tirah khân a inthah siloh? Tûn a u Sawmpuia thu rawn sawi hian eng emaw rinhlelh chu min neih tir chiang a ni.

Lehkha ah u Sawmpuia vâng tih a ni a, mahsela u Sawmpuian engtin mah a tilova, a rilru tina tur zawng pawhin a ṭawng heklo, kan hmuh tâwp ber ah khân keimah zâwk min nek tlu a nih kha. A thihna ah hian midang an awm reng zâwk nge tih te thleng chuan ka ngaihtuah tawh.

An that anga a aiah keini min puh a ni ngei ang, “U Sawmpui u Rami inawhhlumna kha an in a ni em?” ka tihchuan a rawn dâk chhuak vata, “Nilo e, ramhnuaiah a in âwk hlum” a tihchuan ka thaw haka “Keichu amah a inthat a ang lo ka ti ta riau, inthat duh nise tinge a tîr tê ah khân a in thah loh? Bâkah a zia ka ngaihtuaha, mahni intihlum tur chi a nilo, he thil hi ruahman sa a ang, nangmah itsiktu che emaw amah haw tu thil tih pawh a ni thei” ka tihchuan a ngawi vung vunga.

In ngaihtuah tih hriat takin a ngawi ran bawk, ka thusawi chu thil ni thei tak pawh ani. Tu emaw chuan kan nupa inkar tihbuaia min pawh ṭhen an duh tih a hriata, chuta kan buai theih nâna ṭha tur ber u Rami hmangin hma a la chat reng a.

A chhan pawh u Sawmpuia rilru ṭhat zia leh midangte chunga a rilru put hmang a hre chianga, u Rami nên an lo awm ve ṭhin dân nên ka ngaihtuah ka ngaihtuah tâkah chuan a ni ngei em tih ka hriat loh thil chu ka thluakah a rawn lût zut zuta, a dik angem tih erawh ka hre bik hauh lo.

“I ti ve tho em? Tûnah kan nupa ho te in kan inhaua, kan rilru chawh buai tum an awm a ni. Nang a thih chhanah an puh chat bawk che a, ngaihtuah hian thil ni thei tak tur a ni” ka ti leh sapa, a bu ve ta nghat mai.

“Inchhung lamah lût phawt teh ang, helaiah chuan fimkhur a ngai tlat. I rinhlelh ang thil a thleng a nihchuan enthlatu pawh kan nei reng tawh mai thei” tiin a thaw haka, keipawhin ka ring. Tûnah phei chuan an duh ang ngeiin kan awm hrang tawh chu ania.

Inchhunga kan inzui luh rualin nitei chuan min lo be nghal bawrh bawrha, u Sawmpuia pawh chu rawn lang khât a tih thu a sawi ve mawlh mawlha. Keini erawh inbiak lawk kan duh thu sawiin ka room lamah chuan kan inzui lût a.

“I rinhlelh chu a dik ngei ang tih i chiang amaw? Tunge ni ang? Amah a in tihlum pawh a ni thei tak tak a sin” a tihchuan ka lu ka thing nawk nawka “Ih a ni lo ang, kan in ti ila heta ka haw dawn zânah pawh khân zui ru tu ka nei a lawm, inchhûng ka luh hma chu min zuia, a tirah kha chuan rinhlelhna châng ka hreloa, tûnah chuan ka ringhlel sualin ka ring lo” ka tih tâkah chuan a tho kâng vuta.

A hlauhthâwn hmêl em em mai lehnghâl “Enga tinge chutiang te chu a tîrah khân i sawi loh? I himna ka duh tih i hriat kha, chutiang thil tawngin sawi i tum miahlo amaw?” lungawi lo aw lek lek chuan a rawn ti a. Ka sawi zo chiah sia eng ngaihtuahna nge le a neih bik ni?

“Aw rinhlelhna châng ka hrelo ka tih tawh kha, taka ih nizânah pawh” tiin ka meng deuh kâwk a, nizân zanlaiah khân ka room tukverh ka khâr theihnghilha, kha ta ka ṭhang harhin ka tukverh khâr tura ka kal lai khân mipa ruangâm ka hmuh hnu ang zet ka hmu a nih kha.

Kha leh min zuitu ka tihkha an thuhmun thanin ka hria “Ih nizânah pawh ka room tukverh piah kawngpuiah sâwn mi ka hmu, min lo en renga. Kei hi enthlatu ka nei tak tak aniang, min thah ve a tum pawh a ni thei” tiin hlauhthâwnna chuan min rawn luah nghala, ka khûr nghâl dar dar mai.

“U Sawmpui tu emaw misual tak hmelma kan nei aniang tiraw? Hetiang chuan keipawh min la tina duh mai ang, kan naute pawh” tiin hlauthâwng zet chuan ka ena, ka mittui a tling nghal pam mai. Ka naupai rilru no leh chi ai hma lai a ni bawk nên hlauhthâwnna hlîr chuan ka khata

U Sawmpuia chuan min rawn kuah vatin ka chalah chuan a hmuiin a nawr vang vanga “Shhhh....engkim a ṭha vek, ka venghim dâwn che a lawm. Min rawn zui haw tawh rawh aw, heta nangmah chauha awm tir tur che chuan min beisei tawh suh ang che, a rang lama nangmah enthla tu che hi kan hriat vat angai a nih chu” a ti supa.

Keipawhin ka hnial tawh lo, thil hi a bul tê aṭanga ka chhui keuh keuh hian ka him bik dâwn lo tlat hian ka hria a, keima tân chuan ka hlauthâwng lo. Mahsela kan fa lo la piang mai tur hian khawvêl êng a hmu hman lo ang tih mawlh a ni ka hlauh ni.

“Kha mihring ruangâm kha ka hmuh fo hnu a ni, kan bul hnai maia awmte pawh an ni thei. Palian tak ani.Kan fimkhur pawh a ngai viau ang, tunge hetianga kan chhiatna duhtu hi ni ang” tiin ka inngaihtuah vang vanga, kha ruangâm kha hmu nawn leh ila chuan ka hriat chhuah theih mai ka ring a ni.

“Aw le, engpawh chu ni sela rawn haw phawt la, sawtah chuan helai ai chuan ka vêng hneh zâwk dawn che a. Ka hmuh phaklohna a awm turin ka duh tawh lo che, vawikhatmah ka hlatah awm leh tawh suh u, lo insiam la i ni chu ka lo hrilh mai ang. Thawmhnaw siamtur i ngah em?” a tihchuan ka lu ka thing nar nara, ka chhuah dâwn khân thawmhnaw ken vak ka neiloa, chuvang chuan ken tur kan ngahlo hlauh a, a vânneihthlak viau mai.

U Sawmpuia nên chuan kan inzui hnak hnaka, kan in kan thleng ṭêp tihah chuan u Hlimpuia kan tâwk hlawla, a ni pawhin min hmu chu a motor ti ding meuhin min rawn bia a “Nono i haw tawh dâwn em ni? ” a rawn tihchuan ka bu nghata, a mah chu chiang takin ka ena, tlêm chuan a thu ve deuh in ka hria.

Ka hmuh lohna a rei ve tawh tho avângin ka hmu danglam riau te pawh ani mahna. U Sawmpuia nên chuan an in melh tawn ran a, tûn thleng hian an la in mil theilo a ni ber mai, in kawm tir chu ka tum nasa ṭhin. Mahsela an awm tlân tawh chuan ui leh kêl thlun pawlh ang mai an ni, insual an cho sa zek zek zêl.

“Um ka haw tawh dâwn a, nang pawh i hna ah i kal tawh dâwn a nimaw?” ka tihchuan a bu nghata, chutah a tlân chhuak chu u Sawmpuia nên chuan kan en zui renga, tûnlai chu kan in be khat viau mai.

“Kha pa nên khân i nite ina i awm chhûng khân in in bia em?” a rawn tihchuan ka lu ka thing nar nara, “Be ngai lo, ka awmna takngial pawh ka hrilh lo, tinge?” ka tihchuan a lu a thing ringawta.

“Hnaih lo la a ṭha, ka tello in khawiah mah chhuak suh ang che. Ka nau leh ka nu an tel te anih ngawt loh chuan nangmaha i vah chhuah phal a nilo” a tihchuan ka ner nâng a, chutiangte chu a hrehawm dâwn hian ka hria.

“Chutiang ka thei teuhlo mai, a hrehawm tihmahnak alai, kan naute lah hi a piang har tawh si a, a pu leh piten an nghak hlel tawh si a rawn piang vat vat sela a ṭha ang” ka tihchuan u Sawmpuia pawh chu a rawn nui ve suk suka, inchhung kan lût chu ka nu leh ka pa chuan min lo be nghal zung zunga, u Sawmpuia chu an hau nawn leh ṭhin, mahsela ka ring tâwk tawha ka kalsan leh tawh miah lovang.

Hei chen kan thleng tawha, ka fa hi tih fahrah ka phal hauh lo bawk. Chumi tur atân chuan a pa hi ka kalsan leh tawh lovang.